ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពីការសង្កេតឃើញសក្តានុពលខ្យល់នៅខេត្តព្រះសីហនុ សិស្សមួយក្រុមបានបម្លែងចំណេះដឹងក្នុងថ្នាក់រៀនទៅជាស្នាដៃជាក់ស្តែង តាមរយៈការបង្កើត «ឧបករណ៍តួប៊ីនខ្យល់ រួមចំណែកក្នុងវិស័យថាមពលបៃតង» ដែលមានគោលបំណងបង្ហាញពីលទ្ធភាពប្រើប្រាស់ថាមពលខ្យល់ ដើម្បីផលិតថាមពលអគ្គិសនី ដោយមិនចាំបាច់បញ្ចេញផ្សែងពុលដូចឥន្ធនៈក្នុងដំណើរការផលិតឡើយ។
ក្រុមសិស្សដែលមានសមាជិក៩នាក់ មកពីវិទ្យាល័យចំណេះទូទៅ និងបច្ចេកទេសក្រុងព្រះសីហនុ ដឹកនាំដោយលោកគ្រូ ឆោម ពិសិដ្ឋ បានរួមគ្នាសិក្សា ស្រាវជ្រាវ និងបង្កើតគម្រោងនេះឡើង ដោយផ្តោតលើការប្រើប្រាស់ខ្យល់ដែលជាប្រភពថាមពលកកើតឡើងវិញ។
យុវជន ពូន ពិសិដ្ឋ តំណាងសិស្សក្នុងក្រុម បានឱ្យដឹងថា គំនិតបង្កើតតួប៊ីនខ្យល់នេះកើតចេញពីការមើលឃើញសក្តានុពលខ្យល់នៅខេត្តព្រះសីហនុ ដែលមានលក្ខណៈសមស្រប និងទៀងទាត់សម្រាប់ដំណើរការតួប៊ីនខ្យល់នេះ។
មុនឈានដល់ការបង្កើតឧបករណ៍ ក្រុមសិស្សបានសិក្សា និងស្រាវជ្រាវអំពីសក្តានុពលខ្យល់ ព្រមទាំងអត្ថប្រយោជន៍នៃការប្រើប្រាស់ថាមពលខ្យល់ ដោយផ្អែកលើព័ត៌មានពីប្រភពផ្សេងៗ និងទិន្នន័យពាក់ព័ន្ធនឹងស្ថានភាពខ្យល់នៅខេត្តព្រះសីហនុ។
យុវជន ពិសិដ្ឋ បានពន្យល់ថា តាមការសិក្សារបស់ក្រុម ថាមពលខ្យល់ជាប្រភពថាមពលកកើតឡើងវិញដែលអាចប្រើប្រាស់ដោយមិនចេះរីងស្ងួត ។ តួប៊ីនខ្យល់ត្រូវការកម្លាំងខ្យល់បក់ ឬហៅថាជាថាមពលស៊ីនេទិចនៃខ្យល់សមស្របដើម្បីបង្វិលស្លាបតួប៊ីន ហើយនៅពេលស្លាបមានចលនា ឬវិល វាបង្កើតបានជាថាមពលមេកានិចដែលរុញឌីណាម៉ូឱ្យវិល ការវិលរបស់ឌីណាម៉ូនាំឱ្យបង្កើតបានជាថាមពលអគ្គិសនី។
យុវជនរូបនេះបន្ថែមថា «ការប្រើប្រាស់ថាមពលខ្យល់ក៏អាចចូលរួមកាត់បន្ថយផលប៉ះពាល់ដល់បរិស្ថាន ព្រោះការផលិតអគ្គិសនីពីតួប៊ីនខ្យល់មិនមានការដុតឥន្ធនៈផូស៊ីលទេនៅពេលដំណើរការទេ ដែលនេះជួយកាត់បន្ថយការបំភាយឧស្ម័នពុលទៅក្នុងបរិយាកាស»។
ចំណុចពិសេស នៃគម្រោងនេះ គឺក្រុមសិស្សបានបង្កើតតួប៊ីនខ្យល់ (ខ្នាតតូច) ដែលមានគោលបំណងបង្ហាញពីលទ្ធភាពនៃការប្រើប្រាស់ថាមពលខ្យល់នៅតំបន់ដែលមានលក្ខខណ្ឌខ្យល់សមស្រប និងទៀងទាត់ ហើយអាចដំឡើងវានៅកន្លែងមួយចំនួនដូចជាលើដំបូលសាលារៀន ដំបូលផ្ទះ មាត់ឆ្នេរសមុទ្រ កណ្តាលសមុទ្រ ភ្នំ ឬតំបន់ដាច់ស្រយាលមួយចំនួន។
ទោះជាយ៉ាងណា ការប្រើប្រាស់តួប៊ីនខ្យល់ជាក់ស្តែង ត្រូវអាស្រ័យលើល្បឿនខ្យល់ ទីតាំង និងសមត្ថភាពរបស់ឧបករណ៍ពាក់ព័ន្ធ ដើម្បីធានាបាននូវប្រសិទ្ធភាពនៃការផលិតថាមពលសមស្រប។
លោក ទូច គង្គា នាយកស្តីទីវិទ្យាល័យចំណេះទូទៅ និងបច្ចេកទេសក្រុងព្រះសីហនុ បានឱ្យដឹងថា គម្រោងនេះត្រូវបានដាក់តាំងពិព័រណ៍នៅសាលា និងរក្សាទុកជាស្នាដៃសម្រាប់សិស្សជំនាន់ក្រោយបានសិក្សា និងរៀនសូត្រ។
គួរបញ្ជាក់ថា គម្រោង «ការបង្កើតឧបករណ៍តួប៊ីនខ្យល់ រួមចំណែកក្នុងវិស័យថាមពលបៃតង» ទទួលបានជ័យលាភីលេខ១ ទូទាំងប្រទេស ក្នុងកម្មវិធីប្រកួតប្រជែងស្នាដៃ STEM ក្រោមប្រធានបទ «STEM ក្នុងវិស័យថាមពលបៃតង» ដែលរៀបចំដោយក្រសួងអប់រំ យុវជន និងកីឡា កាលពីឆ្នាំ២០២៤។
ស្នាដៃនេះបានបង្ហាញពីការផ្សារភ្ជាប់រវាងការរៀនក្នុងថ្នាក់ និងការអនុវត្តជាក់ស្តែង ខណៈគំនិតប្រើប្រាស់ថាមពលខ្យល់របស់សិស្សក៏បានបើកទស្សនៈសម្រាប់ការសិក្សាបន្ថែមអំពីប្រភពថាមពលកកើតឡើងវិញ និងការអភិវឌ្ឍបច្ចេកវិទ្យាដែលអាចរួមចំណែកដល់បរិស្ថាននាពេលអនាគត៕
