នៅក្នុងយុគសម័យសកលភាវូបនីយកម្ម ការទំនាក់ទំនងតាមរយៈភាសាអង់គ្លេសលែងជាជម្រើសទៀតហើយ ប៉ុន្តែវាគឺចាំបាច់ដែលមិនអាចខ្វះបានសម្រាប់មនុស្សគ្រប់រូប ក្នុងការរស់នៅ និងការបំពេញការងារ។ ទោះជាយ៉ាងណា ការរៀនភាសាមួយឱ្យស្ទាត់ជំនាញ មិនមែនទាមទារត្រឹមតែការទន្ទេញចាំក្នុងសៀវភៅនោះទេ ប៉ុន្តែវាទាមទារនូវយុទ្ធសាស្ត្រអនុវត្តដែលត្រឹមត្រូវ និងជាប់លាប់។ ខាងក្រោមនេះ គឺជាវិធីសាស្រ្តសំខាន់ៗចំនួន ៣ ដែលដកស្រង់ចេញពី Udemy ដើម្បីជួយឱ្យលោកអ្នកអាចបង្កើនសមត្ថភាពភាសាអង់គ្លេស ទាំងការបញ្ចេញសំឡេង ការអាន និងការកសាងទំនុកចិត្តក្នុងការនិយាយ។

ចំណាយពេល៣០នាទី លើការបញ្ចេញសំឡេង ៖ ចំពោះអ្នកសិក្សាដែលមិនមែនមានជាភាសាអង់គ្លេសជនជាតិដើម សកម្មភាពហ្វឹកហាត់ការបញ្ចេញសំឡេង រឹងរឹតតែដើរតួនាទីសំខាន់ ក្នុងការបង្កើនប្រសិទ្ធភាព នៃការសិក្សា ដូច្នេះត្រូវវិនិយោគពេលយ៉ាងហោចណាស់ឱ្យបាន៣០នាទីក្នុងមួយថ្ងៃ ទៅអនុវត្តន៍របៀបនៃការបញ្ចេញសំឡេង។ អ្នកដែលមិនមែនជាភាសាដើម សុទ្ធតែធ្លាប់មានបទពិសោធន៍ ខ្មាសអៀនក្នុងការបញ្ចេញសំឡេង ដែលភាពខ្មាសអៀនមួយនេះ អាចក្លាយជាអន្ទាក់បង្កភាពស្ទាក់ស្ទើរ ក្នុងការយកភាសាទៅប្រើជាផ្លូវការ។ មានវិធីជាច្រើនក្នុងការអនុវត្តដើម្បីពង្រឹងការបញ្ចេញសំឡេង ដូចជាអានសៀវភៅឮៗ និយាយចេញមកក្រៅឮៗ ហើយការអានទៀតសោត គួរផ្តោតលើការបញ្ចេញសំឡេង ជាជាងផ្តោតលើអត្ថន័យ។

អានជាភាសាអង់គ្លេស រាល់គ្រប់ទម្រង់ នៃសំណេរ ៖ អានជាតម្រូវការចាំបាច់មួយ មិនថា អ្នកសិក្សាមុខវិជ្ជាអ្វី ឬអ្នករៀនសូត្រ​ផ្នែកណា ឬអ្នកមានជំនាញបច្ចេកទេសណាមួយនោះទេ! ដូច្នេះគួរប្រើប្រាស់ទម្លាប់នៃការអានឱ្យមានប្រសិទ្ធភាពជាងមុនផង និងជាការស្រូបព័ត៌មានឱ្យបានទូលំទូលាយផង ដោយការជ្រើសរើសអាន ជាភាសាអង់គ្លេសមិនថា សៀវភៅ ព័ត៌មាន កាសែត និងទស្សនាវដ្តីនោះទេ។

ការមានទម្លាប់អានជាភាសាអង់គ្លេស គឺជាការបង្កើនការប្រាស្រ័យទាក់ទងឱ្យមានគុណភាពជាងមុន មានគំនិតទូលាយជាងមុន ឬការសរសេរអ៊ីមែលច្បាស់ជាងមុន ខ្លីជាងមុន ប្រើប្រាស់បែបផ្លូវការជាងមុន និងប្រើប្រាស់ពាក្យបត់បែនទៅតាមកាលៈទេសៈបានលឿន។ ក្រៅពីនេះ ការអានគឺជាវិធីមួយជួយពង្រឹងដល់ការសរសេរសំណេរ ឬសៀវភៅ ឬអត្ថបទនានាផងដែរ! ជារួមគឺអានជាការបង្កើនគំនិតផង និងជាការឆ្លុះបញ្ចាំងអំពីលទ្ធភាពដែលខ្លួនអាចធ្វើបានផង។

ថតជាសំឡេង​ ឬជាវីដេអូ ៖ គោលដៅដំបូងនៃការថតសម្លេង ឬវីដេអូខ្លួនឯង កំឡុងពេលនិយាយ ឬកំឡុងអានជាភាសាអង់គ្លេស គឺដើម្បីស្វែងរកចំណុចខ្លាំង ឬខ្សោយក្នុងការកែប្រែឱ្យមានភាពល្អប្រសើរជាងមុនសម្រាប់ថ្ងៃក្រោយ។ ហើយវិធីសាស្រ្តនេះ សាកសមបំផុសសម្រាប់អ្នកដែលខ្លាចក្នុងការបង្កើតកំហុស និងអ្នកដែលមានភាពខ្មាសអៀននៅពេលនិយាយជាសាធារណៈ ឬអ្នកដែលចូលចិត្តអភិវឌ្ឍន៍ខ្លួនបែបស្ងាត់ៗ។ គួរថតសំឡេងទុកស្តាប់ពេលក្រោយ រៀងរាល់ពេលដែលត្រូវនិយាយ មិនថា នៅសាលា នៅផ្ទះ ឬក៏នៅកន្លែងការងារ ព្រោះសកម្មភាពមួយនេះមិនមែនគ្រាន់តែដើម្បីអភិវឌ្ឍន៍ផ្នែកភាសាប៉ុណ្ណោះទេ! ប៉ុន្តែក៏បានរួមចំណែកដល់ជំនាញនៃការនិយាយជាសាធារណៈផងដែរ ព្រោះវិធីនៃការថត ហើយស្តាប់ខ្លួនឯងឡើងវិញនេះ អ្នកបង្រៀន អ្នកផ្តល់យោបល់ អ្នកនយោបាយ ឬអ្នកដែលពាក់ព័ន្ធនឹងការនិយាយជាសាធារៈជាមួយក្រុមមនុស្សចម្រុះសុទ្ធតែឆ្លងកាត់វិធីមួយនេះ។

ជាងនេះទៅទៀត មនុស្សដែលមានអាការថប់បារម្ភ ចំពោះការនិយាយភាសាអង់គ្លេសនៅកន្លែងការងារ ឬនៅទីប្រជុំជន ក៏ត្រូវការប្រើប្រាស់ការថតសម្លេង ឬវីដេអូ ដើម្បីកាត់បន្ថយភាពតានតឹង ពង្រឹងសមត្ថភាពបន្ថែម និងការត្រៀមខ្លួនឱ្យបានល្អជាងមុន៕