ឱកាសសិក្សាអាហារូបករណ៍ថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់នៅវិទ្យាស្ថានខ្មែរជំនាន់ថ្មី ចំនួន២៣០កន្លែង ពីសហភាពសហព័ន្ធយុវជនកម្ពុជារាជធានីភ្នំពេញ។ អាហារូបករណ៍ផ្ដល់ឱ្យការសិក្សាថ្នាក់បរិញ្ញាបត្រជាន់ខ្ពស់៣០កន្លែង ថ្នាក់បរិញ្ញាបត្ររង និងបរិញ្ញាបត្រចំនួន២០០កន្លែង។

ជំនាញដែលអាហារូបករណ៍ផ្ដល់ជូនសម្រាប់ថ្នាក់បរិញ្ញាបត្រជាន់ខ្ពស់មាន វិទ្យាសាស្ត្រអប់រំ រដ្ឋបាលសាធារណៈ នីតិឯកជន ហិរញ្ញវត្ថុ គ្រប់គ្រង និងការបង្រៀនភាសាអង់គ្លេស ដែលមានរយៈពេលសិក្សា០២ឆ្នាំ និងវេនសិក្សាថ្ងៃសៅរ៍-អាទិត្យ។ ជំនាញសម្រាប់ថ្នាក់បរិញ្ញាបត្រ (សិក្សារយៈពេល៤ឆ្នាំ) និងបរិញ្ញាបត្ររង (សិក្សារយៈពេល២ឆ្នាំ) មាន គណនេយ្យ, ធនាគារនិងហិរញ្ញវត្ថុ, ទីផ្សារ, គ្រប់គ្រង, សេដ្ឋកិច្ច, ទេសចរណ៍, អក្សរសាស្ត្រអង់គ្លេស, ភាសាអង់គ្លេសបង្រៀន, វិទ្យាសាស្ត្រកុំព្យូទ័រ, បច្ចេកវិទ្យាព័ត៌មានពាណិជ្ជកម្ម, នីតិសាស្ត្រ, វិទ្យាសាស្ត្រនយោបាយ និងរដ្ឋបាលសាធារណៈ ដោយការសិក្សាមានវេនច័ន្ទ-សុក្រ (ព្រឹក, ថ្ងៃ, និងយប់) និងវេន សៅរ៍-អាទិត្យ។

លក្ខខណ្ឌក្នុងការជ្រើសរើស អាហារូបករណ៍ផ្ដល់ជូនសម្រាប់សាធារណៈជន និងអាទិភាពខ្ពស់ដល់បេក្ខជនដែលមានជីវភាពខ្វះខាត ដោយបេក្ខជនទាំងអស់ត្រូវឆ្លងកាត់ការប្រកួតប្រជែងជ្រើសរើសដែលរៀបចំដោយ ក្រុមការងារកម្មវិធីសាបព្រោះគ្រាប់ពូជនៃសហភាពសហព័ន្ធយុវជនកម្ពុជារាជធានីភ្នំពេញ ។ ជាមួយគ្នានេះ បេក្ខជនត្រូវមានសញ្ញាបត្របរិញ្ញាបត្រ ឬឯកសារបញ្ជាក់ដែលមានតម្លៃស្មើសម្រាប់បរិញ្ញាបត្រជាន់ខ្ពស់ និងមានសញ្ញាមធ្យមសិក្សាទុតិយភូមិ ឬឯកសារបញ្ជាក់ដែលមានតម្លៃស្មើសម្រាប់ថ្នាក់បរិញ្ញាបត្រ និងបរិញ្ញាបត្ររង។ បេក្ខជនជ័យលាភីអាហារូបករណ៍ត្រូវបង់ថ្លៃសេវារដ្ឋបាលដោយខ្លួនឯងដែលមានតម្លៃ២០០ដុល្លារក្នុងមួយឆ្នាំសម្រាប់ថ្នាក់បរិញ្ញាបត្រជាន់ខ្ពស់ និង១០០ដុល្លារក្នុងមួយឆ្នាំសម្រាប់ថ្នាក់បរិញ្ញាបត្រ និងបរិញ្ញាបត្ររង។

បេក្ខជនដែលមានចំណាប់អារម្មណ៍ដាក់ពាក្យអាហារូបករណ៍ត្រូវភ្ជាប់ជាមួយឯកសារចាំបាច់ដូចជា ពាក្យសុំអាហារូបករណ៍០១ច្បាប់ បង្កាន់ដៃទទួលពាក្យស្នើសុំអាហារូបករណ៍០១ច្បាប់ ជីវប្រវត្តិសង្ខេបដែលមានបិទរូបថតថ្មី៤x៦, ០១ច្បាប់ សញ្ញាបត្រ(ដែលបានបញ្ជាក់ខាងលើ)១ច្បាប់ ថតចម្លងអត្តសញ្ញាណប័ណ្ណ ឬសេចក្ដីចម្លងសំបុត្របញ្ជាក់កំណើត ឬសំបុត្របញ្ជាក់កំណើត១ច្បាប់ រូបថតទំហំ(៤x៦ស.ម) ថតថ្មីចំពីមុខគ្មានវ៉ែនតា និងមានផ្ទៃខាងក្រោយពណ៌សចំនួន៣ច្បាប់។

បេក្ខជន និងសាធារណៈជនដែលចង់ស្នើពាក្យអាហារូបករណ៍សូមទាញយកសុំណុំឯកសារស្នើសុំអាហារូបករណ៍របស់ ស.ស.យ.ក រាជធានីភ្នំពេញតាមរយៈ https://bit.ly/46737uV និងបំពេញពាក្យតាមតំណភ្ជាប់ https://forms.gle/oqn2eXLyRoa4E81r5 ។ ចាប់ទទួលពាក្យពីថ្ងៃផ្សាយដំណឹងរហូតដល់ថ្ងៃទី០៥ ខែមករា ឆ្នាំ២០២៤៕