ភ្នំពេញ – ការបន្តសិក្សាថ្នាក់បរិញ្ញាបត្រជាន់ខ្ពស់ជំនាញដែលទាក់ទងទៅនឹងបច្ចេកវិទ្យា នវានុវត្តន៍ អគ្គិសនី ឬនុយក្លេរអ៊ែរ ជាក្ដីស្រមៃក្រោយបញ្ចប់បរិញ្ញាបត្រ របស់យុវតី ហោ សរិរីរតនា ជានិស្សិតអាហារូបករណ៍រដ្ឋាភិបាលរុស្សីឆ្នាំសិក្សា២០២២-២០២៣ ជំនាញ វិស្វកម្មនុយក្លេអ៊ែរ និងរូបវិទ្យាកម្ដៅនៅសាកលវិទ្យាល័យ Bauman Moscow State Technical នៃប្រទេសរុស្សី ។

កញ្ញា ហោ សិរីរតនា បាននិយាយថា កញ្ញាសម្រេចចិត្តដាក់ពាក្យអាហារូបករណ៍សិក្សាជំនាញវិស្វកម្មនុយក្លេអ៊ែរ និងរូបវិទ្យាកម្ដៅ នៅសាកលវិទ្យាល័យ Bauman Moscow State Technical ក៏​ព្រោះតែជាសាកលវិទ្យាល័យដែលចាស់ជាងគេក្នុងចំណោមសាកលវិទ្យាល័យផ្សេងៗក្នុងប្រទេសរុស្សី និងមានសាស្ត្រាចារ្យដែលមានជំនាញក្នុងការបង្ហាត់បង្រៀនសិស្សច្រើនជាង២រយពាន់នាក់ឱ្យក្លាយជាវិស្វករ និងអ្នកជំនាញល្បីៗ ហើយក៏ជាសាកលវិទ្យាល័យជាប់ចំណាត់ថ្នាក់លេខ១ផ្នែកបច្ចេកទេសផងដែរ ។ កញ្ញាបន្តថា បច្ចុប្បន្នកញ្ញាកំពុងសិក្សាថ្នាក់រៀនភាសារុស្សីនៅសាកលវិទ្យាល័យ Moscow State University of Geodesy and Cartography រយៈពេល១ឆ្នាំ ដើម្បីត្រៀមខ្លួនទៅបន្តថ្នាក់បរិញ្ញាបត្រជាន់ខ្ពស់នៅសាកលវិទ្យាល័យ Bauman Moscow State Technical ។

យុវតី សិរីរតនា បន្ថែមថា មូលហេតុ​ដែល​កញ្ញាជ្រើសរើសរៀនជំនាញវិស្វកម្មថាមពលនុយក្លេអ៊ែរ និងរូបវិទ្យាកម្ដៅព្រោះជាចំណង់ចំណូលចិត្តរបស់កញ្ញាស្រលាញ់ផ្នែកវិទ្យាសាស្ត្រ និងរូបវិទ្យា ។ យ៉ាងណាមិញ កញ្ញាពិតជាមានចំណាប់អារម្មណ៍ខ្ពស់ទៅនឹងវិស័យថាមពលខ្លាំងណាស់ ព្រោះប្រទេសកម្ពុជាយើងជាប្រទេសកំពុងអភិវឌ្ឍន៍ ហើយវិស័យថាមពលក៏កំពុងអភិវឌ្ឍផងដែរ លើកលែងតែវិស័យនុយក្លេអ៊ែរដែលមិនទាន់មាន និងមិនទាន់មានអ្នកសិក្សាស្រាវជ្រាវឱ្យបានច្បាស់លាស់ទើបកញ្ញាចង់សិក្សាជំនាញនេះឱ្យបានច្បាស់ និងចូលរួមក្នុងការអភិវឌ្ឍធនធានមនុស្សនៅកម្ពុជាក្នុងការអភិវឌ្ឍវិស័យថាមពលនៅកម្ពុជា និងលើកម្ពស់ស្ត្រីក្នុងផ្នែកវិស្វកម្ម ។

កញ្ញា ហោ សិរីរតនា

“ខ្ញុំចង់ចូលរួមបំផុសគំនិតស្ត្រីកម្ពុជាក្នុងវិស័យវិស្វកម្ម ទោះជាក្នុងជំនាញមួយណាក៏ដោយ លុបបំបាត់ផ្នត់គំនិតស្ត្រីបង្វិលចង្ក្រានមិនជុំនៅសតត្សទី២១នេះ “

ជាមួយគ្នានេះ កញ្ញា សិរីរតនា សូមកោតសរសើរ និងអរគុណដល់សិស្សច្បង ក៏ដូចជាសមាគន៍និស្សិតខ្មែរប្រចាំនៅប្រទេសរុស្សី ដែលបានជួយរៀបចំឯកសារកាតធនាគារ ឯកសារ Finger print សម្រាប់ជនបរទេស ប័ណ្ណធានារ៉ាប់រងអាយុជីវិត និងសុខភាពផងដែរ ។ សម្រាប់ការរស់នៅ ក្នុងអន្តេរវាសិកដ្ឋានរបស់និស្សិតមិនមានតម្លៃថ្លៃនោះឡើយគឺមានតម្លៃត្រឹមតែ១៥ដុល្លារអាមរិកប៉ុណ្ណោះ និងមានការរៀបចំឱ្យស្នាក់នៅមួយបន្ទប់២នាក់ ដែលជាសិស្សបរទេសមកពីប្រទេសផ្សេងគ្នាដើម្បីងាយស្រួលក្នុងការសន្ទនាជាភាសារុស្សី និងបន្ថែមការអនុវត្តភាសារុស្សីផងដែរ ។

ត្បិតតែប្រទេសរុស្សីជាប្រទេសមហាអំណាច ប៉ុន្តែការទិញទំនិញ ការធ្វើដំណើរ ជាពិសេសថ្លៃម្ហូបអាហារមិនមានតម្លៃថ្លៃដូចប្រទេសនៅតំបន់អឺរ៉ុបផ្សេងឡើយ ពោលម្ហូបអាហារមានតម្លៃប្រហាក់ប្រហែលនឹងប្រទេសកម្ពុជាយើងដែរ ។

ក្រោយបញ្ចប់ការសិក្សានៅប្រទេសរុស្សី កញ្ញា នឹងបន្តចុះកម្មសិក្សានៅប្រទេសអូទ្រីសរយៈពេលមួយឆ្នាំបន្ថែមទៀតនៅការិយាល័យកណ្ដាលនៃអង្គការភ្នាក់ងារថាមពលអាតូមិកអន្តរជាតិ (IAEA, Internaltional Atomic Energy Agency) ។ រតនា សង្ឃឹមថា ពេលត្រឡប់មកកម្ពុជាវិញ និងចូលបំពេញការងារជូនជាតិដូចជា ក្រសួងបរិស្ថាន ក្រសួងរ៉ែនិងថាមពល ក្រសួងវិទ្យាសាស្ត្របច្ចេកវិទ្យា និងនវានុវត្តន៏ ក៏ដូចជាអគ្គិសនីកម្ពុជាផងដែរ។ ព្រោះថាក្រសួង និងស្ថាប័នទាំងនេះគឺសុទ្ធសឹងតែរួមចំណែកយ៉ាងសំខាន់ក្នុងការអភិវឌ្ឍន៏វិស័យថាមពលនៅកម្ពុជា ជាពិសេសគឺក្រសួងបរិស្ថានដែលបានចូលរួមផ្តល់អាហារូបករណ៍ដល់កញ្ញាជាមួយនឹង ROSATOM (ភ្នាក់ងារសាជីវកម្មថាមពលបរមាណូរដ្ឋរុស្សី) ផងដែរ។

និស្សិតអាហារូបករណ៍រូបនេះលើកបន្ថែមថា «បច្ចុប្បន្នខ្ញុំក៏ជាសមាជិកមួយរូបរបស់មជ្ឈមណ្ឌលស្រាវជ្រាវ និងអប់រំបរមាណូកម្ពុជាដែលជាមជ្ឈមណ្ឌលកម្ពុជាថ្មីមួយត្រូវបានបង្កើតទ្បើងដោយក្រុមបញ្ញាវ័ន្ត និងនិស្សិតកម្ពុជាដែលកំពុងតែសិក្សា និងបានបញ្ចប់ការសិក្សាជំនាញនុយក្លេអ៊ែរបរមាណូ និងជំនាញដែលពាក់ព័ន្ធក្នុងគោលបំណងពង្រឹងនឹងចែកចាយចំណេះដឹងបន្តជាមួយនឹងជំនាញមួយនេះ ។ ប្រសិនជាអាចខ្ញុំក៏មានបំណងក្នុងការចូលបំពេញការងារក្នុងក្របខណ្ឌរបស់អង្គការ IAEA ដែរ ។ ម្យ៉ាងទៀតធ្វើជាគ្រូបង្រៀនមួយរូបនៅសាកលវិទ្យាល័យជាមួយជំនាញនេះក៏ជាក្តីស្រមៃមួយរបស់ខ្ញុំផងដែរ ថ្វីបើកម្ពុជាមិនទាន់មានវិស័យនេះនៅទ្បើយ ប៉ុន្តែការអភិវឌ្ឍន៍ធនធានមនុស្សគួរតែបន្ត យើងមិនអាចមើលឃើញទេ ប្រហែលជា១០ ទៅ ១៥ឆ្នំាទៅមុខយើងអាចនឹងមានវាក៏ថាបាន ដូច្នេះការត្រៀមខ្លូនជាស្រេចជាមួយនឹងធនធានមនុស្សដែលយើងនឹងមានស្រាប់។» ជាចុងក្រោយកញ្ញាសូមថ្លែងអំណរគុណដល់លោកឪពុកអ្នកម្ដាយ លោកគ្រូអ្នកគ្រូ សាស្ត្រចារ្យ សិស្សច្បង មិត្តភក្តិ និងមនុស្សជាទីស្រលាញ់ទាំងអស់ដែលតែងតែលើកទឹកចិត្ត មើលថែ ផ្ដល់ការផ្គត់ផ្គង់ និងនៅក្បែររហូតមកដល់ពេលនេះ ជាពិសេសសូមអរគុណដល់ម្ចាស់អាហារូបករណ៍ដែលតែងតែផ្ដល់អាហារូបករណ៍ដល់និស្សិតកម្ពុជាជាច្រើនរូបទៀតមានឱកាសសិក្សានៅសាលាល្បីៗ និងមានឱកាសក្រេបយកចំណេះវិជ្ជាទៅកសាងប្រទេសរបស់ខ្លួនវិញ ៕