ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
មុនសម្រេចចិត្តដាក់ពាក្យអាហារូបករណ៍ទៅសិក្សានៅក្រៅប្រទេស និស្សិតគួរដឹង៣ចំណុចជាមុនសិន ។ នេះជាការលើកឡើងរបស់លោក Vevid អ្នកផលិតមាតិកា និងជាអតីតនិស្សិតអាហារូបករណ៍ Chevening ឆ្នាំសិក្សា២០២០-២០២១ ។
អ្នកផលិតមាតិការូបនេះបានលើកឡើងថា ៣ចំណុចដែលអ្នកចង់ស្នើពាក្យអាហារូបករណ៍នេះរួមមាន ៖
១. ត្រូវដឹងពីប្រភេទអាហារូបករណ៍ ៖ អាហារូបករណ៍មានច្រើនប្រភេទ ប៉ុន្តែយើងអាចសម្គាល់បានគឺអាហារូបករណ៍រយៈពេលខ្លី ឬហៅថាអាហារូបករណ៍ផ្លាស់ប្ដូរការសិក្សារយៈពេលខ្លី និងអាហារូបករណ៍សិក្សារយៈពេលវែងដែលមានរយៈពេលវែង មួយត្រីមាស បរិញ្ញាបត្រ៤ឆ្នាំ ឬបរិញ្ញាបត្រជាន់ខ្ពស់រយៈពេល២ឆ្នាំជាដើម ។ ដូចនេះអ្នកត្រូវដឹងថាជាប្រភេទអាហារូបករណ៍អី្វ ហើយតើអ្នកកំពុងស្វែងរកអាហារូបករណ៍អ្វី និងត្រូវជាមួយ Profile របស់អ្នកដែរឬទេ ។
២. អាហារូបករណ៍បើកផ្ដល់សម្រាប់នរណា ៖ អ្នកស្នើពាក្យអាហារូបករណ៍ត្រូវដឹងថា តើអាហារូបករណ៍បើកផ្ដល់ឱ្យសម្រាប់នរណា សម្រាប់សិស្សថ្នាក់វិទ្យាល័យ សម្រាប់សិស្សនៅមហាវិទ្យាល័យ ឬសម្រាប់សាធារណជនទូទៅ ។ លោកបានបន្ថែមថា ប្រសិនបើអ្នកមានឱកាសទៅសិក្សានៅក្រៅប្រទេសតាំងពីវ័យក្មេងកាន់តែលឿនកាន់តែល្អ ព្រោះមានឱកាសអាចធ្វើឱ្យអ្នករៀនរស់នៅកាន់តែឯករាជ្យជាងមុន អាចរៀនសូត្រពីមនុស្សជុំវិញខ្លួន និងនិស្សិតបរទេសជាច្រើនមកពីកន្លែងផ្សេងៗគ្នាព្រោះការសិក្សានៅក្រៅប្រទេសអ្នកអាចធ្វើឱ្យអ្នកសិក្សាពីបរិបទខាងក្រៅបានកាន់តែច្រើន ។
៣. ត្រូវដឹងថាជាអាហារូបករណ៍សិក្សានៅប្រទេសណា និងផ្ដល់ការគាំទ្រពីប្រទេសណា ៖ មុនដាក់ពាក្យអាហារូបករណ៍អ្នកត្រូវដឹងថាអាហារូបករណ៍នឹងនាំអ្នកទៅសិក្សានៅប្រទេសណា ហើយត្រូវនឹងអ្វីដែលអ្នកចង់ទៅសិក្សាដែរឬទេ ។ អ្នកអាចសង្កេតមើលពីប្រព័ន្ធអប់រំនៅប្រទេសដែលអ្នកចង់ទៅសិក្សានៅប្រទេសនោះបានថា តើអ្វីដែលអ្នកចង់ទៅសិក្សានៅទីនោះ មានឥទ្ធិពល និងប្រសិទ្ធភាពអប់រំបែបណា ។
គួរបញ្ជាក់ដែរថា នេះជាការចែករំលែករបស់លោក Vevid នៅក្នុងទំព័រ Facebook ផ្លូវការរបស់លោកដែលមានឈ្មោះថា Vevid’s Day Off កាលពីពេលថ្មីៗនេះ ៕
