ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ ៖ កុមារកម្ពុជា ៤រូប បានដណ្តើមមេដាយមាសចំនួន ៤ ក្នុងការប្រកួតយុវជនផ្នែកបញ្ញាសិប្បនិម្មិត (AI) និងមនុស្សយន្ត (Robotics) លើកទី២៣ ថ្នាក់អាស៊ាន ដែលបានរៀបចំឡើងនៅទីក្រុងណាននីង ខេត្តក្វាងស៊ី សាធារណរដ្ឋប្រជាមានិតចិន កាលពីពេលថ្មីៗនេះ។
បេក្ខជនវ័យក្មេងតំណាងកម្ពុជាទាំង ៤រូប ដែលមានអាយុចន្លោះពី ៨ ដល់ ១២ឆ្នាំ រួមមាន កុមារី កេត មុន្នីនាថ, កុមារា កេត រិទ្ធិស័ក, កុមារា ស៊ូ ស៊ឺប៉ និង កុមារា វុទ្ធី សម្បត្តិវិទូ។ ពួកគេ បានចូលរួមប្រកួតជាមួយយុវជនឆ្នើមរាប់រយនាក់មកពីប្រទេសចិន និងបណ្តាប្រទេសអាស៊ាន ក្នុងការប្រកួតអន្តរជាតិដែលផ្តោតលើបច្ចេកវិទ្យាបញ្ញាសិប្បនិម្មិត មនុស្សយន្ត វិស្វកម្ម ការសរសេរកូដ ការច្នៃប្រឌិត និងការផ្លាស់ប្តូរបទពិសោធន៍រវាងយុវជន នៃបណ្តាប្រទេសក្នុងតំបន់។
លោក ពេជ សូវៀត ស្ថាបនិក Uot AI & STEM Center និងជាអ្នកដឹកនាំក្រុមសិស្សទៅប្រកួតដោយផ្ទាល់ បានសម្តែងនូវមោទនភាពចំពោះសមិទ្ធផលនេះ។ លោកមានប្រសាសន៍ថា ”កូនខ្មែរពិតជាមានសមត្ថភាព, អ្វីដែលយើងត្រូវធ្វើក្នុងនាមជាអ្នកជំនាន់មុន ឬជាអាណាព្យាបាល គឺត្រូវផ្ដល់ឱកាសឱ្យពួកគាត់បានបញ្ចេញសមត្ថភាព និងទេពកោសល្យ ដើម្បីជួយលើកមុខមាត់ប្រទេសជាតិនៅលើឆាកអន្តរជាតិ”។
លោកបានបន្ថែមថា នេះជាលើកទី១ ហើយដែលមជ្ឈមណ្ឌល Uot AI & STEM Center បានដឹកនាំសិស្សទៅប្រកួត AI និង Robotics ថ្នាក់អាស៊ាននៅប្រទេសចិន ហើយតាមរយៈជោគជ័យនេះ មជ្ឈមណ្ឌលមានគម្រោងបន្តដឹកនាំសិស្សកម្ពុជាទៅចូលរួមប្រកួតប្រជែងក្នុងកម្មវិធីលំដាប់អន្តរជាតិនានានៅបណ្តាប្រទេសផ្សេងៗទៀតនាឆ្នាំខាងមុខ៕
