កាលពីចុងសប្តាហ៍នេះ ក្រសួងអប់រំបានសម្ពោធដាក់​ឱ្យ​ប្រើប្រាស់ជាផ្លូវការនូវ​កម្មវិធីទូរស័ព្ទចំនួនពីរ ​​​​គឺកម្មវិធី MoEYS EdTech App និងកម្មវិធីបញ្ញាសិប្បនិម្មិតនៃកម្មវិធីថ្នាលបឋមសិក្សាសម្រាប់គ្រូបង្រៀន ដើម្បីជាប្រយោជន៍ដល់លោកគ្រូ អ្នកគ្រូ និងសិស្សានុសិស្សទាំងនៅកម្រិតបឋមសិក្សា និងមធ្យមសិក្សា ក្នុងការចាប់យកបច្ចេកវិទ្យាសម្រាប់បម្រើដល់ការរៀន និងការបង្រៀន ក្នុងបរិបទថ្មី ជាពិសេសការធ្វើសមាហរណកម្មបច្ចេកវិទ្យាអប់រំ និងបញ្ញាសិប្បនិម្មិតទៅក្នុងប្រព័ន្ធអប់រំ។

MoEYS EdTech App គឺជាកម្មវិធីទូរស័ព្ទដៃ ផ្តល់នូវធនធាន និងឧបករណ៍ អប់រំដ៏សម្បូរបែបដែលជួយដល់ ការស្វ័យសិក្សារបស់សិស្សានុសិស្សពីថ្នាក់ទី៧ ដល់ថ្នាក់ទី១២ ដោយប្រើបច្ចេកវិទ្យាទំនើប និងរួមទាំងមានការសម្រិតសម្រាំងតេស្តអនុវត្តសម្រាប់មុខវិជ្ជាសិក្សាទាំង១០ នៅកម្រិតមធ្យមសិក្សាចំណេះទូទៅ។ ចំណែកបញ្ញាសិប្បនិម្មិតនៃកម្មវិធីថ្នាលបឋម ជាផ្នែកមួយនៃថ្នាលបឋម សម្រាប់ជួយការបង្រៀន និងរៀននៅកម្រិតបឋមសិក្សា។

ឯកឧត្តមបណ្ឌិតសភាចារ្យ ហង់ជួន​​ ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ ក្រុមការងារគម្រោងកែលម្អការអប់រំចំណេះទូទៅ (GEIP) ក្រុមការងារបញ្ញាសិប្បនិម្មិតនៃកម្មវិធីថ្នាលបឋម និងភាគីពាក់ព័ន្ធទាំងអស់ ដែលបានផ្តួចផ្តើម អភិវឌ្ឍកម្មវិធីដ៏មានសារៈសំខាន់នេះឡើង។

ឯកឧត្តមរដ្ឋមន្រ្តីលើកឡើងថា នេះគឺជាជំហានថ្មីមួយក្នុងការផ្លាស់ប្ដូរទស្សនៈ ដែលថា ទាល់តែរៀនគួរ ទើបអាចរៀនបន្ថែមបាន ជាក់ស្តែងបច្ចុប្បន្ននេះ សិស្សអាចរៀនបន្ថែមដោយខ្លួនឯងនៅផ្ទះតាមរយៈកម្មវិធីទូរស័ព្ទថ្មីនេះ ហើយយើងនឹងបន្តចូលរួមសហការគ្នាបន្ថែមទៀតដើម្បីលើកទឹកចិត្ត និងជំរុញឱ្យមានការផ្លាស់ប្ដូរទម្លាប់ ពីការប្រើប្រាស់ទូរសព្ទដៃដើម្បីលេងហ្គេម ឬបណ្ដាញសង្គម មកជាប្រើប្រាស់ទូរស័ព្ទដៃដើម្បីរៀនបង្កើនចំណេះដឹង។

ដើម្បីឱ្យ​កម្មវិធីនេះ​កាន់តែប្រសើរថែមទៀត ឯកឧត្តមបណ្ឌិតសភាចារ្យបានស្នើឱ្យក្រុមការងារជំនាញថតជាវីដេអូបង្ហាញពីវិធីសាស្រ្តបង្រៀនថ្មីៗឱ្យសម្បូរបែរ ដោយបញ្ជាក់ថា ការរៀនដោយមើលវីដេអូ គឺមានភាពជាក់ស្ដែង និងងាយស្រួលយល់, ក្នុងនោះ​ក៏ឯកឧត្តមក៏ស្នើ​ឱ្យ​បន្តការចែករំលែកធនធានសិក្សាតាមរយៈប្រព័ន្ធឌីជីថល លើកកម្ពស់ការសិក្សារៀនសូត្រផ្នែកបច្ចេកវិទ្យា ដោយថា ការរៀនបែបថ្មី គឺការសិក្សាពិសោធន៍ ការស៊ើបអង្កេត វិភាគស៊ីជម្រៅ សិក្សាបែបគម្រោង។

លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ មានប្រសាសន៍ថា ការសម្ពោធដាក់ឱ្យប្រើប្រាស់ជាផ្លូវការកម្មវិធី MoEYS EdTech App និងបញ្ញាសិប្បនិម្មិតនេះ ពិតជាសំខាន់ ព្រោះក្រុមការងារមហាវិទ្យាល័យអប់រំ និងក្រុមការងារគម្រោងកែលម្អការអប់រំចំណេះទូទៅ សហការល្អជាមួយក្រសួង និងដៃគូ ដើម្បីប្រយោជន៍ទូទៅរបស់សិស្សកម្ពុជាទាំងអស់គ្នា។ ម្យ៉ាងវិញទៀត វាក៏ជាការល្អដែលគម្រោង BEIP និង GEIP បានផ្សាភ្ជាប់គ្នាលើចំណុចតែមួយ គឺការរៀន និងបង្រៀនតាមរយៈការប្រើបញ្ញាសប្បនិម្មិត ទោះក្នុងទម្រង់ផ្សេងគ្នាក៏ដោយ។

“គ្រប់កម្មវិធី គ្រប់គម្រោងដែលបានបង្កើតមកនេះ គឺបានគាំទ្រដល់គោលនយោបាយរបស់រាជរដ្ឋាភិបាល និងក្រសួងអប់រំ ដោយធ្វើយ៉ាងណាផ្តល់ឱកាសឱ្យដល់អ្នកដែលនៅឆ្ងាយពីធនធាន”

ព្រឹទ្ធបុរសមហាវិទ្យាល័យអប់រំ រំពឹងថា ការបង្រៀន និងរៀន នឹងចាប់ផ្តើមប្រែរូបរាង ទៅជាជឿនលឿនជាងមុន សំបូរបែបជាងមុន និងទំនើបជាងមុន។ សិស្សនឹងកាន់តែឆ្លាតវៃ ហើយទាន់សម័យ។ ទន្ទឹមគ្នានេះ គ្រូនឹងកាន់តែពេញដោយសមត្ថភាពក្នុងការសម្របសម្រួលដើម្បីឱ្យសិស្សរៀនកាន់តែប្រសើរឡើង លឿន តែជៀសវាងបាននូវអ្វីដែលរដ្ឋមន្ត្រីក្រសួងអប់រំ បានហៅថា AI Hallucination ឬការរវើរវាយដោយសារបញ្ញាសិប្បនិម្មិត។

គួរ​ជំរាបជូនដែរថា “បញ្ញាបឋម” គឺជាប្រព័ន្ធបញ្ញាសិប្បនិម្មិតផ្នែកអប់រំដំបូងគេបង្អស់របស់កម្ពុជា ដែលបង្កើតឡើងដើម្បីគាំទ្រទាំងសិស្សានុសិស្ស និងគ្រូបង្រៀន ដែលជួយគ្រូបង្រៀនមុខវិជ្ជា គណិតវិទ្យាប្រកបដោយភាពឆ្លាតវៃ ដោយផ្តល់ជំនួយភ្លាមៗដល់គ្រូបង្រៀននិងសិស្ស តាមរយៈការពន្យល់ជាជំហានៗ ការបង្កើតកិច្ចតែងការបង្រៀន និងការបង្កើតសន្លឹកកិច្ចការបន្ថែមសម្រាប់សិស្សហ្វឹកហាត់ ដែលសម្របតាមល្បឿននៃការសិក្សារបស់សិស្សម្នាក់ៗ។

ប្រព័ន្ធនេះបង្កើតបាននូវបរិយាកាសសិក្សាប្រកបដោយអន្តរកម្ម និងសុវត្ថិភាព ដែលអាចឱ្យមានការប្រាស្រ័យទាក់ទងដោយប្រើសំឡេងទៅជាអក្សរ មានសំណួរណែនាំ និងមានការការពារឯកជនភាពយ៉ាងរឹងមាំ ដើម្បីធានានូវបរិយាកាសដ៏មានសុវត្ថិភាពសម្រាប់កុមារ។ “បញ្ញាបឋម” ជួយកាត់បន្ថយគម្លាតផ្នែកអប់រំរវាងតំបន់ទីប្រជុំជន និងជនបទ ធានាឱ្យមានលទ្ធភាពទទួលបានការអប់រំប្រកបដោយគុណភាពប្រកបដោយសមធម៌ និងផ្តល់នូវស្តង់ដាជាតិដែលមានភាពស៊ីសង្វាក់គ្នា៕