ភាពជាអ្នកដឹកនាំពិតជាសំខាន់ សម្រាប់មនុស្សគ្រប់គ្នាក្នុងការដឹកនាំខ្លួនឯង ដឹកនាំក្រុមការងារ និងស្ថាប័ន ឪ្យមានផលិតភាពការងារកាន់តែខ្ពស់ និងសម្រេចបាននូវភាពជោគជ័យកាន់តែប្រសើរឡើង។ ដោយមើលឃើញអំពីសារៈសំខាន់នៃភាពជាអ្នកដឹកនាំនេះ ទើបវិទ្យាស្ថានមគ្គុទ្ទេសក៍នៃសាកលវិទ្យាល័យបញ្ញាកម្ពុជា បានធ្វើកិច្ចសហប្រតិបត្តិការជាមួយនឹង “The John Maxwell Leadership Certified Team” ​ បង្កើតឪ្យមានកម្មវិធី «មគ្គុទេ្ទសក៍សម្រាប់អ្នកដឹកនាំវ័យក្មេង» (Young Generation Leaders) រដូវកាលទី៣ ដែលគ្រោងប្រព្រឹត្តទៅនៅចុងខែកញ្ញានេះ។

លោក ស៊ិន សុវណ្ណារ៉ុង អ្នកគ្រប់គ្រង​ផ្នែកបណ្តុះបណ្តាល នៃវិទ្យាស្ថានមគ្គុទ្ទេសក៍ សាកលវិទ្យាល័យ​បញ្ញាសាស្រ្ត​កម្ពុជា មានប្រសាសន៍ថា កម្មវិធីនេះបង្កើតឡើងក្នុងគោលបំណងដើម្បីចូលរួមចំណែកក្នុងការបណ្ដុះបណ្ដាលទៅកាន់យុវជន មិត្តនិស្សិតនិងអ្នកដឹកនាំវ័យក្មេងនៅក្នុងប្រទេសកម្ពុជា ដោយផ្ដោតលើប្រធានបទសំខាន់ៗបីដូចជា៖ សិល្បៈនៃការដឹកនាំខ្លួនឯងឲ្យមានប្រសិទ្ធភាព, សិល្បៈនៃការដឹកនាំក្រុមឲ្យមានប្រសិទ្ធភាព និង សិល្បៈនៃការដឹកនាំស្ថាប័នឲ្យមានប្រសិទ្ធភាព។

លើសពីនេះទៅទៀតយើងទាំងអស់គ្នានឹងបានជួបជាមួយនឹងវាគ្មិនកិត្តិយសពិសេសៗ ដែលពោរពេញទៅដោយសមត្ថភាព ជំនាញ និងភាពជាអ្នកដឹកនាំ នៅក្នុងកម្មវិធីផ្ទាល់ ដូចជា អ្នកស្រី នុត ក្លារ៉ា នាយកប្រតិបត្តិនៃក្រុមហ៊ុន Apsara Media Services ដែលនឹងបកស្រាយទៅលើប្រធានបទ៖ សិល្បៈនៃការដឹកនាំខ្លួនឯងឲ្យមានប្រសិទ្ធភាព, លោកបណ្ឌិត ង៉ែត សុខឡា អគ្គនាយកនៃវិទ្យាស្ថានមគ្គុទ្ទេសក៍ សាកលវិទ្យាល័យបញ្ញាសាស្ត្រកម្ពុជា ដែលនឹងបកស្រាយទៅលើប្រធានបទ៖ សិល្បៈនៃការដឹកនាំក្រុមឲ្យមានប្រសិទ្ធភាព, លោក សំ កុសល អគ្គនាយក នៃក្រុមហ៊ុន Baksey Media ដែលនឹងបកស្រាយទៅប្រធានបទ៖សិល្បៈនៃការដឹកនាំស្ថាប័នឲ្យមានប្រសិទ្ធភាព។

ជាមួយគ្នានេះ ក៏​មានការចូលរួមពីវាគ្មិនកិត្តិយស ដូចជាលោកតា បណ្ឌិត កុល ផេង បិតាស្ថាបនិក និងជាប្រធាននៃសាកលវិទ្យាល័យបញ្ញាសាស្ត្រកម្ពុជា, ឯកឧត្តម វ៉េង​ សិរីវុឌ្ឍ ប្រធានក្រុមប្រឹក្សាភិបាល នៃសាកលវិទ្យាល័យបញ្ញាសាស្ត្រកម្ពុជា និងជាអ្នកនិពន្ធសៀវភៅ “គ្មាននរណាកើតមកក្រទេ”, លោក Mark Hemingway Executive Director of The John Maxwell Certified Team ជាដើម។

ក្រៅតែពីការចូលរួមបកស្រាយរបស់វាគ្មិន នៅក្នុងកម្មវិធីនោះ​ក៏​មានសកម្មភាពជាច្រើន​ទៀតដូចជា ការចែករំលែកពីវាគ្មិនខាងលើទៅលើប្រធាននីមួយៗ, ការពិភាក្សាតុមូលទៅលើប្រធានបទចម្បង, ការសួរ ឆ្លើយពីសំណាក់អ្នកចូលរួម និងវាគ្មិនកិត្តិយស, ការសម្ដែងសិល្បៈផ្សេងៗ, ការដាក់បង្ហាញស្ដង់មួយចំនួនរបស់ដៃគូសហការ និងដៃគូឧបត្តម្ភ ព្រមទាំងមានការផ្តល់ជូនវត្ថុអនុស្សាវរីយ៍ជាច្រើនផងដែរ។

បើតាមលោក ស៊ិន សុវណ្ណារ៉ុង កម្មវិធីសិក្ខាសាលានេះ នឹងប្រព្រឹត្តទៅនៅថ្ងៃអាទិត្យ ទី២៤ ខែកញ្ញា ឆ្នាំ​២០២៣ ចាប់ពីវេលាម៉ោង១ ដល់​ម៉ោង៥រសៀល នៅ​មជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) ហើយអ្នកដែលអាច​ចូលរួមបាន អាចជាបុគ្គលិកគ្រប់ជាន់ថ្នាក់នៅតាមស្ថាប័ននានា ជាពិសេសសម្រាប់បងប្អូនសិស្សនិស្សិត និងយុវជនទូទៅ។ សម្រាប់ការចុះឈ្មោះចូលរួម សូម​ចូលទៅតាមរយៈតំណរភា្ជប់នេះ ៖ https://bit.ly/45i2EWT ៕