លើកឡើង​នៅ​ក្នុង​កិច្ច​ពិភាក្សា នៃសហគមន៍​អ្នក​បច្ចេកទេស​បញ្ញាសិប្បនិម្មិត កាលពីសប្តាហ៍​កន្លងទៅនេះ ឯកឧត្តម ហាក់ សុខហេង អនុរដ្ឋលេខាធិការ ក្រសួងប្រៃសណីយ៍ និង​ទូរគមនាគមន៍ បានលើកឡើងថា ប្រទេស​កម្ពុជា​ត្រូវ​តែមាន​បច្ចេកវិទ្យាបញ្ញាសិប្បនិម្មិតដោយ​ខ្លួន​ឯកឱ្យ​បានច្រើន មិនថា ជា Website ឬ App នោះឡើយ ដើម្បី​រក្សា​បាន​នូវ​សុវត្ថិភាពអ្នកប្រើប្រាស់ជាពលរដ្ឋ​កម្ពុជា ក៏​ដូចជា​ទិន្នន័យនានា។

បើតាមឯកឧត្តម ហាក់ សុខហេង នៅពេល​ប្រជាពលរដ្ឋ​កម្ពុជា​នាំគ្នា​ប្រើប្រាស់​កម្មវិធី​ដែល​បង្កើត​ឡើង​ដោយ​កូនខ្មែរ នោះទិន្នន័យ​ដែលប្រើប្រាស់​នឹង​រក្សា​នៅ​ក្នុងកម្មវិធីរបស់ខ្មែរ តែបើសិនជា​ប្រើប្រាស់​កម្មវិធីរបស់បរទេស នោះទិន្នន័យនឹង​ត្រូវរក្សសា​ទុក​ដោយ​បរទេស ដែលវា​គឺជាការខាតបង់មួយ។

មន្រ្តីជាន់ខ្ពស់​ក្រសួងប្រៃសណីយ៍ និង​ទូរគមនាគមន៍​រូបនេះ ក៏​បានឱ្យដឹងដែរថា បច្ចុប្បន្ន​ក្រសួងកំពុង​សិក្សា​ទៅលើ​បច្ចេកទេស នៃបច្ចេកវិទ្យា​បញ្ញាសិប្បនិម្មិត ឬហៅថា AI នៅ​ក្នុងវិស័យ​ចំនួន៣ រួមមាន នៅ​ក្នុងវិស័យអប់រំ វិស័យ​កសិកម្ម និង​នៅ​ក្នុង​វិស័យ​សុខាភិបាល។

ក្នុងឱកាសនោះដែរ ​លោក ឡាយ អជដេត អ្នក​ជំនាញជាន់ខ្ពស់​បញ្ញាសិប្បនិម្មិត នៃក្រសួងក្រសួងប្រៃសណីយ៍ និង​ទូរគមនាគមន៍ ក៏​បានបង្ហាញពីកម្មវិធី TranslateKH ដែលជាកម្មវិធីបកប្រែភាសាដំបូងគេ បង្កើតឡើងដោយក្រុមអ្នកជំនាញបញ្ញាសិប្បនិម្មិត ក.ប.ទ ដែលអាចបកប្រែពីភាសាខ្មែរ ទៅភាសាអង់គ្លេស និងបកពីភាសាអង់គ្លេស ទៅភាសាខ្មែរ សម្រាប់ឃ្លាទូទៅ។ TranslateKH ត្រូវបានអភិវឌ្ឍឡើងដោយប្រើប្រាស់បច្ចេកវិទ្យាបញ្ញាសិប្បនិម្មិត AI និងបច្ចេកវិទ្យាសិក្សាស៊ីជម្រៅ ឬ Deep Learning ដោយប្រើប្រាស់ទិន្នន័យ១៥លានប្រយោគគូ (ខ្មែរ-អង់គ្លេស) ហើយបច្ចុប្បន្ន Translate KH ជំនាន់ទី១ បានដាក់ដំណើរការលើ Website និង Telegram (bot) កាលពីថ្ងៃទី២៨ ខែវិច្ឆិកា ឆ្នាំ២០២៤ ហើយនៅពេលអនាគត TranslateKH នឹងបន្តអភិវឌ្ឍឱ្យក្លាយអាចបកប្រែទិន្ន័យ ដោយ អត្ថបទសរសេរ រូបភាព និងសម្លេង ពីភាសាខ្មែរ ទៅជាភាសាផ្សេងៗទៀត។

ក្រៅពី TraslateKH ក្រុមអ្នកជំនាញបញ្ញាសិប្បនិម្មិត ក.ប.ទ ក៏មានគម្រោងបង្កើត បច្ចេកវិទ្យាបញ្ញាសិប្បនិម្មិត (AI) នៅក្នុងវិស័យអប់រំ ដោយបង្កើត App ដែលអាចបកប្រែភាសាខ្មែរ ទៅជាអក្សរប្រៃយ៍ តាមរយៈការបំម្លែងសម្លេង​ ឬអក្សរខ្មែរ ដោយ​កម្មវិធីនោះមានឈ្មោះថា Khmer Braille Machine Translation។ លើសពីនេះ នៅក្នុងវិស័យសុខាភិបាល ក្រុមអ្នកជំនាញកំពុងសិក្សាអំពីការវាយតម្លៃស្ថានភាពជំងឺ ដើម្បីមើលស្ថានភាពជំងឺនឹងអាចទទួលថ្នាំបានលឿនជាងការធ្វើវិនិច្ឆ័យរបៀបចាស់៕