ភ្នំពេញ – នៅថ្ងៃទី០២ ខែមីនា អង្គការទស្សនៈពិភពលោកអន្តរជាតិ ប្រចាំនៅកម្ពុជា បានដាក់ចេញនូវយុទ្ធសាស្រ្តរយៈពេល ៥ឆ្នាំ (២០២៣~២០២៧) ផ្តោតលើការផ្តល់ផលវិជ្ជមានដល់កុមារី និងកុមារា ៥លាននាក់ ជាពិសេសកុមារងាយរងគ្រោះបំផុត ។ យុទ្ធសាស្រ្ត ៥ឆ្នាំ របស់អង្គការទស្សនៈពិភពលោកអន្តរជាតិប្រចាំនៅកម្ពុជា ដើរស្របជាមួយនឹងយុទ្ធសាស្រ្តចតុកោណ និងគោលនយោបាយតាមវិស័យរបស់រាជរដ្ឋាភិបាលកម្ពុជា គោលដៅអភិវឌ្ឍន៍ប្រកបដោយចីរភាព ស្របតាមអាទិភាពផ្សេងៗរបស់ដៃគូអភិវឌ្ឍន៍ សម្រាប់ប្រទេសកម្ពុជា និងការសន្យារបស់អង្គការទស្សនៈពិភពលោក សម្រាប់កុមារងាយរងគ្រោះបំផុត ។

លោក ជេនេម៉ានូអែល ហ្គីនទីញ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជា បានមានប្រសាសន៍ថា ដើម្បីសម្រេចបានគោលដៅយុទ្ធសាស្រ្តនេះ អង្គការទស្សនៈពិភពលោក អនុវត្តកម្មវិធីសំខាន់ៗចំនួនបី រួមមាន កម្មវិធីអាហារូបត្ថម្ភ ទឹកស្អាត អនាម័យ និងការរស់នៅ, កម្មវិធីការពារ និងការចូលរួមរបស់កុមារ, និងកម្មវិធីអប់រំប្រកបដោយបរិយាបន្ន និងគុណភាព ។

ទន្ទឹមគ្នានេះ កិច្ចការអន្តរវិស័យមួយចំនួនដូចជា ការកាត់បន្ថយហានិភ័យគ្រោះមហន្តរាយ និងភាពធន់នឹងអាកាសធាតុ, សមភាពយេនឌ័រ ពិការភាព និងបរិយាបន្នសង្គម, ការជះឥទ្ធិពលលើគោលនយោបាយ និងពង្រឹងប្រព័ន្ធផ្តល់សេវា, ការអនុវត្តក្របខណ្ឌគណនេយ្យភាពសង្គម និងការចូលរួមរបស់កុមារ និងយុវជន ហើយបញ្ហាទាំងនេះ ក៏នឹងត្រូវបានយកចិត្តទុកដាក់ ដោយបញ្ច្រៀបចូលទៅក្នុងកម្មវិធីសំខាន់ៗទាំងបីខាងលើ ។

លោក ជេនេម៉ានូអែល ហ្គីនទីញ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជា បានបញ្ជាក់បន្ថែមថា ៖

“ការអនុវត្តគោលដៅអភិវឌ្ឍន៍ប្រកបដោយចីរភាពនៅកម្ពុជាកំពុងរីកចម្រើន រួមទាំងគោលដៅទាក់ទងនឹងការអភិវឌ្ឍកុមារ ។ កិច្ចការងារឆ្លើយតប និងកិច្ចខិតខំប្រឹងប្រែងស្តារឡើងវិញពីវិបត្តិនៃជំងឺកូវីដ-១៩ ក៏ដូចគ្នាដែរ”

ទន្ទឹមគ្នានេះដែរ លោក ជេនេម៉ានូអែល ហ្គីនទីញ បានឱ្យដឹងទៀតថា យុទ្ធសាស្ត្ររបស់អង្គការទស្សនៈពិភពលោកអន្តរជាតិ ប្រចាំនៅកម្ពុជា ត្រូវបានរៀបចំឡើងផ្អែកលើកម្រងកិច្ចពិគ្រោះយោបល់ជាមួយអ្នកពាក់ព័ន្ធ រួមមាន កុមារ យុវជន ឪពុកម្ដាយ អ្នកដឹកនាំសហគមន៍ គ្រូបង្រៀន បុគ្គលិកសុខាភិបាល រាជរដ្ឋាភិបាលកម្ពុជា នៅថ្នាក់ជាតិ ថ្នាក់ខេត្ត និងថ្នាក់មូលដ្ឋាន ដៃគូអភិវឌ្ឍ និងភាគីពាក់ព័ន្ធដទៃទៀត ។

គោលបំណងនៃគោលដៅយុទ្ធសាស្ត្ររបស់អង្គការទស្សនៈពិភពលោក (២០២៣~២០២៧) គឺដើម្បីសម្រេចបាននូវសុខុមាលភាពប្រកបដោយចីរភាព សម្រាប់កុមារី និងកុមារា ចំនួន ៥លាននាក់ ជាពិសេសកុមារងាយរងគ្រោះបំផុត។ យុទ្ធសាស្រ្តនេះ មានគោលដៅផ្តល់ផលវិជ្ជមាន ដោយផ្ទាល់ និងប្រយោល ដល់កុមារចំនួន ៨៥% នៃចំនួនកុមារកម្ពុជា (ប្រទេសកម្ពុជាមានប្រជាជនសរុប ១៥,៥ លាននាក់ ក្នុងនោះ ៥,៧ លាននាក់ ឬ ៣៦,៧% ជាកុមារដែលមានអាយុពី 0-១៨ ឆ្នាំ) ។

ដើម្បីឈានទៅសម្រេចឱ្យបានដូចការគ្រោងទុកនេះ នាយកប្រចាំប្រទេសអង្គការទស្សនៈពិភពលោកអន្តរជាតិ ប្រចាំនៅកម្ពុជាបានបន្ថែមថា អង្គការទស្សនៈពិភពលោក មានផែនការពង្រីកវិសាលភាពភូមិសាស្រ្តកម្មវិធីបន្ថែមទៀត ពោលគឺ ចាប់ពីចំនួន ១៤ខេត្តនៅក្នុងយុទ្ធសាស្រ្តកន្លងមក (២០១៨~២០២២) រហូតដល់ចំនួន ២៣ខេត្ត ដោយរំពឹងថា អង្គការទស្សនៈពិភពលោក អាចបន្ថែមគុណតម្លៃសម្រាប់កម្មវិធីអភិវឌ្ឍន៍ដែលមានស្រាប់ តួយ៉ាង កម្មវិធីមនុស្សធម៌ និងកម្មវិធីកៀរគរស្វែងរកមតិគាំទ្រ របស់រដ្ឋាភិបាលថ្នាក់មូលដ្ឋាន និងដៃគូនានា ។

ឯកឧត្តម ហ៊ាង ស៊ីណេ អនុរដ្ឋលេខាធិការក្រសួងអប់រំ យុវជន និងកីឡា បានកោតសរសើរចំពោះការរួមចំណែករបស់អង្គការទស្សនៈពិភពលោក ក្នុងវិស័យអប់រំនៅកម្ពុជា រួមទាំងការចូលរួមដោះស្រាយបញ្ហាប្រឈមនានាអំឡុងពេលនៃការរាតត្បាតជំងឺកូវីដ-១៩ ។ ឯកឧត្តមបានបន្ថែមថា ក្រសួងអប់រំនឹងបន្តកិច្ចសហការជាមួយអង្គការទស្សនៈពិភពលោក និងដៃគូអភិវឌ្ឍន៍ទាំងអស់ ដើម្បីសម្រេចឱ្យបាននូវផែនទីបង្ហាញផ្លូវ ការអប់រំកម្ពុជា ឆ្នាំ២០៣០ ព្រមទាំងគោលដៅយុទ្ធសាស្រ្តសម្រាប់ការទទួលបានការអប់រំប្រកបដោយគុណភាព សមធម៌ និងបរិយាបន្ន សម្រាប់ការអប់រំកម្រិតមូលដ្ឋានឈានទៅលើកកម្ពស់ការសិក្សាពេញមួយជីវិតសម្រាប់ទាំងអស់គ្នា ។

ឯកអគ្គរាជទូតអូស្ត្រាលីប្រចាំកម្ពុជា លោក ចាស្ទីន វ៉ាយអេត បានអបអរសាទរអង្គការទស្សនៈពិភពលោកចំពោះយុទ្ធសាស្ត្រថ្មីនេះ ។ លោកឯកអគ្គរាជទូត វ៉ាយអេត បានមានប្រសាសន៍ទៀតថា ៖

“ប្រទេសអូស្ត្រាលី និងអង្គការទស្សនៈពិភពលោកអន្តរជាតិ ប្រចាំនៅកម្ពុជា គឺជាដៃគូនឹងគ្នាតាំងពីចុងទសវត្សរ៍ឆ្នាំ ១៩៩០ ។ យើងមានសេចក្តីសោមនស្សក្នុងការបន្តក្នុងភាពជាដៃគូ និងបន្តគាំទ្រសកម្មភាពតាមរយៈគម្រោងពង្រីកសេវាកសិកម្ម សិទ្ធិលក់ដូរខ្នាតតូច ចាប់ពីឆ្នាំ២០១៥ ដល់ឆ្នាំ ២០២២ ដែលគម្រោងបានផ្តល់ចំណេះដឹងដល់កសិករលើបច្ចេកទេសទំនើបផ្នែកកសិកម្ម និងការផ្សារភ្ជាប់ទីផ្សារផលិតផលកសិកម្ម”

លោក ចាស្ទីន វ៉ាយអេត ឯកអគ្គរាជទូតអូស្ត្រាលីប្រចាំកម្ពុជា បានបន្តឱ្យដឹងថា បច្ចុប្បន្នប្រទេសអូស្ត្រាលី និងអង្គការទស្សនៈពិភពលោក ក៏កំពុងធ្វើការរួមគ្នាលើគម្រោងមួយ គឺគម្រោងផ្សារភ្ជាប់ប្រជាពលរដ្ឋ ដើម្បីពង្រឹងការផ្តល់សេវាសាធារណៈឱ្យប្រសើរឡើង តាមរយៈកិច្ចការងារគណនេយ្យភាពសង្គម ។

គួរបញ្ជាក់ថា អង្គការទស្សនៈពិភពលោក ចាប់ផ្តើមបេសកកម្មនៅក្នុងប្រទេសកម្ពុជា នៅក្នុងឆ្នាំ ១៩៧០ ។ ដោយធ្វើការងារជិតស្និទ្ធជាមួយក្រសួងនានា ដៃគូមូលដ្ឋាន និងក្រុមសហគមន៍ ដោយសហការជាមួយសហគមន៍ក្នុងការធ្វើឱ្យប្រសើរឡើងនូវជីវិតរបស់កុមារកម្ពុជា ជាពិសេសកុមារងាយរងគ្រោះបំផុត តាមរយៈកម្មវិធីសំខាន់ៗបី គឺអាហារូបត្ថម្ភ ការអប់រំ និងការការពារ និងការចូលរួមរបស់កុមារ ៕