ក្នុងពិធីបើកសិក្ខាសាលាស្ដីពីការបណ្តុះបណ្តាលផ្នត់គំនិតស្ថាបត្យកម្ម គំនិតផ្តួចផ្តើមសាលារៀនកម្ពុជា នៅទីស្ដីការក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី១៣ ខែវិច្ឆិកា ឆ្នាំ២០២៥ ឯកឧត្តម ហង្ស សុតសំភារ រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ (ដ.ន.ស) បានលើកឡើងពីទស្សនទាន៣សំខាន់ៗ ដើម្បីលើកកម្ពស់ស្ថាបត្យកម្មកម្ពុជា។

ឯកឧត្តម ហង្ស សុតសំភារ មានប្រសាសន៍ថា សិក្ខាសាលា ស្ដីពីការបណ្តុះបណ្តាលផ្នត់គំនិតស្ថាបត្យកម្ម គំនិតផ្តួចផ្តើមសាលារៀនកម្ពុជា និងការសម្ពោធកម្មវិធីស្ថាបត្យកម្មខ្មែរ រយៈពេលពេញមួយថ្ងៃនេះ បានផ្ដល់អត្ថប្រយោជន៍យ៉ាងច្រើន និងជាឱកាសជូននិស្សិតស្ថាបត្យករ នគរូបនីយករ វិស្វករ ក៏ដូចជាសាស្រ្តាចារ្យ ចូលរួមចំណែកជួយដល់វិស័យរៀបចំដែនដី នគរូបនីយកម្ម និងសំណង់ ជាពិសេសចូលរួមកែលម្អសោភ័ណភាពសាលារៀន ការរៀបចំលំហសាធារណៈ ស្របតាមគោលនយោបាយស្ថាបត្យកម្មខ្មែរសហសម័យ។

ជាការចូលរួមលើក​កម្ពស់ស្ថាបត្យកម្ម​កម្ពុជា ឯកឧត្តមរដ្ឋលេខាធិការ បានបង្ហាញ​នូវ​ទស្សនទានសំខាន់ទាំង៣រួមមាន មុំទី១.ការគិត មុំទី២.ការគូរ និង មុំទី៣.ការអនុវត្ត។ ឯកឧត្តម ហង្ស សុតសំភារ ពន្យល់ថា មុំទាំង៣នេះ មានន័យថា ការគិត គឺមេ ដែលជាអ្នកដឹកនាំ ជាអ្នកផ្ដល់យុទ្ធសាស្ត្រ។ ការគូរ គឺជាអ្នកជំនាញ ដោយ​ឡែកការអនុវត្ត គឺជាអ្នកធ្វើ ជាអ្នកត្រូវសម្រេចលទ្ធផល។

“យើងទាំងអស់គ្នាគឺជាអ្នកធ្វើ ដូច្នេះ យើងត្រូវចាប់ផ្ដើមគិត ចាប់ផ្ដើមគូរ ចាប់ផ្ដើមធ្វើទាំងអស់គ្នា”។

ឯកឧត្តម ហង្ស សុតសំភារ រំពឹងថា ប្រធានបទសំខាន់ៗដែលវាគ្មិនបានធ្វើបទបង្ហាញ នឹងបានជាធាតុចូលដ៏សំខាន់សម្រាប់បំពេញបន្ថែមនូវអ្វីដែលសិស្សនិស្សិត ក៏​ដូចជា​ស្ថាបត្យករមាន។

សិក្ខាសាលាស្ដីពីការបណ្តុះបណ្តាលផ្នត់គំនិតស្ថាបត្យកម្ម គំនិតផ្តួចផ្តើមសាលារៀនកម្ពុជា មានគោលបំណងផ្សព្វផ្សាយអំពីគោលគំនិត នៃដំណើរស្ថាបត្យកម្មខ្មែរ ការរៀបចំពិព័រណ៌រូបភាពស្ថាបត្យកម្ម និងផ្សព្វផ្សាយពីគម្រោងគំនិតផ្តួចផ្តើមសាលារៀនកម្ពុជា ដែលផ្តោតសំខាន់លើការរៀបចំកែលម្អសោភណភាព មុខងារអគារ និងលំហបៃតងនៅតាមសាលារៀន។ សិក្ខាសាលានេះ បានប្រមូលផ្តុំថ្នាក់ដឹកនាំសាលា​រៀនចំនួន ២៥២សាលារៀន​នៅទូទាំង​រាជធានីភ្នំពេញ ក៏​ដូចជា​និស្សិត​មក​ពី​សាកលវិទ្យាល័យ​ចំនួន៨ ដែលមាន​បណ្តុះបណ្តាលជំនាញស្ថាបត្យកម្ម សរុប​ចំនួនជាង ១៤០០នាក់៕