ការ​គិត​ច្រើន អាចជារឿងធម្មតាបើមានក្នុងរយៈពេលខ្លី តែពេលខ្លះបណ្តាលមកពីជំងឺធ្លាក់ទឹកចិត្ត ការថប់បារម្ភ និងបញ្ហាសុខភាពផ្លូវចិត្តផ្សេងទៀត។ ការគិតហួសហេតុនេះ ចែក​ជា​ពីរប្រភេទ គឺការគិតអំពីអតីតកាល និងការខ្វល់ខ្វាយអំពីអនាគត។

អ្នកស្រី គីម ស៊ីដដាវីស គ្រូកម្រិតឧត្តមសិក្សានៅសាកលវិទ្យាល័យភូមិន្ទភ្នំពេញ និងជាអ្នកបង្កើតវីដេអូអប់រំ បានបង្ហាញគន្លឹះ ៦​ចំណុចក្នុងការ​អនុវត្ត ប្រសិនបើមិនចង់ក្លាយជាមនុស្សគិតច្រើន៖

១- កាត់បន្ថយភាពច្របូកច្របល់ដែលកើតមានក្នុងជីវិត ៖ គិតច្រើនដោយសារតែអ្នកយករឿងគ្រប់យ៉ាងមកឱបក្រសោប ដូច្នេះកុំបណ្តោយខ្លួនឱ្យជាប់ក្នុងរឿងដែលមិនចាំបាច់។ បើអ្នកយកមកឱបក្រសោបទាំងអស់វានឹងធ្វើឱ្យអ្នកច្របូកច្របល់ ហើយភាពច្របូកច្របល់នោះមិនត្រឹមតែធ្វើឱ្យអ្នកគិតច្រើនទេ តែវាកាត់បន្ថយថាមពលរបស់អ្នកដោយមិនដឹងខ្លួនទៀតផង។

២- ភាពល្អឥតខ្ចោះមិនមានទេ ៖ គិតច្រើនដោយសារតែអ្នកចង់បានលទ្ធផលល្អពេក ដូច្នេះបញ្ឈប់​ការ​កំណត់​គោលដៅ​​ណា​មួយ​ដែលល្អ​ឥត​​ខ្ចោះ​ពេក ព្រោះ​វា​ជា​អន្ទាក់​ដែល​បង្កើត​​នូវ​ការ​​ថប់​បារម្ភ ការខកចិត្ត និងការគិតច្រើន អញ្ចឹងយកល្អ អ្នកគ្រាន់តែធ្វើវាឱ្យអស់ពីសមត្ថភាពតាមរបៀបរបស់អ្នកទៅបានហើយ ហើយទទួលស្គាល់កំហុសបើសិនជាវាកើតមាន រួចយកវាទៅធ្វើការកែប្រែសម្រាប់លើកក្រោយគឺគ្រប់គ្រាន់។

៣- រស់នៅក្នុងបច្ចុប្បន្នឱ្យបានពេញលេញ ៖ កុំគិតច្រើនដោយសារតែរឿងដែលកន្លងហួស និងរឿងដែលមិនទាន់កើតឡើងពេក។ កុំ​ខ្វល់ខ្វាយ​ពី​អតីតកាល​ ឬ​អនាគត​ពេក​អី តែ​គួរ​​ផ្ដោត​​លើ​បច្ចុប្បន្នកាលវិញ ព្រោះការផ្ដោតលើបច្ចុប្បន្នកាលជួយអ្នកឱ្យដឹងគុណចំពោះអ្វីដែលអ្នកកំពុងតែមាន ហើយ​មែនទែន​​ទៅ​ការ​គិត​ពី​អ្វី​ដែល​នៅ​ជុំវិញ​ខ្លួន​អ្នក​នឹងធ្វើឱ្យអ្នកទទួលបាននូវសុភមង្គល​ពិតៗ។

៤- ឈប់ប្រៀបធៀបខ្លួនឯងជាមួយអ្នកដទៃ ៖ គិតច្រើនដោយសារតែអ្នកឆ្ងល់ថា ហេតុអ្វីបានជាជីវិតអ្នកមិនដូចគេ តែតាមពិតទៅមនុស្សគ្រប់រូបមានផ្លូវ និងចង្វាក់ផ្ទាល់ខ្លួនក្នុងជីវិតរៀងៗខ្លួន ដូច្នេះកុំប្រៀបធៀបអី ព្រោះការប្រៀបធៀបនឹងធ្វើឱ្យអ្នកបាត់បង់នូវទំនុកចិត្ត។ ចូរដើរតាមផ្លូវដែលជារបស់អ្នក ហើយមានមោទនភាពចំពោះអ្វីដែលជាការខិតខំគឺគ្រប់គ្រាន់។

៥- ការរិះគន់របស់អ្នកដទៃ មិនមែនជាកំហុសរបស់អ្នក ៖ កុំយកសម្ដី​អ្នកដទៃ​មក​វិភាគ​ច្រើន​ហួសហេតុពេក ចូរស្តាប់ការរិះគន់ដើម្បីយកទៅកែលម្អខ្លួនឯង ប៉ុន្តែ​កុំ​ធ្វើឱ្យវាក្លាយទៅជា​សម្ពាធ​រហូតដល់បាក់ទឹកចិត្ត ដូច្នេះរឿងសំខាន់គឺត្រូវទទួលយកខ្លួនឯង ហើយជឿជាក់លើតម្លៃដែលខ្លួនឯងមាន។

៦- គ្រប់យ៉ាងគ្មានអ្វីទៀងទាត់ ៖ គិតច្រើនដោយសារតែគ្រប់យ៉ាងវាមិនដូចមុន តែមែនទែនទៅលើលោកនេះគ្មានអ្វី​ស្ថិតស្ថេរ​ទេ ហើយអ្នកត្រូវដឹងថា គ្មាននរណាម្នាក់ផ្តល់ចម្លើយចំពោះអ្វីគ្រប់យ៉ាងនៅក្នុងជីវិតនោះឡើយ ចូរ​អនុញ្ញាត​ឱ្យខ្លួនឯងទទួលយកភាពមិនច្បាស់លាស់ដែលកើតមាននៅក្នុងជីវិត ហើយប្រើវាជាឱកាសសម្រាប់ការរីកចម្រើន ទោះបីជាអ្នកស្ថិតនៅក្នុងថ្ងៃដ៏ងងឹតបំផុតក៏ដោយ សូមឱ្យអ្នកចាំថា គ្រប់យ៉ាងគ្មានអ្វីទៀងទាត់ទេ ហើយភាពងងឹតនោះនឹងធ្វើឱ្យអ្នកកាន់តែរឹងមាំ៕