ក្រសួងការងារ និង​បណ្តុះបណ្តាលវិជ្ជាជីវៈ និងអង្គការ​យូណេស្កូ បានបញ្ជាក់ជាថ្មី​នូវ​ការ​ប្តេជ្ញា​ពង្រឹងភាពជាដៃគូយុទ្ធសាស្រ្ត ដើម្បី​កសាងកម្លាំងពលកម្ម​ឱ្យ​មានជំនាញ និងផលិតភាព​ខ្ពស់ សម្រាប់សេដ្ឋកិច្ច​នាពេលអនាគត ដោយផ្តោត​លើការ​ផ្លាស់ប្តូរ​ជំនាញឌីជីថលទៅ​ក្នុង​ការ​បណ្តុះបណ្តាល​ជំនាញបច្ចេកទេស និង​វិជ្ជាជីវៈ (TVET)។

ការបញ្ជាក់ពីការប្តេជ្ញាពង្រឹងភាពជាដៃគូនេះ បានធ្វើ​ឡើង​ក្នុង​ជំនួប រវាង ឯកឧត្តម ហេង សួរ រដ្ឋមន្រ្តីក្រសួង​ការងារ និង​បណ្តុះបណ្តាលវិជ្ជាជីវៈ ជាមួយ ឯកឧត្តម Flavio Bonetti តំណាង​អង្គការ​យូណេស្កូ (UNESCO) ថ្មីប្រចាំ​កម្ពុជា កាលពីរសៀលថ្ងៃអង្គារ (២៧ មករា)។

ក្នុងជំនួបនោះ ឯកឧត្តម ហេង សួរ បានវាយតម្លៃខ្ពស់​ចំពោះ​ភាពជោគជ័យ នៃកិច្ច​សហប្រតិបត្តិការ​កន្លងមក រវាងក្រសួងការងារ និង​អង្គការ​យូណេស្កូ ជាពិសេស​ការ​អនុវត្ត​កម្មវិធីមុខរបរ និង​ការងារសមរម្យ​សម្រាប់យុវជន​នៅ​កម្ពុជា (DEY) និងកម្មវិធី BEEP។

កម្មវិធី DEY គឺជាយន្តការដ៏មានសារៈសំខាន់ជួយបន្ថែមការគាំទ្រដល់យុទ្ធសាស្រ្តបញ្ចកោណ និង​យុទ្ធសាស្រ្ត​អភិវឌ្ឍ​វិស័យការងារ សន្តិសុខសង្គម និងបណ្តុះបណ្តាល​វិជ្ជាជីវ: ដែលកំណត់គោល​ដៅច្បាស់លាស់​ឱ្យយុវជន​ត្រូវ​មានជំនាញ​ច្បាស់លាស់ និងការយល់ដឹងស៊ីជម្រៅ​ពីបច្ចេកវិទ្យា។ ការបំពាក់ជំនាញពិតប្រាកដនេះ នឹងធ្វើឱ្យកម្លាំងពលកម្មកម្ពុជា​អាចបំពេញការងារប្រកបដោយផលិតភាពខ្ពស់ ប្រសិទ្ធភាព និងស័ក្តិសិទ្ធិភាព ដែលជាកត្តាគន្លឹះជួយ​ឱ្យពួកគាត់ទទួលបាន​ប្រាក់បៀវត្ស​ខ្ពស់ជាងមុន និងលើកកម្ពស់កម្រិតជីវភាពឱ្យកាន់តែប្រសើរ។

សម្រាប់ទិសដៅការងារបន្ត ក្រសួងការងារ និង​អង្គការយូណេស្កូ បានឯកភាពលើអាទិភាពយុទ្ធសាស្រ្តសំខាន់ៗដូចជា ការផ្លាស់ប្ដូរឌីជីថលក្នុងប្រព័ន្ធ TVET នឹងបន្តបញ្ចូលជំនាញឌីជីថល និងបច្ចេកវិទ្យាបៃតងទៅក្នុងកម្មវិធី​បណ្ដុះបណ្ដាល ដើម្បីឆ្លើយតបនឹងបដិវត្តន៍ឧស្សាហកម្ម ៤.០។ បន្តគាំទ្រតាមរយៈកម្មវិធី BEEP នឹងបន្តពង្រឹង​មជ្ឈមណ្ឌល​សិក្សាបែបឌីជីថល ដើម្បីផ្តល់ឱកាសដល់យុវជនក្រៅសាលាឱ្យទទួលបានការអប់រំ និងជំនាញ​ជាមូលដ្ឋាន។

ក្នុងភាពជាដៃគូនោះ ក៏មានការធ្វើតេស្តវាយតម្លៃទទួលស្គាល់ជំនាញពីមុន (RPL) ព្រមទាំងជួយជំរុញ​ការផ្ដល់វិញ្ញាបនបត្រ​ទទួលស្គាល់​ជំនាញ​ពីមុន ជូនដល់អតីតពលករខ្មែរ ដើម្បីធ្វើសមាហរណកម្មពួកគាត់ទៅក្នុងទីផ្សារការងារប្រកបដោយសេចក្ដីថ្លៃថ្នូរ។

ឯកឧត្តម Flavio Bonetti បានបញ្ជាក់ពីការប្តេជ្ញាចិត្ត​របស់អង្គការយូណេស្កូ ក្នុងការបន្ត​គាំទ្រកម្ពុជា ដើម្បីកសាង​កម្លាំងពលកម្ម​ដែលមានបរិយាបន្ន និងត្រៀម​ខ្លួន​រួចជាស្រេច​សម្រាប់សេដ្ឋកិច្ចឌីជីថល។ ឯកឧត្តមជឿជាក់ថា ភាពជាដៃគូដ៏រឹងមាំនេះនឹងចូលរួមចំណែកយ៉ាងសំខាន់ដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព និងចក្ខុវិស័យសេដ្ឋកិច្ចរបស់កម្ពុជានាពេលអនាគត៕