ជំងឺផ្លូវចិត្ត និងជំងឺលើសឈាមកំពុងមានសន្ទុះហក់ឡើងយ៉ាងខ្លាំង ក្នុងចំណោមជំងឺមិនឆ្លងសំខាន់ៗចំនួន ៥ប្រភេទដែលកំពុងកើនឡើងក្នុងប្រទេសកម្ពុជា។ នេះបើតាម ឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល ដែលបានបង្ហាញរបាយការណ៍ កាលពីថ្ងៃចន្ទ (២៦ មករា)។

របាយការណ៍បញ្ជាក់ថា ជំងឺមិនឆ្លងដែលកំពុងងើបឡើងខ្លាំងទាំង ៥ប្រភេទ រួមមាន ជំងឺទឹកនោមផ្អែម ជំងឺលើស​សម្ពាធឈាម ជំងឺសរសៃឈាមបេះដូង ជំងឺមហារីកផ្សេងៗ និងជំងឺផ្លូវចិត្ត។

ថ្លែងក្នុងសន្និសីទសារព័ត៌មានស្ដីពី «សមិទ្ធផលការងារឆ្នាំ២០២៥ របស់ក្រសួងសុខាភិបាល» ឯកឧត្តមរដ្ឋមន្ត្រីក្រសួងសុខាភិបាល លើកឡើងថា អត្រាកំណើននេះត្រូវបានកត់សម្គាល់តាមរយៈអ្នកប្រើប្រាស់សេវាសុខាភិបាលសាធារណៈ។

បើតាម ឯកឧត្តម ឈាង រ៉ា មនុស្សចំនួន ៣៨៩៥៥៣នាក់ បានមកពិនិត្យ និងព្យាបាលជំងឺផ្លូវចិត្ត នៅឆ្នាំ២០២៥ កើនឡើង ៣៧,៨ភាគរយ បើធៀបនឹងឆ្នាំ២០២៤។ ដោយឡែក អ្នកកើតជំងឺទឹកនោមផ្អែមដែលមកពិនិត្យនៅមូលដ្ឋានសុខាភិបាលសាធារណៈមានចំនួនជិត៣ម៉ឺនករណី កើនឡើង ២៦,៨ភាគរយ ក្នុងនោះអ្នកជំងឺសម្រាកព្យាបាលមានចំនួន១៨៤២៩នាក់។

អ្នកជំងឺមហារីកមកទទួលសេវាព្យាបាលមានចំនួន ៣៥៩២១នាក់ ឈរនៅលំដាប់លេខ ៣ កើនឡើង ១៣,៩ភាគរយ ក្នុងនោះអ្នកជំងឺចំនួន ១៥៥នាក់ បានស្លាប់។ តាមពីក្រោយដោយអ្នកជំងឺលើសសម្ពាធឈាមដែលមកពិនិត្យមានចំនួន ៤៥១០០៩ ករណី កើនឡើង១២,២០ភាគរយ, អ្នកជំងឺមកសម្រាកព្យាបាលនៅពេទ្យចំនួន ៤១៤៦៣នាក់។ ជាមួយគ្នានេះ ប្រជាពលរដ្ឋដែលមកពិគ្រោះជំងឺបេះដូងសរសៃឈាមមានចំនួន ១៥៣២៤ករណី ក្នុងនោះអ្នកជំងឺមកសម្រាក ព្យាបាលនៅមន្ទីរពេទ្យមានចំនួន ២៥៤៨០នាក់ ក្នុងនោះ ស្លាប់១០៩១នាក់។

ឯកឧត្តម ឈាង រ៉ា ពន្យល់ពីកត្តានាំឱ្យអ្នកជំងឺមិនឆ្លងមានចំនួនកើនឡើង គឺដោយសារតែកត្តាប្រែប្រួលនៃការរស់នៅ។

“យើងកំពុងតែមានដំណើរវិវត្ត ដោយសារតែជីវភាព និងស្ថានភាពនៃការរស់នៅរបស់បងប្អូនប្រជាពលរដ្ឋ”

អ្នកជំនាញវិទ្យាសាស្ត្រ បានបញ្ជាក់ឱ្យដឹងថា ការទម្លាប់ប្រើប្រាស់ប្លាស្ទិក ដូចជា ចាន ប្រអប់ស្នោរ កែវ ស្លាបព្រា សម បំពង់បឺត ប្រអប់ជ័រ សម្រាប់ដាក់ម្ហូបអាហារ និងទឹក អាចនឹងប៉ះពាល់ដល់សុខភាព និងបង្កហានិភ័យឱ្យកើតមានជំងឺមហារីក សរសៃឈាមបេះដូង និងខួរក្បាល។

លោកវេជ្ជបណ្ឌិត មុំ គង់ ប្រធានអង្គការចលនាដើម្បីសុខភាពកម្ពុជា (CMH) បានលើកឡើងថា ជំងឺមិនឆ្លងកើតឡើងដោយសារកត្តាធំៗគួរជាទីព្រួយបារម្ភដូចជា ការប្រើប្រាស់គ្រឿងស្រវឹង ការប្រើប្រាស់ថ្នាំជក់ ការពិសារភេសជ្ជៈផ្អែម និងការបរិភាគអាហារដែលមានជាតិស្ករ ខ្លាញ់ និងប្រៃ ជាពិសេស កង្វះការធ្វើពលកម្ម និងការហាត់ប្រាណ។

លោកវេជ្ជបណ្ឌិតលើកឡើងថា រាជរដ្ឋាភិបាលគួរតែមានវិធានការអប់រំ និងពង្រឹងការផ្សព្វផ្សាយពាណិជកម្មគ្រឿងស្រវឹង ថ្នាំជក់ និងភេសជ្ជៈផ្អែម។

លោកបណ្ឌិត ឈត ប៊ុនថន សាស្ត្រាចារ្យទស្សនវិជ្ជា នៃរាជបណ្ឌិត្យសភាកម្ពុជា យល់ឃើញថា ការកើនឡើងនូវជំងឺមិនឆ្លងនេះ មិនត្រឹមតែផ្តល់បន្ទុកបន្ថែមទៅលើក្រុមគ្រួសារសម្រាប់ការព្យាបាល និងការថែទាំងសុខភាពប៉ុណ្ណោះទេ ប៉ុន្តែវានឹងផ្តល់បន្ទុកដល់រាជរដ្ឋាភិបាលក្នុងការបង្កើនថវិកាសម្រាប់បម្រើសេវាសុខភាពសាធារណៈផងដែរ៕

អត្ថបទ ៖ សៅ សុខអេង