ក្រសួងអប់រំ យុវជន និងកីឡា បានសម្រេចផ្អាកការរៀបចំការប្រឡងជ្រើសរើសសិស្សពូកែទូទាំងប្រទេស សម្រាប់ឆ្នាំសិក្សា ២០២៤-២០២៥ និងលើកទឹកចិត្តឱ្យរាជធានី-ខេត្ត ម្ចាស់ការក្នុងការរៀបចំការប្រឡងជ្រើសរើសសិស្សពូកែ ប្រចាំរាជធានី-ខេត្ត ដោយខ្លួនឯង។

យោងតាមលិខិតរបស់ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ផ្ញើទៅកាន់ប្រធានមន្ទីរអប់រំ រាជធានី-ខេត្ត កាលថ្ងៃទី២៧ ខែមករា ឆ្នាំ២០២៥ បានបញ្ជាក់ថា ក្រសួងអប់រំ យុវជន និងកីឡា ផ្អាកការរៀបចំការប្រឡងជ្រើសរើសសិស្សពូកែទូទាំងប្រទេស សម្រាប់ឆ្នាំសិក្សា ២០២៤-២០២៥ និងលើកទឹកចិត្តឱ្យរាជធានី-ខេត្ត ម្ចាស់ការក្នុងការរៀបចំការប្រឡងជ្រើសរើសសិស្សពូកែប្រចាំរាជធានី-ខេត្តលើមុខវិជ្ជាអក្សរសិល្ប៍ខ្មែរ គណិតវិទ្យា និងរូបវិទ្យា ថ្នាក់ទី៩ និងថ្នាក់ទី១២ ទៅតាមពេលវេលាសមស្របណាមួយ តាមមុខវិជ្ជា តាមកម្រិតថ្នាក់ និងផ្តល់រង្វាន់ដល់ជ័យលាភីសិស្សពូកែប្រចាំរាជធានី-ខេត្ត តាមលទ្ធភាព និងស្ថានភាពជាក់ស្តែងនៃរាជធានី-ខេត្តនីមួយៗ។

លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ថា ការសម្រេចផ្អាកការប្រឡងសិស្សពូកែក្នុងឆ្នាំសិក្សា ២០២៤-២០២៥ នេះ គឺក្រសួងកំពុងផ្តោតលើការងារអាទិភាពក្នុងការលើកកម្ពស់ និងគាំទ្រសាលារៀនឱ្យក្លាយជាសាលាគំរូ សំដៅលើកកម្ពស់គុណភាពអប់រំ និងអនុវត្តជាបន្តបន្ទាប់នូវកម្មវិធីក្រៅម៉ោងសិក្សា ដើម្បីឱ្យសិស្សានុសិស្សមានវិជ្ជាសម្បទា បំណិនសម្បទា និងចរិយាសម្បទាស្របតាមសតវត្សរ៍ទី២១។

លោកជំទាវបន្ថែមថា កន្លងមក ការប្រឡងសញ្ញាបត្រមធ្យមសិក្សាទុតិយភូមិមិនមែនគ្រាន់តែជាការវាស់ស្ទង់សមត្ថភាពរបស់ប្អូនៗនោះទេ តែបានក្លាយជាឱកាសសម្រាប់ប្អូនៗទូទាំងប្រទេសក្នុងការបង្ហាញសមត្ថភាព និងខិតខំប្រឹងប្រែងដើម្បីទទួលបាននិទ្ទេសនានា ជាពិសេសនិទ្ទេស A ព្រមទាំងមានការទទួលស្គាល់ពីគ្រប់មជ្ឈដ្ឋានរួចមកហើយ ហើយក៏ជាឱកាសសម្រាប់ប្អូនៗក្នុងការទទួលបានការទទួលស្គាល់ និងឱកាសក្នុងការទទួលបានអាហារូបករណ៍នានាផងដែរ។

បើតាមអ្នកនាំពាក្យក្រសួងអប់រំ ការផ្អាករៀបចំការប្រឡងសិស្សពូកែទូទាំងប្រទេសនេះ ពោលគឺក្រសួងមានបំណងជំរុញការអនុវត្តម្ចាស់ការដោយរាជធានីខេត្ត ក៏ដូចជាផ្តល់ឱកាសឱ្យរាជធានីខេត្តអាចរៀបចំការប្រកួតប្រជែងស្របតាមបរិបទ និងធនធានរបស់ខ្លួន។

គួរជំរាបជូនថា ការ​ប្រឡង​សិស្ស​ពូកែទូទាំង​ប្រទេស គឺមាន​ប្រវត្តិចាប់ផ្តើម​ដំបូង​កាលពីឆ្នាំ១៩៨៦ ដោយគ្រានោះ គឺជា​ការ​ប្រឡងជ្រើសរើសសិស្សពូកែទូទាំងប្រទេសផ្នែកអក្សរសាស្រ្តខ្មែរ និងគណិតវិទ្យា លុះដល់ឆ្នាំ១៩៩៦ ការប្រឡងសិស្សពូកែត្រូវបានផ្អាកដោយសារជួបការលំបាកខាងផ្នែកបច្ចេកទេសក្នុងការរៀបចំថ្នាក់ ការគ្រប់គ្រងសិស្សពូកែគ្រប់កម្រិតថ្នាក់ និងជាពិសេសខាងផ្នែកថវិកា។

យ៉ាងណា​ក៏ដោយ​មួយឆ្នាំក្រោយមក ពោលគឺនៅឆ្នាំ១៩៩៧ សម្តេចតេជោ ហ៊ុន សែន ដែលកាលនោះជានាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឱ្យក្រសួងអប់រំ យុវជន និងកីឡា រៀបចំការប្រឡងជ្រើសរើសសិស្សពូកែទូទាំងប្រទេសផ្នែកអក្សរសិល្ប៍ខ្មែរ និងគណិតវិទ្យា ថ្នាក់ទី៩ និងថ្នាក់ទី១២ ឡើងវិញ ដោយប្រសិទ្ធនាមថា “ពានរង្វាន់សម្តេច ហ៊ុន សែននិងលោកជំទាវ”។

ក្រោយមកនៅឆ្នាំ២០០០ ក្រសួងអប់រំ បានកែលម្អការងារប្រឡងជ្រើសរើសសិស្សពូកែទូទាំងប្រទេស ដោយបន្ថែមមុខវិជ្ជារូបវិទ្យាសម្រាប់ថ្នាក់ទី៩ និងថ្នាក់ទី១២។ ក្នុងឆ្នាំ២០១៦ ដើម្បីលើកទឹកចិត្តដល់បេក្ខជនជ័យលាភីសិស្សពូកែទូទាំងប្រទេស ក្រសួងអប់រំយុវជន និង កីឡា បានគោរពស្នើសុំគោលការណ៍ពីរាជរដ្ឋាភិបាល សុំដំឡើងប្រាក់រង្វាន់សម្រាប់ផ្តល់ជូនដល់ជ័យលាភីសិស្សពូកែទូទាំងប្រទេស។ រាជរដ្ឋាភិបាលកម្ពុជា បានចេញអនុក្រឹត្យលេខ ១៣៧ អនក្រ.បក ចុះថ្ងៃទី៦ ខែកក្កដា ឆ្នាំ២០១៦ ស្តីពីការផ្ដល់រង្វាន់ដល់ជ័យលាភីសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងផ្នែករូបវិទ្យា ដែលជាការកំណត់ប្រាក់រង្វាន់សម្រាប់បេក្ខជនជ័យលាភីសិស្សពូកែទូទាំងប្រទេស៕