ការបញ្ចប់ថ្នាក់វិទ្យាល័យមានន័យថា ពិភពនៃឱកាសជាច្រើនកំពុងរងចាំអ្នក ។ នេះគឺជាពេលវេលាស្វែងរកចំណេះដឹង និងបទពិសោធន៍ថ្មីៗ ដូចជាស្វែករកវគ្គសិក្សា និងកម្មវិធីសិក្សាថ្មី ចូលទៅក្នុងបរិបទសង្គមថ្មី និងគិតពីអាជីពនាពេលអនាគតជាដើម។ ក្នុងដំណាក់កាលនេះ មានរឿងជាច្រើន ដែលអ្នកត្រូវធ្វើ ហើយប្រសិនបើអ្នកព្យាយាមគិត និងធ្វើតែម្នាក់ឯង អ្នកប្រហែលជាអាចទទួលសម្ពាធដោយមិនដឹងខ្លួន។ ការមានអ្នកណែនាំ (Mentor) អាចជាជម្រើសដ៏ល្អបំផុតមួយសម្រាប់អ្នក ព្រោះពួកគាត់អាចផ្លាស់ប្ដូរជីវិតអ្នកទៅក្នុងរូបភាពវិជ្ជមាន នៅពេលអ្នកឈានចូលមហាវិទ្យាល័យ និងបំពេញការងារ។ លើសពីនេះ ពួកគាត់អាចពិគ្រោះជាមួយអ្នក អំពីការសម្រេចចិត្តជម្រើសរើសសាកលវិទ្យាល័យ មុខជំនាញ ការសេពគប់មិត្តភក្តិ និងរបៀបរស់នៅក្រោយចប់ថ្នាក់វិទ្យាល័យជាដើម។

អ្វីជាអ្នកណែនាំ (Mentor)?

អ្នកណែនាំ (Mentor) អាចជាមិត្តភក្ដិ គ្រូបង្រៀន សិស្សច្បង ឪពុកម្ដាយ មិត្តរួមការងារ ឬថ្នាក់លើ ដែលមានបទពិសោធន៍ជីវិត និងយល់ពីបរិបទសង្គមបានច្រើនជាងអ្នក។ ជាពិសេស គាត់ជាបុគ្គល ដែលអាចយល់ពីអ្នក ហើយមានឆន្ទៈចែករំលែកចំណេះដឹង និងបទពិសោធន៍ ដែលគាត់មានជាមួយអ្នក ឬក៏នរណាម្នាក់ ដែលអាចជួយអ្នកឱ្យសម្រេចបាននូវសក្តានុពលពិតប្រាកដរបស់អ្នក មានស្មារតីបង្ហាត់បង្ហាញ គាំទ្រ និងលើកទឹកចិត្តអ្នក។

អត្ថប្រយោជន៍ទទួលបានពីការប្រឹក្សាជាមួយ អ្នកណែនាំ (Mentor)

ការបង្កើតទំនាក់ទំនងជាមួយ​អ្នកណែនាំ ជួយឱ្យអ្នករីកចម្រើនទាំងជីវិតផ្ទាល់ខ្លួន ការសិក្សា និងវិជ្ជាជីវៈ។ អ្នកណែនាំ ដែលមានចំណេះដឹង និងបទពិសោធន៍ទូលាយ ព្រមទាំងផ្នត់គំនិតវិជ្ជមាន គឺជាគម្រូដ៏សំខាន់សម្រាប់ជីវិតអ្នក។ ពួកគាត់អាចជួយរៀបចំអាកប្បកិរិយារបស់អ្នក ក្រមសីលធម៌ការងារ និងរបៀបទំនាក់ទំនងក្នុងសង្គម។

ពួកគាត់ជាអ្នកផ្ដល់ការណែនាំប្រកបដោយវិជ្ជាជីវៈ ជួយអ្នកកំណត់អត្តសញ្ញាណភាពខ្លាំងខ្លួនឯង និងបង្ហាញផ្លូវឆ្ពោះទៅរកគោលដៅវិជ្ជាជីវៈ។ អ្នកណែនាំ (Mentor) អាចមានបណ្ដាញទំនាក់ទំនងក្នុងសង្គមច្រើន ហើយអាចភ្ជាប់អ្នកជាមួយអ្នកជំនាញនៅក្នុងវិស័យ ឬក៏អាជីព ដែលអ្នកបានជ្រើសរើស ក្រោយពីបញ្ចប់ការសិក្សា។

នៅក្នុងដំណាក់កាលចូលរៀនថ្នាក់មហាវិទ្យាល័យ ពួកគាត់អាចណែនាំអ្នកឱ្យយល់ដឹងអំពីវប្បធម៌នៅថ្នាក់មហាវិទ្យាល័យ ជួយអ្នករកដំណោះស្រាយគ្រប់គ្រងពេលវេលា និងគ្រប់គ្រងភាពតានតឹងជាដើម។ អ្នកណែនាំឆ្នើម (Good Mentor) ក៏អាចធ្វើជាអ្នកស្ដាប់ នៅពេលអ្នកត្រូវការអ្នកនិយាយជាមួយផងដែរ។

ការស្វែងរកអ្នកណែនាំ (Mentor)

ជារឿងធម្មតាទេ ដែលអ្នកមានអ្នកណែនាំ (Mentor) ច្រើនពេញមួយជីវិតរបស់អ្នក។ នៅអំឡុងពេលរៀនថ្នាក់វិទ្យាល័យ អ្នកណែនាំ (Mentor) របស់អ្នក​ អាចជាគ្រូដែលអ្នកចូលចិត្ត ឬក៏សិស្សច្បងរបស់អ្នក។ នៅអំឡុងពេលរៀននៅមហាវិទ្យាល័យ អ្នកណែនាំ (Mentor)​ របស់អ្នកអាចជាសាស្ត្រាចារ្យ សិស្សច្បង មិត្តជិតស្និត ឬបុគ្គលឆ្នើមណាម្នាក់ដែលអ្នកចូលចិត្ត និងចង់រៀនសូត្រពីគាត់។ ក្រោយមករកនៅក្នុងជីវិតការងារ អ្នកណែនាំ (Mentor) អាចជាថ្នាក់លើ ឬក៏ចាស់ទុំ ដែលរស់នៅក្នុងភូមិជាមួយអ្នក។ ក្នុងអំឡុងពេលនៃរបត់ធំៗក្នុងជីវិត អ្នកណែនាំ (Mentor) អាចជួយអ្នកឱ្យរកដំណោះស្រាយ នៅពេលមានការសម្រេចចិត្តលំបាកៗ ដោយប្រើបទពិសោធន៍ជីវិតរបស់ពួកគាត់។ ប៉ុន្តែរឿងមួយដែលអ្នក ត្រូវចងចាំ គឺ អ្នកណែនាំ គ្រាន់តែជាអ្នកបង្ហាញផ្លូវសម្រាប់អ្នកប៉ុណ្ណោះ រាល់មតិយោបល់ ដែលអ្នកទទួលបាន ត្រូវឆ្លងកាត់ការគិត និងពិចារណាឱ្យបានល្អិតល្អន់ មុននឹងសម្រេចចិត្ត៕