ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តាមរយៈកម្មវិធីអាហារូបករណ៍យុវជនសម្រាប់សហគមន៍ក្នុងគម្រោងរេដបូកកែវសីមា (Keo Seima EmpowerED) ក្រោមការគាំទ្រថវិកាពីគម្រោងរេដបូកកែវសីមា និស្សិត ១០នាក់ ដែលជាជនជាតិដើមភាគតិចពូនងមកពីសហគមន៍ក្នុងគម្រោងរេដបូកកែវសីមា នៃខេត្តមណ្ឌលគិរី ទទួលបានឱកាសបន្តការសិក្សាជំនាញសំខាន់ៗក្នុងថ្នាក់បរិញ្ញាបត្ររយៈពេល ៤ឆ្នាំ នៅសាកលវិទ្យាល័យភូមិន្ទកសិកម្មក្នុងរាជធានីភ្នំពេញ។
កម្មវិធីអាហារូបករណ៍កែវសីមា (Keo Seima EmpowerED) គឺជាគម្រោងអាហារូបករណ៍មួយ ដែលផ្តល់ឱកាសដល់យុវជនជនជាតិដើមភាគតិចដែលមានសក្តានុពល ដែលរស់នៅក្នុងតំបន់នៃដែនជម្រកសត្វព្រៃកែវសីមា ខេត្តមណ្ឌលគិរី ឱ្យទទួលបានការអប់រំកម្រិតឧត្តមសិក្សា។
កម្មវិធីនេះជាកិច្ចសហការរវាងអង្គការសមាគមអភិរក្សសត្វព្រៃ (WCS) និងសាកលវិទ្យាល័យភូមិន្ទកសិកម្ម ដែលផ្តល់ជូនការផ្គត់ផ្គត់ពេញលេញដល់និស្សិតសម្រាប់ការសិក្សាថ្នាក់បរិញ្ញាបត្ររយៈពេល ៤ ឆ្នាំ ដែលផ្តល់ឱ្យពួកគេនូវការអប់រំ ជំនាញបច្ចេកទេសទាក់ទងនឹងវិស័យកសិកម្ម បរិស្ថាន ធនធានធម្មជាតិ អភិវឌ្ឍន៍សហគមន៍ ចំណីអាហារ និង ភាពជាអ្នកដឹកនាំ ដែលតម្រង់ផ្លូវយុវជនជនជាតិដើមភាគតិចទាំងនោះក្លាយជាអ្នកផ្លាស់ប្តូរ និងចូលរួមចំណែកក្នុងការអភិវឌ្ឍសហគមន៍។
សូមជំរាបជូនថា គម្រោងរេដបូក កែវសីមា ជាគម្រោងសហការរវាងអង្គការសមាគមអភិរក្សសត្វព្រៃ (WCS) ជាមួយក្រសួងបរិស្ថាន ក្នុងការកាត់បន្ថយឧស្ម័នផ្ទះកញ្ចក់ ដែលបណ្តាលមកពីការបាត់បង់ និងការរេចរឹលនៃព្រៃឈើ (REDD+) ក្នុងដែនជម្រកសត្វព្រៃកែវសីមា។ គម្រោងនេះ ទទួលបានឥណទានកាបូនសរុបប្រហែល ១៩លានឥណទានកាបូន ហើយថវិកាត្រូវបានប្រើប្រាស់លើការងារបណ្តុះបណ្តាលមន្ត្រីឧទ្យានុរក្ស ការងារអភិរក្ស និងគ្រប់គ្រងព្រៃឈើ និងសត្វព្រៃ និងលើកកម្ពស់ជីវភាពសហគមន៍៕
