ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និង​កីឡា បាន​ឱ្យដឹងថា នៅ​ក្នុងឆ្នាំសិក្សា​២០២៣-២០២៤ ក្រសួងអប់រំ នឹង​ជ្រើសរើស​សាលារៀនសំណាក ដែលជាសាលារៀនមានសក្តានុពល​ប្រមាណ៥០០ ទៅ១០០០សសាលា ដើម្បីទទួល​ការ​ជួយ​គាំទ្រ និង​ធ្វើ​ការ​វាយតម្លៃ ដោយរំពឹងថា សម្រេចបាន​តាមស្តង់ដាសាលារៀនគំរូ ក្នុងរយៈពេល​២ឆ្នាំខាងមុខ។

បើតាម​ប្រសាសន៍ ឯកឧត្តម ហង់ជួន ណារ៉ុន ក្នុងរយៈពេល​ចំពោះមុខ ក្រសួងនឹង​វាយតម្លៃ​ជ្រើសរើស​សាលារៀន​ប្រមាណ៥០ សម្រាប់ប្រកាស​នៅ​ក្នុង​សន្និបាត​អប់រំ ក្នុងខែមេសា ឆ្នាំ​២០២៤នេះ។

សូមបញ្ជាក់ថា បច្ចុប្បន្ននេះ ក្រសួងអប់រំបាននិងកំពុងរៀបចំយន្តការជំរុញអនុវត្តសាលារៀនគំរូ និងយន្តការចុះជួយសាលារៀន ដូចជា៖ ក្រុមនាយកសាលាល្អ គ្រូបង្រៀនល្អ ក្រុមអ្នកឯកទេស ដូចជាកម្មវិធីសិក្សា រង្វាយតម្លៃ ហិរញ្ញវត្ថុ និងការគ្រប់គ្រងទូទៅ កម្មវិធីអភិវឌ្ឍភាពជាអ្នកដឹកនាំសាលារៀន និងកម្មវិធីអភិវឌ្ឍគ្រូបង្រៀន ការបង្ហាត់បង្ហាញអំពី ការបង្រៀនគណិតវិទ្យាថ្នាក់ដំបូង និងគណិតវិទ្យាថ្នាក់ដំបូងនៅ បឋមសិក្សា និងវិធីសាស្ត្របង្រៀនថ្មីនៅមធ្យមសិក្សា។

ចាប់ពីឆ្នាំសិក្សា២០២៤ នេះតទៅ ស្តង់ដាសាលារៀនគំរូចំនួន ៥ ត្រូវបានប្រកាសដាក់ឱ្យអនុវត្តជាផ្លូវការទូទាំងប្រទេសកម្ពុជា ដើម្បីលើកកម្ពស់គុណភាពបង្រៀន និងលទ្ធផលសិក្សាសិស្ស ដែលរួមមានស្តង់ដា (ទី១) លទ្ធផលសិក្សារបស់សិស្ស (ទី២).ការបង្រៀន និងរៀន (ទី៣). ការចូលរួមរបស់សហគមន៍ (ទី៤). ដំណើរប្រតិបត្តិការ និងរដ្ឋបាលសាលារៀន (ទី៥). គណនេយ្យភាពរបស់សាលារៀន។

ជាមួយនេះដែរ ក្រសួងបានដាក់បញ្ចូលវិធានការគន្លឹះចំនួន៤ ទៅក្នុងស្តង់ដាគំរូខាងលើ តបតាមអនុសាសន៍ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលដៅពង្រឹងគុណភាពគ្រឹះស្ថានសិក្សារដ្ឋ ចាប់ពីថ្នាក់មត្តេយ្យសិក្សាដល់មធ្យមសិក្សា ដែលរួមមានវិធានការ ទី១).ការពង្រឹងអភិបាលកិច្ចសាលារៀន ទី២).ការពិនិត្យ កែសម្រួល និងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្រប ទៅតាមតម្រូវការក្នុងការពង្រឹងចំណេះដឹង, វិន័យ សីលធម៌ និងឥរិយាបថរបស់សិស្ស ទី៣).ការយកចិត្តទុកដាក់លើសុខភាពរបស់សិស្ស តាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងទី៤). ការជំរុញ និងលើកទឹក ចិត្តការចូលរួមរបស់មាតាបិតា អ្នកអាណាព្យាបាល និងសហគមន៍ក្នុងការអប់រំស្របតាមពាក្យ ស្លោក “ភាពជាដៃគូរដ្ឋ និងសហគមន៍ដើម្បីការអប់រំ”៕