ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងពិធីបើកវគ្គបណ្តុះបណ្តាល ស្តីពី ការកសាងសមត្ថភាពបច្ចេកវិទ្យាព័ត៌មាន (ICT) សម្រាប់ការអប់រំនៅមធ្យមសិក្សាបឋមភូមិ កាលពីថ្ងៃទី២៦ ខែមករា ឆ្នាំ២០២៦ លោកជំទាវ ឃួន វិច្ឆិកា អគ្គនាយក នៃអគ្គនាយកដ្ឋានបណ្តុះបណ្តាល និងវិក្រឹតការ លើកឡើងថា បច្ចេកវិទ្យាព័ត៌មាន គឺជាលក្ខខណ្ឌចាំបាច់សម្រាប់វិជ្ជាជីវៈគ្រូបង្រៀននាពេលបច្ចុប្បន្ន។
លោកជំទាវ ឃួន វិច្ឆិកា មានប្រសាសន៍ថា កាលណាគ្រូបង្រៀនមិនអាចប្រើប្រាស់បច្ចេកវិទ្យាព័ត៌មាន (ICT) ប្រកបដោយប្រសិទ្ធភាព នោះមានន័យថា ឱកាសក្នុងការក្លាយខ្លួនជាគ្រូបង្រៀនដ៏ល្អម្នាក់នាពេលបច្ចុប្បន្ន និងពេលអនាគត គឺមិនអាចធ្វើបានទេ។
ដើម្បីរក្សានូវគុណវុឌ្ឍិ និងឧត្តមភាពក្នុងការបង្រៀន លោកជំទាវស្នើឱ្យគ្រូបង្រៀន ត្រូវតែអភិវឌ្ឍវិជ្ជាជីវ:ជាប្រចាំរបស់ខ្លួន យ៉ាងហោចណាស់១០០ម៉ោងក្នុងមួយឆ្នាំ។ បើតាមលោកជំទាវ ឃួន វិច្ឆិកា ការបណ្តុះបណ្តាលបច្ចុប្បន្ន គ្រូបង្រៀនអាចរកឃើញថ្នាលជាច្រើនដែលអាចរៀនតាមអនឡាញ, ជាមួយគ្នានេះ នាយកដ្ឋានកិច្ចការវិក្រឹតការ និងនាយកដ្ឋានបរិវត្តកម្មឌីជីថល ក៏រៀបចំជា platform មួយហៅថា CDP ដែលអាចឱ្យលោកគ្រូអ្នកគ្រូរៀនតាមអនឡាញបានដូចគ្នា។
វគ្គបណ្តុះបណ្តាល ស្តីពី “កសាងសមត្ថភាពបច្ចេកវិទ្យាព័ត៌មានសម្រាប់ការអប់រំនៅមធ្យមសិក្សាបឋមភូមិនៅកម្ពុជា” ឆ្នាំ២០២៦ ត្រូវបានប្រព្រឹត្តទៅចាប់ពីថ្ងៃទី២៦ ដល់ថ្ងៃទី៣០ ខែមករា ឆ្នាំ២០២៦ នៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្តាល សម្រាប់គ្រូបង្រៀន និងគរុសិស្ស នៃសាលារៀនគោលដៅទាំង២០ ក្នុងគោលបំណងអភិវឌ្ឍសមត្ថភាពគ្រូបង្រៀន និងគរុសិស្សនូវចំណេះដឹងគរុកោសល្យ និងវិធីសាស្ត្របង្រៀនសៀវភៅសិក្សាគោល បច្ចេកវិទ្យាព័ត៌មាន និងសារគមនាគមន៍ ថ្នាក់ទី៩។
សម្រាប់ការបណ្តុះបណ្តាលនេះ លោកជំទាវ ឃួន វិច្ឆិកា លើកទឹកចិត្តដល់លោកគ្រូ អ្នកគ្រូដែលទទួលបានការបណ្តុះបណ្តាល អាចសងគុណត្រឡប់មកវិញតាមរយ:ការផ្ទេរចំណេះ ជំនាញដែលបានទទួល បន្តទៅកាន់ប្អូនៗដែលកំពុងសិក្សា ដែលរង់ចាំការបណ្តុះបណ្តាលបន្តពីលោកគ្រូអ្នកគ្រូដើម្បីចូលរួមអភិវឌ្ឍប្រទេសជាតិយើង៕
