ថ្លែងក្នុងវគ្គបណ្តុះបណ្តាលស្តីពី “វិធីសាស្ត្របង្រៀនសៀវភៅគោល បច្ចេកវិទ្យាព័ត៌មាន និងសារគមនាគមន៍ ថា្នក់ទី១០” កាលពីពេលថ្មីៗនេះ លោកជំទាវ គឹម សេដ្ឋានី រដ្ឋលេខាធិការប្រចាំការក្រសួងអប់រំ យុវជន និងកីឡា មានប្រសាសន៍ថា ដើម្បីទទួលបានការអប់រំបែបឌីជីថលចាំបាច់ត្រូវមានសាលារៀនឌីជីថល គ្រូបង្រៀនឌីជីថល និងសិស្សឌីជីថល។

លោកជំទាវ គឹម សេដ្ឋានី បញ្ជាក់បន្ថែមថា នាឆ្នាំ២០២២ កន្លងមកនេះ នៅក្នុងសន្និបាតអប់រំពិភពលោក របស់អង្គការសហប្រជាជាតិ (UN) បានប្រកាសថា ឆ្នាំ២០២២ ជាឆ្នាំបរិវត្តកម្មវិស័យអប់រំ ដែលត្រូវផ្សារភ្ជាប់ការប្រើប្រាស់ឌីជីថល ក្នុងកាបង្រៀន និងរៀន ក្នុងបរិបទការស្តារឡើងវិញវិស័យអប់រំក្រោយការរីករាលត្បាលជំងឺ Covid-19។ ទន្ទឹមគ្នានេះ ដើម្បីទទួលបានការអប់រំបែបឌីជីថលបាន យើងត្រូវមានសមាសធាតុចំនួនបីសំខាន់គឺ សាលារៀនឌីជីថល គ្រូបង្រៀនឌីជីថល និងសិស្សឌីជីថល។

រដ្ឋលេខាធិការប្រចាំការក្រសួងអប់រំ បន្ថែមថា ក្រសួងអប់រំ យុវជន និងកីឡា គឺគាំទ្រ ចំពោះការបង្កើតឱ្យមានវគ្គបណ្តុះបណ្តាលនេះឡើងដែលជាការចូលរួមលើកកម្ពស់គុណវឌ្ឍិគ្រូបង្រៀន ទៅលើផ្នែកបច្ចេកវិទ្យាព័ត៌មាន ក៏ដូចជាការអប់រំឌីជីថលនៅកម្ពុជា។ លើសពីនេះ មូលដ្ឋាននៃការស្រាវជ្រាវ ការអភិវឌ្ឍសមត្ថភាពខ្លួនឯងជាបន្តបន្ទាប់ ដើម្បីឱ្យការអប់រំកាន់តែមានប្រសិទ្ធភាព។

ដូចគ្នានេះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ធ្លាប់បានលើកឡើងថា “ការអប់រំឌីជីថល គឺជាយុទ្ធសាស្ត្រគន្លឹះមួយក្នុងចំណោមយុទ្ធសាស្ត្រផ្សេងទៀត ដើម្បីជំរុញការធ្វើបរិវត្តកម្ម នៃប្រព័ន្ធអប់រំ”។ នេះមានន័យថា លោកគ្រូ អ្នកគ្រូ ជាភ្នាក់ងារនៃការផ្លាស់ប្តូរ ដើម្បីសម្រេចបាននៃការធ្វើបរិវត្តកម្មវិស័យអប់រំ។  

សូម​បញ្ជាក់ថា វគ្គបណ្តុះបណ្តលស្តីពី “វិធីសាស្ត្របង្រៀនសៀវភៅគោល បច្ចេកវិទ្យាព័ត៌មាន និងសារគមនាគមន៍ ថា្នក់ទី១០” មានគោលបំណងបំប៉នសមត្ថភាពគ្រូបង្រៀន ICT លើវិធីសាស្ត្របង្រៀនតាមសៀវភៅសិក្សាគោលបច្ចេកវិទ្យាព័ត៌មាន និងសារគមនាគមន៍ថា្នក់ទី១០ ដើម្បីលើកកម្ពស់គ្រូបង្រៀន ICT ទៅលើវិធីសាស្ត្របង្រៀនថ្មីៗ ស្របទៅតាមបំណិនសតវត្សទី២១ បរិបទសេដ្ឋកិច្ចសង្គមឌីជីថល និងកម្មវិធីសិក្សាលម្អិតថ្មី ឆ្នាំ២០១៨-២០២៣។

ជាមួយគ្នានេះ ក្រសួងអប់រំ យុវជន និងកីឡា គ្រោងរៀបចំវគ្គបណ្តុះបណ្តាលជាបន្តបន្ទាប់នៅខែតុលា ឆ្នាំ២០២៣ ដោយមានគ្រូបង្រៀនមុខវិជ្ជា ICT ចំនួន ៣០០នាក់ មកពីវិទ្យាល័យគោលដៅទូទាំងប្រទេសចំនួន ១៥០វិទ្យាល័យ៕