ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
បាត់ដំបង – ក្រោយឆ្លងកាត់កំណែទម្រង់ជាបន្តបន្ទាប់ លទ្ធផលដែលទទួលបានគឺគុណភាពនៃវិស័យអប់រំនៅកម្ពុជាមានការផ្លាស់ប្តូរជាវិជ្ជមាន និងគួរឱ្យមោទនៈ។ ជាក់ស្តែង សមត្ថភាពរបស់សិស្ស និស្សិតកម្ពុជា មានការកើនឡើងកាន់តែខ្ពស់ អាចប្រកួតប្រជែងរហូតដល់អាចដណ្តើមបានពានរង្វាន់លំដាប់ថ្នាក់ពិភពលោកបានថែមទៀត ។ នេះជាការលើកឡើងរបស់ ឯកឧត្តម ស សុខា ក្នុងពិធីប្រគល់ម៉ូតូជូនដល់សិស្សនិទ្ទេស A ចំនួន៥៤នាក់ នៅខេត្តបាត់ដំបងកាលពីពេលថ្មីៗនេះ។
ថ្លែងក្នុងឱកាសនោះ ឯកឧត្តម ស សុខា បានគូសបញ្ជាក់ថា គិតចាប់តាំងពីឆ្នាំ២០១៤មក គឺមានរយៈពេលជិត ១០ឆ្នាំហើយ ដែលក្រសួងអប់រំ យុវជន និងកីឡា បានចាប់ផ្តើមធ្វើកំណែទម្រង់ទៅលើវិស័យអប់រំ ពិសេសការរឹតបន្តឹងនៅពេលប្រឡងសញ្ញាបត្រមធ្យមសិក្សាទុតិយភូមិ។ ជិត១០ឆ្នាំនេះ បានឆ្លងកាត់នូវឧបសគ្គក៏ដូចជាបទពិសោធន៍យ៉ាងច្រើនដែលជាមេរៀនដ៏ល្អ សម្រាប់អភិវឌ្ឍន៍វិស័យអប់រំនៅកម្ពុជាបន្តទៀត ដើម្បីឈានទៅបណ្តុះបណ្តាលធនធានមនុស្សពោរពេញដោយសមត្ថភាព ពិសេសអាចប្រកួតប្រជែងជាមួយប្រទេសជិតខាង ក្នុងតំបន់ ក៏ដូចជាបណ្តាប្រទេសរីកចម្រើនដទៃទៀតនៅលើពិភពលោក។
ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា
“កំណែទម្រង់វិស័យអប់រំនៅកម្ពុជា បាននិងកំពុងតែដើរនៅលើផ្លូវត្រូវ បើទោះជាចុងក្រោយនេះ កម្ពុជាបានរងផលប៉ះពាល់ដែលបង្កឡើងដោយសារវិបត្តិជំងឺរាតត្បាតសកលកូវីដ១៩ក្តី”
ឯកឧត្តម ស សុខា បានបន្តថា រាជរដ្ឋាភិបាលកម្ពុជា បាននិងកំពុងយកចិត្តទុកដាក់យ៉ាងខ្លាំងទៅលើវិស័យអប់រំ ។ តាមរយៈសារលិខិតអបអរបវេសនកាលថ្មី ឆ្នាំសិក្សា២០២២-២០២៣ កាលពីដើមខែមករានេះ សម្តេចតេជោ បានណែនាំឱ្យក្រសួងអប់រំ យុវជន និងកីឡា ត្រូវខិតខំកែលម្អសេវាអប់រំ និងកម្មវិធីអប់រំ ដើម្បីកសាងធនធានមនុស្សឱ្យឆ្លើយតបទៅនឹងតម្រូវការទីផ្សារការងារក្នុងយុគសម័យឌីជីថល និងសេដ្ឋកិច្ចឌីជីថលប្រកបដោយជំនាញក្នុងសតវត្សទី២១ ជាពិសេសការអប់រំ វិទ្យាសាស្រ្ត បច្ចេកវិទ្យា វិស្វកម្ម និងគណិតវិទ្យា។
ជាក់ស្តែង នៅក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៥ ខែធ្នូ ២០២២កន្លងមកនេះ មានសិស្សប្រឡងជាប់សរុប ៩០ ៩៥០នាក់ ស្មើនឹង៧២,៣៣%។ ក្នុងនោះសិស្ស ដែលបានប្រឡងជាប់និទ្ទេស A ចំនួន ១,០៤៩នាក់ និទ្ទេស B ចំនួន ៧,២៣២នាក់ និទ្ទេស C ចំនួន ១៩,០៥៣នាក់ និទ្ទេស D ចំនួន ៣១,១៦៦នាក់ និងនិទ្ទេស E ចំនួន ៣២,៤៥០នាក់។
ឯកឧត្តម ស សុខា បានបញ្ជាក់ថា លទ្ធផលដែលយើងទទួលបាននៅពេលនេះ គឺពិតជាពុំអាចកើតមាននោះឡើយ ប្រសិនបើមិនមានការចូលរួមសហការគ្នាពីសំណាក់រាជរដ្ឋាភិបាល ក៏ដូចជាស្ថាប័នពាក់ព័ន្ធ រួមទាំងវិស័យឯកជនជាពិសេសប្រទេសជាតិមានសុខសន្តិភាព នាពេលបច្ចុបន្ននេះ។
គួរបញ្ជាក់ដែរថា បើតាមប្រសាសន៍របស់ ឯកឧត្តម សុខ លូ អភិបាលខេត្តបាត់ដំបង នៅក្នុងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៥ ធ្នូ ២០២២ កន្លងទៅនេះ ខេត្តបាត់ដំបងមានសិស្សជាប់និទ្ទេស A ចំនួន ៥៤នាក់ ៕
