ក្នុងវេទិកាបំណិនជីវិតដែលរៀបចំឡើងដោយ​សហភាពសហព័ន្ធយុវជនកម្ពុជា​រាជធានីភ្នំពេញកាលពីពេលថ្មីៗនេះ អ្នកស្រី អ៊ូច ជាច័ន្ទមល្លិកា អនុប្រធានទីភ្នាក់ងារជាតិ មុខរបរ និងការងារ បានលើកឡើងគន្លឹះ ៤ចំណុចជួយយុវជនឱ្យស្វែងយល់ពីខ្លួនឯង។ កាលលើកឡើងនេះ សម្រាប់ជួយដល់ប្អូនសិស្សានុសិ្សដែលមិនទាន់ស្គាល់ពីខ្លួនឯង ដើម្បីអាចរកឃើញសក្កដានុពលរបស់ខ្លួន។

បើតាម អ្នកស្រី អ៊ូច ជាច័ន្ទមល្លិកា យុវជនអាចស្វែងយល់ពីខ្លួនឯង តាមរយៈការកត់សម្គាល់ចំនួន៤ចំណុច រួមមាន៖

ទី១. ស្វែងរកចំណង់ចំណូលចិត្ត ៖ ការស្វែងយល់អំពីចំណង់ចំណូលចិត្ត ដែលវាពិតជាសំខាន់ជួយឱ្យអ្នកដឹងថា ខ្លួនយើងចូលចិត្តអ្វី ? យើងចូលចិត្តអានសៀវភៅ ? យើងចូលចិត្តស្រាវជ្រាវ? ឬយើងចូលចិត្តបែបសិល្បៈ ចម្រៀង ឬចូលចិត្តផ្នែកគ្រឿងខ្ចៅខ្ចងជាដើម ដែលយុវជនត្រូវតែស្វែងយល់។ ឧទាហរណ៍ អ្នក​មិន​ចូលចិត្តស្វែង​យល់​គ្រប់រឿងទេ ប៉ុន្តែបើគេ​ឱ្យអ្នកធ្វើកិច្ចការទាក់ទងនឹងការថតរូប ឬ ផលិតវីដេអូ អ្នក​អាច​នឹង​ចំណាយ​ពេល​រាប់ម៉ោង​ផ្ចិតផ្ចង់ធ្វើវាដោយគ្មានការនឿយហត់។

ទី២. ស្វែងយល់ពីទេពកោសល្យរបស់ខ្លួន ៖ ទេពកោសល្យគឺជាលក្ខណៈ ឬ ភាពខ្លាំង ដែលអ្នកមានពីធម្មជាតិ ។ វាជាលំនាំដែលអ្នកធ្វើ គិត ឬ មានអារម្មណ៍ចេញមកពីធម្មជាតិក្នុងខ្លួនរបស់អ្នក និងជា​អ្វី​ដែលធ្វើឱ្យអ្នក​ខុស​ប្លែក​ពី​អ្នកដទៃ ព្រោះវាជាបុគ្គលិកលក្ខណៈពិសេសតែមួយគត់របស់អ្នក។ ទន្ទឹមគ្នានេះ យុវជនត្រូវស្វែងយល់ថាខ្លួនឯងខ្លាំងពូកែផ្នែកអ្វីពិតប្រាកដ តើអ្នកកំពុងធ្វើអ្វី? មានអារម្មណ៍យ៉ាងម៉េច ឬអ្នក​កំពុង​គិត​អ្វី​រាល់ថ្ងៃ? ដូច្នេះ ចូរសរសេរគ្រប់យ៉ាងអំពីអ្វីដែលជម្រុញអ្នកមានភាពខ្លាំង។

ទី៣. ស្គាល់គុណតម្លៃជីវិត ៖ ការស្គាល់ពីគុណតម្លៃជីវិតមានសារៈសំខាន់ ដោយមានន័យថា យើងឱ្យតម្លៃទៅលើអ្វីមួយដែលធ្វើឱ្យយើងមានកម្លាំងខំប្រឹងដើម្បីទៅរកក្ដីស្រមៃរបស់ខ្លួន។ ឧទាហរណ៍ យើងឱ្យតម្លៃទៅលើសៀវភៅ ឱ្យតម្លៃទៅលើការអាន ឱ្យតម្លៃទៅលើការនិយាយជាដើម។

ទី៤. ស្វែងយល់ពីបុគ្គលិកលក្ខណៈ ៖ បុគ្គលិកលក្ខណៈជាចរិត ឬ លក្ខណៈរបស់បុគ្គល ជាពិសេសសំដៅទៅលើរបៀបដែលមនុស្សសម្ដែងចំពោះអ្នកដទៃ។ ទន្ទឹមគ្នានេះ យើងអាចស្វែងយល់ពីបុគ្គលិកលក្ខណៈដោយសង្កេតមើលមកខ្លួនឯងជាមនុស្សបែបរួសរាយរាក់ទាក់ បែបហ្មត់ចត់ ឬបែបសិល្បៈជាដើម៕