ក្នុងបរិបទនៃការវិវឌ្ឍយ៉ាងលឿននៃបដិវត្តន៍ឧស្សាហកម្មទី៤ បច្ចេកវិទ្យាឌីជីថលបានក្លាយជាកម្លាំងចលករដ៏សំខាន់ដែលបានផ្សារភ្ជាប់យ៉ាងជិតស្និទ្ធទៅនឹងគ្រប់ទិដ្ឋភាពនៃជីវភាពរស់នៅ ការងារ និងការរីកចម្រើននៃសេដ្ឋកិច្ចសង្គម។

ក្នុង​ឱកាស​ប្រគល់សញ្ញាបត្រថ្នាក់បរិញ្ញាបត្រ ជូននិស្សិតនៃបណ្ឌិត្យសភាបច្ចេកវិទ្យាឌីជីថលកម្ពុជា កាលពីដើមសប្តាហ៍នេះ ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍និងទូរគមនាគមន៍ លើកឡើងថា ការចាប់យកជំនាញបច្ចេកវិទ្យាឌីជីថល ជំរុញនិស្សិតទទួលបានទីផ្សារការងារខ្ពស់ ដោយសារបច្ចេកវិទ្យាឌីជីថលបាននិងកំពុងផ្សារភ្ជាប់យ៉ាងជិតស្និទ្ធនឹងដំណើរការការងារ ជីវភាពរស់នៅ និងការវិវត្តនៃសេដ្ឋកិច្ចនិងសង្គម។ ឯកឧត្តម​ឱ្យដឹងថា តាមរយៈរបាយការណ៍និស្សិតដែលពូកែលើជំនាញបច្ចេកវិទ្យា ពួកគេ​អាចចាប់ផ្ដើមការងារ​ដោយ​ទទួលបានប្រាក់បៀវត្សរ៍ជាមធ្យម ៤៥៦ដុល្លារ ទៅដល់រាប់ពាន់ដុល្លារ។

«បណ្ឌិត្យសភាបច្ចេកវិទ្យាឌីជីថលកម្ពុជា បានបណ្ដុះបណ្ដាលនិស្សិត ១០០នាក់ ក្នុងនោះ ៩៦នាក់បានទៅធ្វើការចំជំនាញរបស់ខ្លួន។ នេះជាអ្វីដែលខ្ញុំចង់បាន! »

យ៉ាងណាក៏ដោយ បើតាម​ប្រសាសន៍របស់ឯកឧត្តមរដ្ឋមន្ត្រី ធនធានមនុស្សជំនាញទាំងនេះ គឺជាកម្លាំងចលករដ៏សំខាន់ក្នុងការអនុវត្តយុទ្ធសាស្ត្របញ្ចកោណ ដំណាក់កាលទី១ ដែលផ្ដោតលើអាទិភាពឌីជីថល។ ជាមួយគ្នា​នេះ ឯកឧត្តមបានផ្តាំផ្ញើដល់និស្សិតគ្រប់រូបត្រូវបន្តអភិវឌ្ឍន៍សមត្ថភាព ស្រាវជ្រាវបច្ចេកវិទ្យាថ្មីៗ ព្រមទាំងត្រូវបំពេញការងារដោយយកចិត្តទុកដាក់ ទំនួលខុសត្រូវខ្ពស់ និងមានក្រមសីលធម៌ល្អ ដើម្បីជាប្រយោជន៍ដល់ក្រុមហ៊ុន-សហគ្រាស ដែលខ្លួនបម្រើការងារ និងដល់សង្គមជាតិ ក៏ដូចជាអនាគតដ៏ត្រចះត្រចង់របស់ខ្លួន ជាពិសេស ត្រូវធ្វើជាយុវជនគំរូ ជារៀមច្បងដែលមានវប្បធម៌ចែករំលែកចំណេះដឹង បទពិសោធដល់សិស្សប្អូនជំនាន់ក្រោយ កសាងទំនាក់ទំនងល្អ និងមានសាមគ្គីភាពជាមួយនឹងមិត្តដែលសិក្សារួមជំនាន់។

បើតាម ឯកឧត្តម សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកម្ពុជា និស្សិតជ័យលាភីដែលទទួលសញ្ញាបត្រថ្នាក់បរិញ្ញាបត្រមាន ចំនួន ២៤២រូប ដែលបានបញ្ចប់ការសិក្សានៅបណ្ឌិត្យសភា CADT ជំនាន់ទី៧ ឆ្នាំ២០២៤ និងជំនាន់ទី៨ ឆ្នាំ២០២៥។ ក្នុងនោះនិស្សិតជាង ៩៦% ទទួលបានការងារធ្វើត្រូវនឹងជំនាញរបស់ខ្លួនរួចជាស្រេច នៅក្នុងក្រុមហ៊ុនបច្ចេកវិទ្យាឈានមុខ ស្របពេលនិស្សិតក៏ធ្លាប់ដណ្តើមបានពានរង្វាន់ថ្នាក់ជាតិ និងអន្តរជាតិជាច្រើនផងដែរ៕