ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សៀមរាប – នៅព្រឹកព្រលឹមថ្ងៃទី២១ ខែមីនា នេះ អ្នកទេសចររាប់រយនាក់បាននាំគ្នាធ្វើដំណើរទៅប្រាសាទអង្គរ ដើម្បីទស្សនាព្រះអាទិត្យរះចំកំពូលកណ្តាលប្រាសាទ ដែលត្រូវបានចាត់ទុកថា ជាព្រឹត្តិការណ៍ដ៏អស្ចារ្យនៅប្រាសាទអង្គរវត្ត ។
ព្រឹត្តិការណ៍ព្រះអាទិត្យរះចំកំពូលកណ្តាលប្រាសាទអង្គរ ត្រូវស្គាល់ថា ជា «សមរាត្រី» (Equinox) ដែលតែងកើតឡើងចំនួន២ដងជារៀងរាលឆ្នាំ គឺ សមរាត្រីប្រាំង (វសន្តរដូវ) កើតឡើងនៅថ្ងៃទី២១ ខែមីនា និងសមរាត្រីរដូវវស្សាកើតឡើងនៅថ្ងៃទី២២ ខែកញ្ញា។
លោក អ៊ឹម សុខរិទ្ធី អ្នកសិក្សាស្រាវជ្រាវ នៃអាជ្ញាធរជាតិអប្សរា បានមានប្រសាសន៍ថា សមរាត្រី គឺជាពេលវេលាដែលថ្ងៃ និងយប់មានរយៈពេលស្ទើរតែស្មើគ្នា, ក្រៅពីនេះ ខែខ្លះថ្ងៃមានរយៈពេលវែងជាងយប់ ហើយខ្លះទៀតយប់មានរយៈពេលវែងជាងថ្ងៃវិញ តែជាករណីពិសេសនៅអង្គរវត្តវេលាថ្ងៃ និងយប់មានរយៈពេលស្មើគ្នានេះ ដែលព្រះអាទិត្យតែងតែរះទ្បើងចំកំពូលកណ្តាល នៃអង្គរវត្តនាព្រឹកព្រលឹមស្រាងៗ។
បើតាមអ្នកជំនាញរូបនេះថា សម្រាប់ប្រាសាទអង្គរវត្ត ដែលមានព្រឹត្តិការណ៍សមរាត្រីកើតឡើងនេះ មិនមែនជារឿងចៃដន្យទេ វាជាលក្ខណពិសេសរបស់បុព្វបុរសខ្មែរ ដែលរៀបចំស្ថាបត្យកម្ម ប្លង់ប្រាសាទទុកមុនជាស្រេច ដោយបំណងតម្រូវតាមបាតុភូតធម្មជាតិឱ្យប្រាសាទអង្គរវត្តបង្កើតជាព្រឹត្តិការណ៍ថ្ងៃរះចំកំពូលកណ្ដាលនៃប្រាសាទអង្គរវត្តនេះឡើង។
បើយោងតាមរបាយការណ៍របស់មន្ទីរទេសចរណ៍ខេត្តសៀមរាប នៅព្រឹកព្រលឹមនៅថ្ងៃទី២១ ខែមីនា ឆ្នាំ២០២៣ មានភ្ញៀវទេសចរ និងបងប្អូនប្រជាពលរដ្ឋទៅទស្សនាព្រឹត្តិការណ៍សមរាត្រី ឬព្រះអាទិត្យរះចំកំពូលប្រាសាទអង្គរវត្ត ចំនួន ៨ ៧២៦នាក់ ក្នុងនោះភ្ញៀវទេសចរជាតិមានចំនួន ៦៥០០នាក់ និងភ្ញៀវទេសចរបរទេស ចំនួន ២២២៦នាក់៕
