គណៈកម្មាធិកាទទួលស្គាល់គុណភាពអប់រំនៅកម្ពុជា ហៅកាត់ថា ACC ដើរតួនាទីសំខាន់ក្នុងការធានាការអប់រំកម្រិតឧត្តមសិក្សាឱ្យមានកម្រិតស្តង់ដា និងមានគុណភាពស្របតាមតម្រូវការនាសតវត្សទី២១។ នេះបើតាម​ប្រសាសន៍​លើកឡើងរបស់លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា ។

អ្នកនាំពាក្យក្រសួងអប់រំ បញ្ជាក់បន្ថែមថា ក្រៅពីការវាស់វែងទៅលើគុណភាពសាលារៀនតាមស្តង់ដារបស់គណៈកម្មាធិកាទទួលស្គាល់គុណភាពអប់រំនៅកម្ពុជា ក្រសួងអប់រំ កំពុងជំរុញឱ្យមានការពិនិត្យលើទៅលើស្តង់ដានៃសាកលវិទ្យាល័យក្នុងប្រទេសអាស៊ាន ដើម្បីធ្វើយ៉ាងណាជំរុញគុណភាព នៃការអប់រំកម្ពុជាឱ្យ​មានភាពប្រកួតប្រជែងទាំងក្នុងតំបន់ និងនៅក្នុងពិភពលោក។

គួរជម្រាបជូនថា គណៈកម្មាធិការទទួលស្គាល់គុណភាពអប់រំនៃកម្ពុជា ត្រូវបានរាជរដ្ឋាភិបាលកម្ពុជាបង្កើតឡើងកាលពីឆ្នាំ២០០៣ មានតួនាទីអភិវឌ្ឍគោលនយោបាយ និងបទប្បញ្ញត្តិ នៃការទទួលស្គាល់គុណភាពអប់រំ រួមទាំងវិធានការចាំបាច់នានា ដើម្បីធានាគុណភាពអប់រំ សម្រាប់គ្រឹះស្ថានឧត្តមសិក្សាទាំងអស់នៅក្នុងព្រះរាជាណាចក្រកម្ពុជា ។

គណៈកម្មាធិការនេះ បានបង្កើតស្ដង់ដារគុណភាពអប្បបរមាសម្រាប់ផ្ដល់ការទទួលស្គាល់គុណភាពអប់រំលើគ្រឹះស្ថានឧត្តមសិក្សានៅក្នុងឆ្នាំ ២០១២ ។ លុះដល់ឆ្នាំ ២០១៣ គណៈកម្មាធិការនេះ ត្រូវបានដាក់ឱ្យស្ថិតនៅក្រោមការគ្រប់គ្រងរបស់ក្រសួងអប់រំ យុវជន និងកីឡា និងបានកែលម្អស្ដង់ដារគុណភាពអប្បបរមា និងសូចនាករ ហើយប្ដូរឈ្មោះទៅជា ស្ដង់ដារជាតិសម្រាប់ការទទួលស្គាល់គុណភាពអប់រំលើគ្រឹះស្ថានឧត្តមសិក្សា។

ចាប់តាំងពីឆ្នាំ ២០១៥-២០១៧ គណៈកម្មាធិការទទួលស្គាល់គុណភាពអប់រំនៃកម្ពុជា បានប្រើស្ដង់ដាជាតិវាយតម្លៃសាកល្បងលើគ្រឹះស្ថានឧត្តមសិក្សាចំនួន ៥៤។ ចំណែកឆ្នាំ ២០១៩ និងក្នុងឆ្នាំ ២០២១ គណៈកម្មាធិការទទួលស្គាល់គុណភាពអប់រំនៃកម្ពុជា បានចុះវាយតម្លៃ និងចេញវិញ្ញាបនបត្រទទួលស្គាល់គុណភាពអប់រំពេញសិទ្ធិលើគ្រឹះស្ថានឧត្តមសិក្សាចំនួន២០។

ជាមួយគ្នានេះ ដើម្បីទទួលបានការទទួលស្គាល់គុណភាពអប់រំលើគ្រឹះស្ថានឧត្តមសិក្សា ដំណើរការវាយតម្លៃត្រូវធ្វើឡើងជា ៣ ដំណាក់កាល រួមមាន ដំណាក់កាលទី១ គឺជាការសិក្សាលើរបាយការណ៍ស្វ័យវាយតម្លៃ និងឯកសារគាំទ្រដែលផ្ដល់ដោយគ្រឹះស្ថានឧត្តមសិក្សា, ដំណាក់កាលទី២ គឺជាការចុះវាយតម្លៃនៅតាមគ្រឹះស្ថានឧត្តមសិក្សា ដែលដំណាក់កាលនេះ មន្ត្រីវាយតម្លៃត្រូវប្រមូលព័ត៌មាន និងទិន្នន័យតាមរយៈការសម្ភាសន៍ សង្កេត និងការស្ទង់មតិពីភាគីពាក់ព័ន្ធរបស់គ្រឹះស្ថានឧត្តមសិក្សា បន្ទាប់មកត្រូវរៀបចំកិច្ចប្រជុំដើម្បីធ្វើបទបង្ហាញអំពីលទ្ធផលបឋមនៃការវាយតម្លៃជូនភាគីពាក់ព័ន្ធរបស់គ្រឹះស្ថានឧត្តមសិក្សា និងដំណាក់កាលទី៣ គឺផ្ដោតលើការសរសេររបាយការណ៍វាយតម្លៃជូនប្រធានគណៈកម្មាធិការទទួលស្គាល់គុណភាពអប់រំនៃកម្ពុជា ដើម្បីពិនិត្យ និងសម្រេចលើការផ្ដល់ការទទួលស្គាល់គុណភាពអប់រំសម្រាប់គ្រឹះស្ថានឧត្តមសិក្សា។

លោកជំទាវ ឃួន វិច្ឆិកា បន្ថែមថា ដើម្បីជំរុញការអប់រំ និងគុណភាពឧត្តមសិក្សា ក្រសួងអប់រំ ក៏បានសិក្សា នឹងជំរុញឱ្យមានមជ្ឈមណ្ឌលឧត្តមភាពនៅតាមគ្រឹះស្ថានឧត្តមសិក្សា, រៀបចំគ្រឹះស្ថានឧត្តមសិក្សាឱ្យមានបណ្ដាញសាកលវិទ្យាល័យសាយប័រ ក៏ដូចជាមានកិច្ចសហប្រតិបត្តិការជាមួយប្រទេសជិតខាងជាច្រើនបន្ថែមទៀត។

គួររំលឹកថា កន្លងមកនេះ គណៈកម្មាធិការទទួលស្គាល់គុណភាពអប់រំនៃកម្ពុជា សម្រេចបានសមិទ្ធផលធំៗចំនួន ២ គឺទី១ បានដាក់ចេញនូវផែនទីបង្ហាញផ្លូវ និងផែនការយុទ្ធសាស្ត្រ ឆ្នាំ ២០២០-២០៣០ និងទី២ បានដាក់ចេញនូវសៀវភៅណែនាំស្តីពីការវាយតម្លៃផ្តល់ការទទួលស្គាល់គុណភាពអប់រំលើគ្រឹះស្ថានឧត្តមសិក្សា។ ផែនទីបង្ហាញផ្លូវ និងផែនការយុទ្ធសាស្ត្រឆ្នាំ ២០២០-២០៣០ បានកំណត់ទិសដៅច្បាស់លាស់ដែលត្រូវអនុវត្ត រួមទាំងបង្ហាញការវិវឌ្ឍដ៏សំខាន់ក្នុងការធានា និងទទួលស្គាល់គុណភាពអប់រំឧត្តមសិក្សានៅកម្ពុជាដែលគ្រោងនឹងអនុវត្តនៅឆ្នាំ ២០៣០៕