ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ភ្នំពេញ — ការប្រឡងប្រជែងជ្រើសរើសសិស្សមន្ត្រីក្រមការជំនាន់ទី១២ នៃសាលាភូមិន្ទរដ្ឋបាល បានប្រព្រឹត្តទៅកាលពីថ្ងៃទី២៥ ខែធ្នូ ឆ្នាំ២០២៥ នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រ សេដ្ឋកិច្ច ដោយមានបេក្ខជនចូលរួមប្រឡងចំនួន ១៦ ៤៣៥នាក់។ ការប្រឡងនេះ ធ្វើឡើងក្នុងគោលដៅផ្តល់មន្ត្រីក្របខ័ណ្ឌ បម្រើការងារតាមរដ្ឋបាលក្រុង ស្រុក ខណ្ឌ ចំនួន២០៥កន្លែង។
ក្នុងឱកាសបើកវិញ្ញាសាជានិមិត្តរូប ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង មានប្រសាសន៍ថា ការប្រឡងប្រជែងនាពេលនេះ ជាការប្រឡងប្រជែងលើកទី៥២ ដែលក្រសួងមុខងារសាធារណៈ បានដឹកនាំរៀបចំ។ បើតាមឯកឧត្តម ហ៊ុន ម៉ានី វិញ្ញាសាដែលបានដាក់ឱ្យបេក្ខជនប្រឡង គឺទើបនឹងតាក់តែងនៅពេលព្រឹកមុនការប្រឡងមកដល់ ដោយគណៈកម្មការបានជ្រើសរើសសំណួរចំនួន១០០ ចេញពីសំណួរប្រមាណ១៥០ ដើម្បីដាក់ជូនបេក្ខជនប្រឡងក្នុងពេលរសៀល។
ជាមួយគ្នានេះ ឯកឧត្តមឧបនាយករដ្ឋមន្រ្តី ក៏បានបញ្ជាក់អំពីសុក្រឹតភាពក្នុងការប្រឡងដោយការអះអាងថា ” គ្រប់សន្លឹកកិច្ចការទាំងអស់ មានចុះហត្ថលេខា កាលបរិច្ឆេទ និងឈ្មោះរបស់ឯកឧត្តម ដើម្បីធានាថា វិញ្ញាសាទាំងអស់ មិនមាននរណាម្នាក់បានទទួល ឬដឹងមុនឡើយ។”
សូមជំរាបថា ការប្រឡងជ្រើសរើសមន្រ្តីក្រមការនេះ បេក្ខជនត្រូវឆ្លងកាត់ការប្រឡងប្រជែងចំនួន ២លើក។ វិញ្ញាសាសរសេរលើកទី១ រៀបចំឡើងនាសម័យប្រឡងថ្ងៃទី២៥ ខែធ្នូ ឆ្នាំ២០២៥ តាមរយៈវិញ្ញាសាសំណួរពហុចម្លើយ ដើម្បីសម្រាំងយក ៣ដងនៃចំនួនបេក្ខជនជ្រើសរើសចុងក្រោយ (ឬប្រមាណ៦០០នាក់)។ វិញ្ញាសាសរសេរលើកទី២ នឹងរៀបចំឡើង នាសម័យប្រឡងថ្ងៃទី២៨ ខែធ្នូ ឆ្នាំ២០២៥ នៅមណ្ឌលប្រឡង សាលាភូមិន្ទរដ្ឋបាល លើវិញ្ញាសាអធិប្បាយ និងភាសាអង់គ្លេស ឬភាសាបារាំង ដើម្បីជ្រើសរើសយកបេក្ខជនចុងក្រោយ ២០៥នាក់ ជាបេក្ខជនជាប់ស្ថាពរ៕
អត្ថបទ ៖ ង៉ាន់ ទិត្យ
