ភ្នំពេញ – នៅក្នុងពិធីអបអរសាទរទិវាអន្ដរជាតិនារី ៨មីនា ខួបលើកទី១១២ ឆ្នាំ២០២៣ ក្រោមមូលបទ “ស្រី្ដរួមគ្នារក្សាសុខសន្ដិភាព ដើម្បីកិច្ចអភិវឌ្ឍក្នុងយុគសម័យឌីជីថល” នៅទីស្តីការក្រសួងប្រៃសណីយ៍ និងទូរគមនាគមន៍ នារសៀលថ្ងៃទី០៦ ខែមីនា លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី មានប្រសាសន៍ថា ស្រ្តីកម្ពុជាជាកម្លាំងចលកររួមចំណែកក្នុងកំណើនសេដ្ឋកិច្ច និងការអប់រំ ។

លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី មានប្រសាសន៍ថា ក្រោមម្លប់នៃសន្តិភាព និងកិច្ចអភិវឌ្ឍ ស្រ្តីកម្ពុជាជាកម្លាំងចលករ ដែលបានរួមចំណែកក្នុងកំណើនសេដ្ឋកិច្ច ហើយបច្ចុប្បន្ន ស្ត្រីមានកាលានុវត្តភាពក្នុងការអនុវត្តសិទ្ធិ អភិវឌ្ឍចំណេះដឹង ជំនាញ និងបច្ចេកទេស ។

ទន្ទឹមគ្នានេះ លោកជំទាវកិត្តិបណ្ឌិត ក៏បានលើកឡើងថា ការរៀបចំពិធីអបអរសាទរទិវាអន្តរជាតិនារី ៨មីនា ខួបទី១១២ ឆ្នាំ២០២៣ មានបំណងបន្តរំលេចពីតម្លៃនៃការចូលរួមរបស់ស្រ្តី ដែលមិនអាចកាត់ថ្លៃបានក្នុងការថែរក្សាសុខសន្តិភាព ។ ម្យ៉ាងវិញទៀត រំលេចលើបរិវត្តកម្មសេដ្ឋកិច្ច-សង្គមដែលកើតឡើងក្នុងពិភពលោក ក៏ដូចនៅកម្ពុជាពន្លឿនដោយវិបត្តិកូវីត-១៩ និងបដិវត្តឧស្សាហកម្ម៤.០ ដោយតម្រូវឱ្យធនធានស្ត្រីត្រូវចាប់យកឱ្យទាន់សភាពការណ៍ ដើម្បីបន្ស៊ាំខ្លួន ព្រមទាំងឆ្លើយតបទៅតម្រូវការបច្ចុប្បន្ន ។

ស្របនឹងការលើកឡើងរបស់រដ្ឋមន្ត្រីក្រសួងកិច្ចការនារី ឯកឧត្តម ជា វ៉ាន់ដេត ក្រសួងប្រៃសណីយ៍ និងទូរគមនាគមន៍ ក៏មានប្រសាសន៍ដែរថា ក្រសួងប្រៃសណីយ៍ បន្តជំរុញគាំទ្រការចូលរួមរបស់ស្រ្ដីនៅក្នុងវិស័យឌីជីថល ដូចជា រៀបចំការបណ្ដុះបណ្ដាលជំនាញបច្ចេកវិទ្យាឌីជីថល និងលើកកម្ពស់កម្រិតអក្ខរកម្មឌីជីថល ដើម្បីឱ្យប្រជាជនកម្ពុជាគ្រប់រូបទាំងចាស់ទាំងក្មេងយល់ដឹងពីរបៀបនៃការប្រើប្រាស់បច្ចេកវិទ្យាប្រកបដោយសុវត្ថិភាព ។

ជាមួយគ្នានេះដែរ ក្រសួងប្រៃសណីយ៍ និងទូរគមនាគមន៍ នឹងផ្តល់អាហារូបករណ៍អាទិភាពដល់ស្រ្តីសិក្សានៅគ្រឹះស្ថានឧត្តមសិក្សា, រៀបចំកម្មវិធីជំរុញ និងគាំទ្រសហគ្រិនស្ត្រី, ព្រមទាំងផ្តល់ឱកាសបន្ថែមដល់មន្ត្រីរាជការស្ត្រីក្នុងតួនាទីកាន់តែមានសារសំខាន់ក្នុងការចូលរួម និងទទួលបានអត្ថប្រយោជន៍ពីការរីកចម្រើននៃបច្ចេកវិទ្យា ។ នេះជាការបញ្ជាក់របស់ឯកឧត្តម ជា វ៉ាន់ដេត ក្រសួងប្រៃសណីយ៍ និងទូរគមនាគមន៍ ។

សូមជម្រាបថា នាឱកាសប្រារព្ធពិធីអបអរសាទរទិវាអន្ដរជាតិនារី ៨មីនា ខួបលើកទី១១២ ឆ្នាំ២០២៣ ក្រោមមូលបទ “ស្រី្ដរួមគ្នារក្សាសុខសន្ដិភាព ដើម្បីកិច្ចអភិវឌ្ឍក្នុងយុគសម័យឌីជីថល” មានការអញ្ជើញចូលរួមពីឯកឧត្ដមលោកជំទាវ ជារដ្ឋលេខាធិការ អនុរដ្ឋលេខាធិការ ថ្នាក់ដឹកនាំក្រសួង និងមន្ត្រីរាជការ និយោជិតនារីទាំងអស់ក្រោមឱវាទក្រសួង សរុបបប្រមាណ ៣៩១រូប។