កម្មវិធី Chatbot ដែលមានឈ្មោះថា រៀន AI កំពុងបង្ហាញថា សមត្ថភាពបញ្ញាវន្តកម្ពុជា នៅក្នុងវិស័យបច្ចេកវិទ្យា អាចបង្កើត និងស្រាវជ្រាវ បច្ចេកវិទ្យាជាន់ខ្ពស់ ដែលអាចប្រកួតប្រជែងជាមួយកម្មវិធីបញ្ញាសិប្បនិម្មិត (AI) ដទៃទៀតរបស់បរទេស។

ផ្ដួចផ្ដើមបង្កើតនៅឆ្នាំ២០២០ ដោយលោក ឡាយ គិរី ដែលជាអតីតនិស្សិតបញ្ចប់ការសិក្សាថ្នាក់បណ្ឌិតជំនាញគ្រប់គ្រងប្រព័ន្ធព័ត៌មានមកពី សាកលវិទ្យាល័យគ្រប់គ្រងសិង្ហបុរី កម្មវិធីនេះត្រូវបានដាក់ដំណើរការកាលពីខែមីនា ឆ្នាំ២០២៣ ក្នុងគោលបំណង សម្រួលដល់ការស្រាវជ្រាវរបស់ប្រជាជនខ្មែរ និងអនុញ្ញាតឱ្យអ្នកប្រើប្រាស់អ៊ីនណិនធឺណិត ដែលមិនប្រើភាសាអង់គ្លេស អាចប្រើកម្មវិធីនេះ ដើម្បីដោះស្រាយបញ្ហា ឬចម្ងល់ណាមួយភ្លាមៗ និងលឿនរហ័ស។

កម្មវិធីនេះអាចប្រើប្រាស់បានរហូតដល់ ៦០ភាសា និងផ្ដល់ចម្លើយត្រឹមត្រូវរហូតដល់ ៩០ភាគរយ

បច្ចុប្បន្នកម្មវិធីនេះ ត្រូវបានដាក់ឱ្យប្រើប្រាស់ជាសកល ក្នុងនោះមានអ្នកប្រើប្រាស់ក្នុងប្រទេសចំនួន ២០ ដែលក្នុងនោះជនជាតិខ្មែរនៅបរទេសជាច្រើនកំពុងប្រើកម្មវិធីនេះ ខណៈជនបរទេសដែលកំពុងប្រើប្រាស់ស្ថិតក្នុងទំហំតូចនៅឡើយ ដោយមានប្រមាណជាង ១០ភាគរយ ប៉ុន្តែទស្សនវិស័យរបស់លោក ចង់ឱ្យជនបរទេសប្រើបច្ចេកវិទ្យានេះ យ៉ាងតិចឱ្យបាន ៧០ ទៅ ៨០ភាគរយ ទើបអាជីវកម្ម និងការផ្សព្វផ្សាយបានទូលំទូលាយ និងលេចឈ្មោះកូនខ្មែរលើឆាកអន្តរជាតិ។ នេះជាការបញ្ជាក់របស់លោក ឡាយ គិរី។

ជាអ្នកប្រើប្រាស់ម្នាក់ ឧកញ៉ាបណ្ឌិត ឈិន កេន ប្រធានសមាគម បច្ចេកវិទ្យាឌីជីថលនៃកម្ពុជា (CDTA) បាននិយាយថា កម្មវិធីនេះ អាចជួយការងារប្រចាំថ្ងៃរបស់លោកបានច្រើន និងព្រមទាំងជួយសន្សំសំចៃពេលវេលារបស់លោក។ លោកសង្កត់ធ្ងន់ថា ជាទូទៅ លោកប្រើកម្មវិធីនេះ ដើម្បីស្រាវជាវ និងសួរសំណួរផ្សេងៗ ជាពិសេស គឺការបង្កើតយុទ្ធសាស្ត្រអាជីវកម្ម ដែលភាគច្រើនគឺកម្មវិធីនេះ អាចជួយផ្ដល់ជាធាតុចូលដល់លោកបាន។

ចំណែក លោកស្រី ម៉ៅ សុជាតិ នាយិការក្រុមហ៊ុន ​Global Talents Co.,Ltd និងជាអ្នកប្រើកម្មវិធីនេះម្នាក់ទៀត បានលើកឡើងថា តាមរយៈបទពិសោធលោកស្រី ដែលបាននិងកំពុងប្រើប្រាស់កម្មវិធីនេះប្រមាណជា ៧ខែ បានធ្វើឱ្យលោកស្រីដឹងច្បាស់ថា កម្មវិធីបញ្ញាសិប្បនិម្មិត (AI) បានជួយការងារលោកស្រីច្រើន ជាពិសេសគឺការងាររដ្ឋបាល ដូចជាលិខិតឆ្លើយឆ្លង លិខិតស្នើសុំអ្វីមួយ និងលិខិតអញ្ជើញ, ដូច្នេះ លោកស្រីមិនចាំបាច់ព្យាយាមគិតច្រើនោះទេ ដោយគ្រាន់តែសរសេរពីគោលបំណងរបស់យើងផ្ញើទៅកាន់តែ AI នោះវានឹងបង្ហាញប្រាប់យើងតែម្ដងថា លិខិតនោះគួររៀបចំរបៀបណា។

បច្ចុប្បន្ន ប្រជាជនកម្ពុជា ៣២% អាចប្រើបច្ចេកវិទ្យាកម្រិតមូលដ្ឋាន, ៥% មានជំនាញកម្រិតមធ្យម និង ១% មានជំនាញកម្រិតខ្ពស់។ នេះបើតាមឯកសារ ក្របខណ្ឌសមត្ថភាពអក្ខរកម្មឌីជីថល ប្រព័ន្ធផ្សព្វផ្សាយ និងព័ត៌មាន ដែលចេញផ្សាយដោយ ក្រសួងប្រៃសណីយ៍ និងទូរគមនាគមន៍។ ស្របនឹងទិន្នន័យនេះ លោក គិរី ដែលជាអ្នកជំនាញក្នុងវិស័យបច្ចេកវិទ្យាមួយរូប ចង់ឃើញសកម្មភាពបង្កើតការបណ្ដុះបណ្ដាល និងវគ្គសិក្សាអំពីការប្រើប្រាស់បច្ចេកវិទ្យាឌីជីថល និងបញ្ញាសិប្បនិម្មិត បន្ថែមទៀត ដើម្បីប្រជាជន និងយុវជនកម្ពុជា មានសមត្ថភាពក្នុងការប្រកួតប្រជែងក្នុងទីផ្សារការងារ។

លោកបណ្ឌិត លី រតនា ប្រធានផ្នែកស្រាវជ្រាវនៃបណ្ឌិត្យសភាបច្ចេកវិទ្យាឌីជីថលកម្ពុជា (CADT) បានបង្ហាញទស្សនៈចំពោះការប្រើប្រាស់បច្ចេកវិទ្យាបញ្ញាសិប្បនិម្មិត (AI) ឬ Chatbot ដូចជា រៀន AI និង ChatGPT ថា មានឥទ្ធិពលទាំងវិជ្ជមានផង និងអវិជ្ជមានផង។ អ្នកជំនាញបច្ចេកវិទ្យារូបនេះបន្តថា  វិជ្ជមានត្រង់យើងអាចប្រើបច្ចេកវិទ្យានេះ ដើម្បីសម្រួលដល់ការសិក្សា និងការងាររបស់យើង ព្រមទាំងអាចស្វែងរកចំណេះដឹង និងព័ត៌មានទូទៅពី Chatbot ប្រភេទនេះបានច្រើន។ ចំណែកផលអវិជ្ជមានវិញ នៅពេលដែលយើងពឹងផ្អែកលើបច្ចេកវិទ្យា Chatbot នេះខ្លាំងពេក អាចធ្វើឱ្យមនុស្សខ្ជិល ឬមានទម្លាប់លែងគិត នៅធ្វើការ ឬរៀនសូត្រ ដែលប៉ះពាល់ដល់ជំនាញ គិតស៊ីជម្រៅ និងដោះស្រាយបញ្ហា៕