ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងអប់រំ យុវជន និងកីឡា របស់ប្រទេសកម្ពុជា និងក្រសួងអប់រំរបស់ប្រទេសចិន ទើបតែបានបញ្ចប់ការបណ្តុះបណ្តាលគ្រូជំនាញភាសាចិនចំនួន ២០នាក់បន្ថែមទៀត កាលពីថ្ងៃចន្ទ ដែលជាផ្នែកមួយនៃការជំរុញការសិក្សាភាសាបរទេសនៅសាលាចំណេះទូទៅរបស់កម្ពុជា។
គ្រូភាសាចិនចុងក្រោយនេះ នឹងធ្វើឲ្យគ្រូភាសាចិនដែលបណ្តុះបណ្តាលដោយប្រទេសទាំងពីរកើនដល់ ៦០នាក់ ចាប់តាំងពីឆ្នាំ ២០២៣មក។
លោកបណ្ឌិត ឡាយ សុវិជ្ជា អ្នកទទួលបន្ទុកសម្របសម្រួល គ្រូបង្រៀនភាសាចិន នៃក្រសួងអប់រំ យុវជន និងកីឡា ប្រាប់បណ្តាញផ្សព្វផ្សាយ AMS ថា គ្រូបង្រៀនភាសាចិន២០នាក់ដែលទើបទទួលបានការបណ្តុះបណ្តាលរយៈពេល ៥ថ្ងៃ នឹងត្រូវបង្រៀននៅថ្នាក់ទី ៧ ដល់ថ្នាក់ទី១១ ក្នុងវិទ្យាល័យ និងអនុវិទ្យាល័យសរុបចំនួន ៣១ នៅរាជធានីភ្នំពេញ ខេត្តព្រះសីហនុ ខេត្តសៀមរាប និងខេត្តកំពង់ចាម។
«កម្មវិធីអប់រំភាសាចិនហ្នឹងគឺកំពុងស្ថិតក្នុងដំណាក់កាលសាកល្បងនៅឡើយទេ ដែលក្រសួងអប់រំ បានសហការជាមួយក្រសួងអប់រំនៃសាធារណរដ្ឋប្រជាមានិតចិន អនុវត្តសាកល្បងរយៈពេល៥ឆ្នាំ គិតចាប់ពីឆ្នាំ ២០២៣ ដល់ឆ្នាំ ២០២៨»
បើតាមលោកបណ្ឌិត ឡាយ សុវិជ្ជា វគ្គបណ្តុះបណ្តាលនេះ រៀបចំឡើងក្នុងគោលបំណងពង្រឹងសមត្ថភាពបង្រៀន និងត្រៀមលក្ខណៈឱ្យបានល្អប្រសើរក្នុងការបំពេញតួនាទី និងភារកិច្ចជាមន្ត្រីជាប់កិច្ចសន្យាបង្រៀនភាសាចិននៅតាមសាលាគោលដៅសម្រាប់ឆ្នាំសិក្សា២០២៥-២០២៦។
បច្ចុប្បន្នក្រសួងអប់រំបានបញ្ជ្រាបការអប់រំភាសាបរទេសតាមគ្រឹះស្ថានសិក្សាសាធារណៈ ដូចជាភាសាអង់គ្លេស ភាសាបារាំង និងភាសាចិន។ ហើយសិស្សដែលកំពុងទទួលអត្ថប្រយោជន៍ពីការរៀនភាសាចិនមានចំនួន ២ម៉ឺននាក់, នេះបើយោងតាមបណ្ឌិត ឡាយ សុវិជ្ជា៕
