ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្នុងការរស់នៅប្រចាំថ្ងៃតែងមានរឿងរ៉ាវអវិជ្ជមានជាច្រើនកើតមានតាមរយៈបទពិសោធន៍ នៃភាពបរាជ័យ ឬក៏ការបដិសេធពីអ្នកដទៃ ដែលចំណុចទាំងនេះងាយដិតដាមនៅក្នុងចិត្តហើយប្រើពេលយូរក្នុងការកាត់ចោល។ មុននឹងចូលស៊ីជម្រៅអំពីឥទ្ធិពលនៃការគិតវិជ្ជមាន តើលោកអ្នកអាចរាប់បានទេថា តើមានប៉ុន្មានដងដែលធ្លាប់ទទួលរងនូវការបដិសេធ ឬបរាជ័យនូវរឿងដែលអ្នករំពឹងទុកជាខ្លាំង ? គិតមកដល់ចំណុចនេះ ខួរក្បាលរបស់អ្នកអាចនឹងនឹកទៅដល់រឿងរ៉ាវជាច្រើនដែលបានកើតឡើងក្នុងអតីតកាល ទាំងនេះក៏ដោយហេតុថា ការចងចាំរឿងអវិជ្ជមានជាធម្មជាតិនៃមនុស្ស។ ដែលកត្តាទាំងនេះហើយ បញ្ជាក់បានថាការគិតល្អៗ ទាមទារឱ្យមានការហ្វឹកហាត់ឱ្យស្ទាត់ និងជាប់ជាប្រចាំ។ យោងតាមគេហទំព័រ Theheartysoul បានបង្ហើបប្រាប់អំពីទម្លាប់បីចំណុច ក្នុងការបណ្តុះផ្នត់គំនិតឱ្យមានភាពវិជ្ជមាន។
១. ប្រើពេលបីនាទីទៅកត់ត្រាដំណើរជីវិតប្រចាំថ្ងៃ ៖ ការវិនិយាគពេលយ៉ាងហោចណាស់៣នាទី យកទៅសរសេរអំពីព្រឹត្តិការណ៍ដែលកើតមាននៅក្នុងដំណើរជីវិតរៀងរាល់ថ្ងៃ ដោយរៀបរាប់អំពីអ្វីដែលបានជួបប្រទះ ឬក៏ការដឹងគុណទៅកាន់អ្វីមួយ មិនថាមនុស្ស វត្ថុ សត្វ និងរុក្ខជាតិ។ ជាកិច្ចដំបូងអាចសរសេរការដឹងគុណទៅកាន់មនុស្សស្និទ្ធស្នាល ឬក៏អ្វីដែលលោកអ្នកមានមោទនភាពបំផុតនាថ្ងៃនេះ។ ឬក៏សកម្មភាពល្អៗដែលបានកើតឡើងក្នុងរយៈពេលមួយថ្ងៃ។
២. ស្ដាប់និងអានព័ត៌មានល្អៗរួមទាំងចែកចាយទៅកាន់អ្នកដទៃ ៖ បើបកស្រាយតាមផ្នែកចិត្តសាស្រ្តការជជែកអំពីរឿនមិនសប្បាយចិត្តជាមួយមនុស្សស្និទ្ធស្នាល ជាចំណែកជួយឱ្យលោកអ្នកមានអារម្មណ៍ធូរស្រាល មានផាសុកភាព និងកាត់បន្ថយស្រ្តេស យ៉ាងណាមិញចំណុចនេះមិនផ្ទុយដាច់ស្រឡះពីការស្ដាប់និងអានព័ត៌មានល្អៗរួមទាំងចែកចាយទៅកាន់អ្នកដទៃនោះទេ គ្រាន់តែការចែកចាយរឿងមិនល្អជាប្រចាំ វាបង្កទៅជាស្ថានភាពមិនល្អ ដែលគេនិយមហៅថាអាការៈពុល (Toxic ) ដូច្នេះការនិយាយរឿងអត់ល្អ មិនគួរកើតមានគ្រប់ពេលគ្រប់វេលានោះទេ។
ការចំណាយពេលទៅជជែកអំពីការទើសទាក់ចិត្ត ឬភាពមន្ទិលមិនសប្បាយចិត្តជាមួយនរណាម្នាក់ មិនថាគ្រួសារ ការងារ ឬក្រុមមនុស្សណានោះទេ ប្រសិនបណ្តោយឱ្យមានទម្លាប់នេះជារឿយៗ វាជាដើមចមក្នុងការបណ្តុះនូវផ្នត់គំនិតអវិជ្ជមានទៅក្នុងខួរក្បាល ឬជាធ្នាក់ដាក់អន្ទាក់ ឱ្យលង់ជ្រៅក្លាយទៅជាបុគ្គលទុទ្ទិដ្ឋិនិយមជានិច្ច។ ជំនួសមកវិញ លោកអ្នកអាចជ្រើសហេតុការណ៍ដ៏អស់សំណើចណាមួយមកជែក ឬក៏ការកម្សាន្តដ៏រីករាយកាលពីចុងសប្តាហ៍ ដែលទាំងនេះហើយជាការហ្វឹកហាត់ខួរក្បាលរបស់អ្នកឱ្យចាប់ផ្តើមផ្តោតលើភាពវិជ្ជមានបានច្រើនជាងមុន។
៣. បញ្ជ្រាបនិងសិក្សាអំពីឥរិយាបថល្អៗបន្ថែម ៖ ដើម្បីពង្រឹងទម្លាប់ប្រចាំថ្ងៃឱ្យមានភាពរីករាយ គឺវាពិតជាចាំបាច់ក្នុងការសិក្សាស្វែងយល់បន្ថែមអំពីទម្លាប់ល្អៗ ឥរិយាបថវិជ្ជមាន និងការផ្តល់ជាគំរូភាពទៅកាន់សហគមន៍ដែលខ្លួនកំពុងរស់នៅបច្ចុប្បន្ន ។ ជាឧទាហរណ៍ ប្រសិនបើលោកអ្នកមិនអាចទទួលយកនូវការប្រើប្រាស់ប្រយោគអសុរោះពីមជ្ឈដ្ឋានខាងក្រៅ ជាការឆ្លើយតបត្រឡប់នឹងស្ថានភាពទាំងនេះវិញមិនគួរប្រតិកម្មដោយភាសាគំរោះគំរើយនោះទេ គ្រាន់តែតបតដោយមិនខ្ជះខ្ជាយ ដោយភាសាធម្មតាៗតាមរបៀបដែលអ្នកនិយាយរាល់ថ្ងៃ ឬក៏ប្រាប់ទៅវិញតាមសម្រួលនូវការមិនពេញចិត្ត ដែលនេះចាត់ថាជាគំរូល្អមួយទៅកាន់សហគមន៍ដែលកំពុងរស់នៅ៕
