ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅប្រទេសកម្ពុជា ផ្លែចេកគឺជាផ្លែឈើមួយប្រភេទដែលងាយស្រួលរកបំផុត មានតម្លៃសមរម្យ និងមានវត្តមានស្ទើរគ្រប់ទីកន្លែង។ អ្នកដែលកំពុងសម្រកទម្ងន់មួយចំនួន តែងតែមើលរំលង និងកាត់បន្ថយការញ៉ាំផ្លែចេក ដោយសារតែវាមានផ្ទុកកាបូអ៊ីដ្រាត និងកាឡូរីខ្ពស់ជាងផ្លែឈើដទៃ។ ប៉ុន្តែអ្វីដែលគេច្រើនតែមិនបានដឹងនោះគឺ ផ្លែចេកសម្បូរទៅដោយសារធាតុចិញ្ចឹមសំខាន់ៗជាច្រើន ដែលផ្លែឈើផ្សេងទៀតគ្មាន។
ក្រៅពីមានរសជាតិឆ្ងាញ់ និងងាយស្រួលយកតាមខ្លួន ផ្លែចេកអាចញ៉ាំស្រស់ៗ ធ្វើជាទឹកក្រឡុក ញ៉ាំជាមួយទឹកដោះគោជូរ ឬយកទៅធ្វើជាបង្អែមផ្សេងៗបានយ៉ាងងាយ។ ខាងក្រោមនេះ គឺជាការបកស្រាយរបស់អ្នកជំនាញអំពីអត្ថប្រយោជន៍សុខភាពទាំង ៩ យ៉ាងរបស់ផ្លែចេក ដែលប្រជាជនយើងគួរយល់ដឹង៖
១. ជាអាហារសម្រន់ដ៏ល្អបំផុតក្រោយពេលហាត់ប្រាណរួច
ផ្លែចេក គឺជាអាហារដែលអត្តពលិកភាគច្រើនតែងតែទទួលទាន។ ពេលយើងបែកញើស រាងកាយនឹងបាត់បង់ជាតិទឹក និងអេឡិចត្រូលីត។ ផ្លែចេកមានផ្ទុក ប៉ូតាស្យូម (Potassium) ដែលជាអេឡិចត្រូលីតដ៏សំខាន់ជួយរក្សាតុល្យភាពជាតិទឹក និងធ្វើឱ្យសាច់ដុំដំណើរការបានល្អឡើងវិញ។ ក្រៅពីនេះ វាក៏ជួយបំពេញថាមពល (ជាតិស្ករ) ដែលសាច់ដុំបានដុតបំផ្លាញ អំឡុងពេលហាត់ប្រាណផងដែរ។
២. ជួយបន្សាបអាការៈហត់នឿយក្រោយពេលផឹកស្រា (Hangover)
ការញ៉ាំគ្រឿងស្រវឹង ធ្វើឱ្យរាងកាយបាត់បង់ជាតិទឹក និងសារធាតុរ៉ែសំខាន់ៗ ពិសេសប៉ូតាស្យូម ដែលជាហេតុធ្វើឱ្យអ្នកមានអារម្មណ៍ថា ស្រេកទឹក ឈឺក្បាល និងអស់កម្លាំងនៅព្រឹកបន្ទាប់។ ផ្លែចេកមានផ្ទុកជាតិទឹកដល់ទៅប្រមាណ ៧៥% និងមានប៉ូតាស្យូមខ្ពស់ ដែលជួយបំពេញជាតិទឹក និងសារធាតុរ៉ែដែលបាត់បង់ទាំងនោះមកវិញបានយ៉ាងឆាប់រហ័ស។
៣. ចេកខ្ចី ឬមិនទាន់ទុំខ្លាំង ជួយរក្សាលំនឹងជាតិស្ករក្នុងឈាម
នៅពេលចេកមិនទាន់ទុំល្អ វាមានផ្ទុកនូវ ម្សៅអសកម្ម (Resistant Starch) ខ្ពស់ ដែលជាប្រភេទជាតិសរសៃដែលក្រពះមិនអាចរំលាយបានលឿន។ ការរំលាយយឺតៗនេះ ជួយទប់ស្កាត់មិនឱ្យជាតិស្ករក្នុងឈាមកើនឡើងខ្លាំងភ្លាមៗនោះទេ បន្ទាប់ពីទទួលទានរួច។ ដូច្នេះ ការញ៉ាំចេកដែលទើបតែចាស់ ឬមិនទាន់ទុំជោរ គឺល្អសម្រាប់អ្នកចង់គ្រប់គ្រងជាតិស្ករ។
៤. ជំនួយដល់សុខភាពក្រពះពោះវៀន (Prebiotics)
ផ្លែចេកមានផ្ទុកសារធាតុ ព្រីបាយអូទិក (Prebiotics) ដូចជា Inulin និង Pectin ដែលដើរតួជា ”ចំណី” សម្រាប់ចិញ្ចឹមបាក់តេរីល្អៗ (Probiotics) នៅក្នុងពោះវៀនរបស់យើង។ ការមានបាក់តេរីល្អៗច្រើន ជួយឱ្យប្រព័ន្ធរំលាយអាហារដើរបានស្រួល និងជួយការពារពោះវៀនពីពពួកមេរោគដែលបង្កជំងឺផងដែរ។
៥. ការពារ និងជំនួយដល់សុខភាពបេះដូង
ប្រជាជនភាគច្រើន មិនសូវទទួលបានជាតិប៉ូតាស្យូមគ្រប់គ្រាន់ពីរបបអាហារប្រចាំថ្ងៃនោះទេ។ ប៉ូតាស្យូម មានតួនាទីយ៉ាងសំខាន់ក្នុងការសម្រួលដល់សរសៃឈាម ធ្វើឱ្យបេះដូងងាយស្រួលក្នុងការច្របាច់ឈាមទៅចិញ្ចឹមរាងកាយ និងជួយរក្សាលំនឹងសម្ពាធឈាម។ ផ្លែចេកទំហំមធ្យមមួយផ្លែ អាចផ្តល់ប៉ូតាស្យូមប្រមាណ ៩% នៃតម្រូវការប្រចាំថ្ងៃរបស់រាងកាយ។
៦. សម្បូរដោយសារធាតុប្រឆាំងអុកស៊ីតកម្ម ការពារជំងឺរ៉ាំរ៉ៃ
និយាយពីវីតាមីន C គេតែងនឹកឃើញដល់ផ្លែក្រូច ប៉ុន្តែផ្លែចេកក៏សម្បូរវីតាមីន C ផងដែរ (ប្រហែល ១១% នៃតម្រូវការប្រចាំថ្ងៃ) ដែលជួយពង្រឹងប្រព័ន្ធការពាររាងកាយ។ ជាងនេះទៅទៀត ចេកមានផ្ទុកសារធាតុរុក្ខជាតិជាច្រើន ដែលជួយប្រឆាំងនឹង ”រ៉ាឌីកាល់សេរី” ដែលជាភ្នាក់ងារធ្វើឱ្យកោសិកាចាស់មុនវ័យ និងបង្កជាជំងឺផ្សេងៗ ថែមទាំងអាចមានសក្តានុពលក្នុងការការពារជំងឺមហារីកមួយចំនួនទៀតផង។
៧. អាចជួយឱ្យអ្នកគេងលក់បានស្រួល
បើអ្នកពិបាកគេងលក់ ផ្លែចេកអាចជាជំនួយការថ្មីរបស់អ្នក។ ចេកមានផ្ទុកអាស៊ីតអាមីណូមួយឈ្មោះថា Tryptophan ដែលរាងកាយនឹងបំប្លែងវាទៅជា អ័រម៉ូនមេឡាតូនីន (Melatonin) និងសេរ៉ូតូនីន (Serotonin) ដែលជួយគ្រប់គ្រងវដ្តនៃការគេង និងជួយឱ្យអារម្មណ៍ស្ងប់។ លើសពីនេះ ជាតិម៉ាញេស្យូម (Magnesium) នៅក្នុងផ្លែចេក ក៏មានតួនាទីជួយឱ្យសាច់ដុំសម្រាក និងគេងលក់ស្កប់ស្កល់ផងដែរ។
៨. ដោះស្រាយបញ្ហារំលាយអាហារ
ក្នុងក្បួនពេទ្យ ផ្លែចេកគឺជាជម្រើសអាហារដំបូងគេ (ក្នុងរបបអាហារ BRAT) សម្រាប់អ្នកដែលមានបញ្ហាក្រពះពោះវៀន។ ជាតិសរសៃរលាយ (Soluble Fiber) ក្នុងផ្លែចេក អាចជួយធ្វើឱ្យលាមកទន់ ដែលសម្រួលដល់ការទល់លាមក ខណៈដែលជាតិប៉ូតាស្យូមខ្ពស់របស់វា ជួយបំពេញជាតិទឹកដល់អ្នកដែលកំពុងមានអាការៈរាគរូស។
៩. ជួយកាត់បន្ថយអាការៈមុនពេលមករដូវ (PMS) របស់ស្ត្រី
ការសិក្សាបានបង្ហាញថា ផ្លែចេកអាចជួយសម្រាលអាការៈមិនស្រួលផ្សេងៗមុនពេលស្ត្រីមករដូវ។ ជាតិកាល់ស្យូម និងម៉ាញេស្យូមក្នុងផ្លែចេក ជួយកាត់បន្ថយការឈឺចាប់ និងអាការៈហើមពោះ។ ចំណែកឯវីតាមីន B6 ដ៏ច្រើននៅក្នុងផ្លែចេក ត្រូវបានអ្នកវិទ្យាសាស្ត្ររកឃើញថា អាចជួយកាត់បន្ថយភាពតានតឹង អារម្មណ៍មួម៉ៅ និងការថប់បារម្ភបានយ៉ាងមានប្រសិទ្ធភាព។
សរុបសេចក្តីមក៖ ផ្លែចេកមិនត្រឹមតែជាផ្លែឈើដែលមានតម្លៃថោក និងងាយស្រួលរកក្នុងទីផ្សារកម្ពុជាយើងប៉ុណ្ណោះទេ ប៉ុន្តែវាជា ”ឱសថធម្មជាតិ” និងជាប្រភពនៃសារធាតុចិញ្ចឹមដ៏មានតម្លៃ។ កុំភ្លេចបន្ថែមផ្លែចេកទៅក្នុងរបបអាហារប្រចាំថ្ងៃរបស់អ្នក ដើម្បីទទួលបានអត្ថប្រយោជន៍សុខភាពទាំងនេះ៕
ប្រភព ៖ Everydayhealth
