នៅចក្រភពអង់គ្លេស ពេលវេលានៃការចាក់ផ្សាយ «អាហារដែលមិនមានសុវត្ថិភាពសម្រាប់កុមារ» ត្រូវរងចាំរហូតដល់ម៉ោង ៩យប់ទើបអាចផ្សាយនៅលើបណ្ដាញសង្គម និងទូរទស្សន៍បាន។ ច្បាប់នេះ នឹងត្រូវអនុវត្តចាប់ពីខែ តុលា ឆ្នាំ ២០២៥ ដោយការផ្សាយពាណិជ្ជកម្មអាហារមិនល្អ (Junk Food) នឹងត្រូវបានដាក់កម្រិតចំពោះការផ្សព្វផ្សាយ ជាពិសេស គឺអាហារ មានជាតិខ្លាញ់ អំបិល និងស្ករខ្ពស់។ នេះបើតាមការផ្សាយរបស់ Euro News ។

លោក Andrew Gwynne រដ្ឋមន្ត្រីសុខាភិបាលអង់គ្លេស បានបញ្ជាក់ថា ការផ្សាយពាណិជ្ជកម្ម អាហារមិនល្អ (Junk Food) នឹងត្រូវបានបញ្ចូលទៅក្នុងបញ្ជីនៃមាតិកា ដែលត្រូវបានហាមឃាត់ ដូចគ្នាទៅនឹងមាតិកាពាក់ព័ន្ធនឹងល្បែងស៊ីសង គ្រឿងស្រវឹង និងស្រោមអនាម័យជាដើម។ លោកបន្តថា នេះជាផ្នែកមួយនៃការលើកកម្ពស់សុខភាពសាធារណៈ និងការពង្រឹងសុខភាពប្រជាជន ព្រមទាំងកាត់បន្ថយសម្ពាធលើសេវាសុខភាពជាតិ (National Health Service – NHS) ដែលជាប្រព័ន្ធថែទាំសុខភាពដោយឥតគិតថ្លៃរបស់ប្រទេសអង់គ្លេស, ខណៈការផ្ដល់សេវានេះកំពុងប្រឈមនឹងបញ្ហាសេដ្ឋកិច្ចធ្ងន់ធ្ងរ។

លោក Gwynne បានពន្យល់ថា នេះគឺជាវិធានការ ដែលទប់ទល់នឹងជំងឺដែលអាចការពារបាន។ លោកបានសរសេរនៅក្នុងសេចក្ដីថ្លែងការណ៍មួយទៅកាន់សភាថា «សម្ពាធមួយក្នុងចំណោមសម្ពាធជាច្រើននៃបញ្ហាសុខភាពសាធារណៈអង់គ្លេស គឺវិបត្តិលើសទម្ងន់ក្នុងវ័យកុមារ, ការធ្វើឱ្យកុមារមានសុខភាពមិនល្អ និងបង្កើតសម្ពាធកាន់តែខ្លាំងលើ NHS»។

ទិន្នន័យរបស់ក្រសួងសុខាភិបាលអង់គ្លេស បានបង្ហាញថា កុមារម្នាក់ ក្នុងចំណោម ៥នាក់ កំពុងលើសទម្ងន់ ឬរស់នៅជាមួយភាពធាត់មុនពេលដែលពួកគេចូលរៀនថ្នាក់បឋមសិក្សា (អាយុ ៥ឆ្នាំ)។ ទិន្នន័យនឹងកើនឡើងដល់ជាងមួយភាគបី នៅពេលដែលកុមារចាកចេញពីថ្នាក់បឋមសិក្សា (អាយុ ១១ឆ្នាំ)។ តួលេខនេះមានភាពស៊ីសង្វាក់គ្នាជាមួយនឹង ទិន្នន័យរបស់ WHO European Childhood Surveillance Initiative (COSI) ចន្លោះឆ្នាំ ២០១៨ និង ២០២០ ដែលបានរកឃើញថា នៅប្រទេសទាំង ៣៣ ក្នុងទ្វីបអឺរ៉ុប មានអត្រាកុមារ ចាប់ពី ៧ ទៅ ៩ឆ្នាំ ចំនួន ២៩ភាគរយ កំពុងលើសទម្ងន់។

ច្បាប់ថ្មីនេះក៏បានកំណត់ថា អាហារមិនល្អសម្រាប់កុមារ ដូចជា ស្ករគ្រាប់ ការ៉េម និងសូដា នឹងត្រូវហាមឃាត់មិនឱ្យផ្សាយពាណិជ្ជកម្មដល់កុមារ អាយុក្រោម ១៨ឆ្នាំ។ ខណៈនៅទូទាំងសហភាពអឺរ៉ុប ឧស្សាហកម្មនេះ ភាគច្រើនត្រូវបានអនុញ្ញាតឱ្យគ្រប់គ្រងដោយខ្លួនឯង (Self-regulate) និងមិនត្រូវបានអនុញ្ញាតឱ្យផ្សាយអាហារ ដែលមិនស្របតាមស្ដង់ដាអាហាររូបត្ថម្ភ ដល់កុមារអាយុក្រោយ ១៣ឆ្នាំនោះទេ៕