ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅចុងសប្តាហ៍នេះ ពោលគឺនៅថ្ងៃទី១៩ និងថ្ងៃទី២០ ខែកក្កដា ឆ្នាំ២០២៥ មហោស្រពបច្ចេកវិទ្យាមេគង្គលើកទី៣ នឹងប្រព្រឹត្តធ្វើចាប់ពីម៉ោង៦ព្រឹក ដល់ម៉ោង៦ល្ងាច នៅ Factory Phnom Penh ក្រោមប្រធានបទ “ការរចនាអនាគតសម្រាប់យុវជនជំនាន់ក្រោយ” ដើម្បីជួយជាគន្លឹះដល់យុវជនក្នុងការរៀបចំអនាគតរបស់ពួកគេ នាយុគ្គសម័យបច្ចេកវិទ្យាឌីជីថល។
ក្នុងមហោស្រពនោះ វាគ្មិនជំនាញដែលមានបទពិសោធន៍ជាច្រើនឆ្នាំ នឹងមកបកស្រាយអំពីចំណេះ ជំនាញ បទពិសោធន៍នៅក្នុងវិស័យរបស់ខ្លួនទាក់ទិននឹងបច្ចេកវិទ្យាឌីជីថល និងនវានុវត្តន៍ ដែលមានប្រធានបទផ្តោតលើបរិវត្តកម្មឌីជីថលលើ វិស័យអប់រំ ការផ្សព្វផ្សាយ ការផលិតមាតិកា កីឡាអេឡិចត្រូនិក និងសហគ្រិនភាព វិទ្យាសាស្រ្ត បច្ចេកវិទ្យា ការសរសេរកូដ ការសរសេរកម្មវិធី បញ្ញាសិប្បនិម្មិត បច្ចេកវិទ្យាដ្រូន នវានុវត្តន៍បរិស្ថានជាដើម។ ជាមួយគ្នា ក៏មានកិច្ចពិភាក្សាដោយមានការចូលរួមដោយតំណាងក្រសួង និងដៃគូសហការរួមមាន ក្រសួងប្រៃសណីយ៍ និងទូរគមនាគមន៍ ក្រសួងរៀបចំដែនដី នគរូបនីយកម្ម និងសំណង់ ក្រុមប្រឹក្សាអភិវឌ្ឍន៍កម្ពុជា ក្រសួងការងារ និងបណ្តុះបណ្តាលវិជ្ជាជីវៈ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។
បន្ថែមពីនេះ នៅក្នុងអំឡុងពេលពីរថ្ងៃពេញ មហោស្រពក៏មានព្រឹត្តិការណ៍ជាច្រើនទៀត ដូចជា ការតាំងបង្ហាញនូវមនុស្សយន្ត បច្ចេកវិទ្យានវានុវត្តន៍ ដែលជាផលិតផល និងសេវាកម្មរបស់កូនខ្មែរ ពោរពេញទៅដោយភាពច្នៃប្រឌិត និងរបកគំហើញថ្មីៗ, ការប្រកួតគម្រោងយុវជនបច្ចេកវិទ្យានវានុវត្តន៍ចតុមុខ ដែលសិស្សានុសិស្សអាចប្រកួតប្រជែងស្នាដៃបច្ចេកវិទ្យាឌីជីថល និងស្នាដៃនវានុវត្តន៍របស់ខ្លួន ដើម្បីទទួលបានជ័យលាភីរង្វាន់ ២ពាន់ដុល្លារ ព្រមជាមួយវេទិកាសន្ទនាប្រតិបត្តិ ដែលជាវេទិកា Networking ដើម្បីភ្ជាប់ទំនាក់ទំនងរវាងយុវជនដែលមានគម្រោងស្នាដៃបង្កើតថ្មី និងអ្នកវិនិយោគគិន ធុរជន ដើម្បីទទួលបានបទពិសោធន៍ថ្មីៗ។
ក្រៅពីនោះ អ្នកទស្សនាក៏អាចធ្វើដំណើរទៅតាមទីតាំងអាហារផ្សេងៗ រួមជាមួយការរាំលេងសប្បាយជាមួយការប្រគុំតន្រ្តីរបស់សិល្បៈករដែលមានទេពកោសល្យផងដែរ។
ដូច្នេះ ប្រសិនបើអ្នកកំពុងតែឆ្ងល់ថា តើយុវជនជំនាន់ក្រោយគួររៀបចំរចនាអនាគតដូចម្តេចខ្លះនាយុគ្គសម័យបច្ចេកវិទ្យាឌីជីថល នាពេលបច្ចុប្បន្ន និងអនាគត សូមកុំភ្លេចចូលរួមមហោស្រពបច្ចេកវិទ្យាមេគង្គ នៅថ្ងៃសៅរ៍ អាទិត្យ ចុងសប្តាហ៍នេះ៕
