ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សុជីវធម៌ មិនត្រឹមតែបង្កើននូវភាពទាក់ទាញចំពោះខ្លួនឯងប៉ុណ្ណោះទេ ប៉ុន្តែជាជំនាញ ឬវិធីសាស្រ្តក្នុងការធ្វើឱ្យអ្នកដទៃកាន់តែមានអារម្មណ៍ល្អចំពោះខ្លួន តាមរយៈការមានទំនាក់ទំនងដែលយល់ចិត្តស៊ីជម្រៅ និងការផ្តល់តម្លៃរាល់វត្តមានរបស់មនុស្សគ្រប់គ្នាដែលបានជួប ដែលសកម្មភាពទាំងនេះ ប្រើប្រាស់បានទាំងនៅក្នុងការពង្រឹងទំនាក់ទំនង ការបង្កើតមិត្តថ្មីៗ ពង្រឹងអាជីពវិជ្ជាជីវៈ ឬក៏ការក្លាយជាមេដឹងនាំដែលមានថាមពលវិជ្ជមានជាដើម ការយល់ដឹងបន្ថែម អំពីការប្រើប្រាស់សុជីវធម៌ជាមួយអ្នកដ៏ទៃ មានសារៈប្រយោជន៍ទាំងក្នុងដំណើរជីវិតផ្ទាល់ខ្លួន និងអាជីពវិជ្ជាជីវៈ។
តាមរយៈគេហទំព័រ Familyminded បានបង្ហាញអំពីគន្លឹះមួយចំនួន ក្នុងការអភិវឌ្ឍជំនាញនៃការប្រើទង្វើសុជីវធម៌ ជាមួយអ្នកដទៃ ដោយមានលម្អិតដូចតទៅ ៖
១. ផ្តល់ក្រសែភ្នែកមុនពេលចាប់ផ្តើមសន្ទនា ៖ សុជីវធម៌ មិនមែនជាជំនាញ ដែលលំបាកពេកនោះទេ ប៉ុន្តែត្រូវការអនុវត្តដោយចាប់ផ្តើមពីទម្លាប់ប្រចាំថ្ងៃទៅ ដោយសារតែមនុស្សចាប់អារម្មណ៍គ្នាដំបូងៗ ទៅលើរបៀបរបបនិយាយស្ដី និងរបៀបដែលផ្សារភ្ជាប់ទំនាក់ទំនងគ្នាជាដើម។ ងាយមកនិយាយអំពីការប្រើប្រាស់ក្រសែភ្នែកវិញ ហេតុអ្វីបានជាសំខាន់ខ្លាំងនៅក្នុងការប្រាស្រ័យទាក់ទង? ហើយហេតុអ្វីបានជាអាចវាស់វែងពីការប្រើប្រាស់សីលធម៌ សុជីវធម៌ផ្ទាល់ខ្លួនចំពោះអ្នកដទៃបាន? ការសម្លឹងកែវភ្នែក ឬទឹកមុខរបស់អ្នកដទៃដោយសុទ្ធចិត្ត បានបង្ហាញពីភាពជឿជាក់គ្នាទៅវិញទៅមក ការសម្លឹងទឹកមុខគ្នាបង្ហាញពីការនៅជាមួយបច្ចុប្បន្នភាព តែយ៉ាងណាក៏ដោយ សូមសម្លឹងក្នុងរយៈពេលសមល្មមបានហើយ! ព្រោះការសម្លឹងយូរៗពេក ក៏អាចបង្កើតបាននូវអារម្មណ៍គ្មានផាសុកភាព ឬក៏អារម្មណ៍ឃ្លាតឆ្ងាយពីគ្នាទៅវិញ។
២. ប្រើប្រាស់ឈ្មោះដែលត្រឹមត្រូវ ៖ ការសម្គាល់ ឬហៅឈ្មោះនរណាម្នាក់ គឺជាការបង្ហាញពីការយកចិត្តទុកដាក់ និងធ្វើឱ្យអារម្មណ៍របស់ភាគីម្ខាងទៀតកាន់តែមានភាពជិតស្និទ្ធជាមួយនឹងការសន្ទនា ឬក៏បរិយាកាសណាមួយ រួមទាំងបង្ហាញពីការផ្តល់តម្លៃដល់ភាគីម្ខាងទៀត។ ទន្ទឹមគ្មាននឹងការហៅឈ្មោះ អ្វីដែលគួរតែយកចិត្តទុកដាក់បន្ថែម គឺការហៅឈ្មោះឱ្យបានត្រឹមត្រូវ ហើយប្រើប្រាស់ឈ្មោះទៀតសោត គួរប្រើមួយដង ទៅពីរដងបានហើយ ការហៅឈ្មោះច្រើនដងពេក បង្កើតបានទៅជាភាពធុញទ្រាន់ជំនួសឱ្យអារម្មណ៍សំខាន់ទៅវិញ។
៣. និយាយដោយកម្លាំងថាមពល មិនមែនតម្លើងសម្លេង ៖ វិធីដ៏សាមញ្ញមួយ ក្នុងការបង្ហាញចំណាប់អារម្មណ៍ ឬសុជីវធម៌ផ្ទាល់ខ្លួនទៅកាន់អ្នកដទៃ ក៏ដូចជាការទាក់ទាញចំណាប់អារម្មណ៍ចំពោះខ្លួនឯងផង គឺការនិយាយដោយពាក្យច្បាស់ៗ មួយៗ ព្រមជាមួយសម្លេងដែលមានថាមពល តែមិនមែនស្រែកខ្លាំងៗ។
៤. សំណួរដែលលើសពីការសួរសុខទុក្ខ ៖ ការសន្ទនា ដែលប្រើពេលតិច ប៉ុន្តែមានន័យ, ការសួរសំណួរបើក ជារឿងល្អហើយក្នុងការចាប់ផ្តើមកិច្ចសន្ទនាដំបូងៗ ប៉ុន្តែយ៉ាងណាគួរត្រៀមសំណួរឱ្យបានច្រើន ឬក៏សំណួរដែលមានអត្ថន័យណាមួយ ដែលសមស្របទៅនឹងកាលៈទេសៈ ឬសំណួរដែលអាចឱ្យភាគីម្ខាងទៀតអាចបញ្ចេញគំនិត និងការគិតអំពីករណីសិក្សាណាមួយ។
៥. ផ្តល់ស្នាមញញឹមដែលចេញពីចិត្ត ៖ ការញញឹមដែលចេញពីចិត្ត ក៏មានឥទ្ធិពលធ្វើឱ្យមនុស្សមិនធ្លាប់ស្គាល់គ្នាក្លាយជាមិត្តនឹងគ្នាបាន ដូចជាការញញឹមស្វាគមន៍គ្នា ឬក៏ញញឹមអបអរសាទរគ្នាជាដើម។
៦. យកចិត្តទុកដាក់ទាំងភាសាកាយវិការ ៖ ក្នុងការធ្វើឱ្យអ្នកដទៃកាន់តែយល់អំពីន័យដែលចង់បង្ហាញចេញក្រៅ ឬការផ្តល់ទង្វើសុជីវធម៌ជាមួយអ្នកដទៃ បើត្រឹមតែនិយាយមួយមុខ នៅមិនទាន់គ្រប់គ្រាន់នៅឡើយទេ អ្វីដែលចំណុចសំខាន់បន្ថែមគឺ ការប្រើប្រាស់កាយវិការបន្ថែមដោយភាពសមរម្យ៕
