ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ក្រសួងសុខាភិបាលកាលពីថ្ងៃចន្ទ (៣០ ធ្នូ) បានធ្វើការអំពាវនាវដល់បងប្អូនប្រជាពលរដ្ឋទាំងអស់ឱ្យមានការប្រុងប្រយ័ត្នការពារសុខភាពពីជំងឺផ្លូវដង្ហើមគ្រប់ប្រភេទ ពិសេស យូមិនមេតាភ្នឺម៉ូវីរុស នៅអំឡុងពេលអាកាសធាតុចុះត្រជាក់។
ក្រសួងសុខាភិបាលបានឱ្យដឹងថា កាលពីពេលថ្មីៗនេះ បណ្តាញផ្សព្វផ្សាយព័ត៌មានមួយចំនួនបានផ្សាយព័ត៌មានស្តីពីការផ្ទុះឡើងនៃយូមិនមេតាភ្នឺម៉ូវីរុស (human metapneumovirus) បង្កឱ្យមានជំងឺផ្លូវដង្ហើម។ បើតាមក្រសួង វីរុសនេះ បង្កឱ្យមានជំងឺផ្លូវដង្ហើម ដែលមានរោគសញ្ញាស្រដៀងទៅនឹងជំងឺផ្តាសាយធំ ដូចជា គ្រុនផ្តាសាយ ហូរសំបោរ រលាកបំពង់ក ក្អក កណ្តាស់។ យូមិនមេតាភ្នឺម៉ូវីរុស អាចបណ្តាលជាជំងឺធ្ងន់ធ្ងរលើទារក កុមារ មនុស្សវ័យចំណាស់លើសពី ៦៥ឆ្នាំ ឬអ្នកមានប្រព័ន្ធការពាររាងកាយខ្សោយ។
យូមិនមេតាភ្នឺម៉ូវីរុស ត្រូវបានរកឃើញដំបូងក្នុងឆ្នាំ២០០១ នៅប្រទេសហូឡង់ ហើយប្រទេសកម្ពុជាក៏ធ្លាប់រកឃើញជំងឺនេះលើកុមារក្នុងអំឡុងឆ្នាំ២០០៧ ដល់ឆ្នាំ២០០៩។ នៅកម្ពុជា ដោយសារអាកាសធាតុមិនត្រជាក់ខ្លាំង ជំងឺនេះមិនសូវធ្ងន់ធ្ងរដូចជំងឺផ្តាសាយធំទេ ហើយកុមារភាគច្រើនបានជាសះស្បើយឡើងវិញ។ អ្នកវិទ្យាសាស្រ្តបានប៉ាន់ស្មានថា ប្រហែល ១០ ទៅ ១២ភាគរយ នៃជំងឺផ្លូវដង្ហើមចំពោះកុមារ គឺបណ្តាលមកពីយូមិនមេតាភ្នឺម៉ូវីរុស តែករណីភាគច្រើនគឺស្រាល ប៉ុន្តែប្រហែលពី ៦ ទៅ១៦ភាគរយ នៃកុមារនឹងវិវត្តទៅជាជំងឺរលាកទងសួត រលាកសួត។
ជាមួយគ្នានេះ ក្រសួងសុខាភិបាលបានបង្ហាញពីរបៀបចម្លងនៃមេរោគ យូមិនមេតាភ្នឺម៉ូវីរុស ដោយវាឆ្លងតាមរយៈការក្អក និងកណ្តាស់ ឬការប៉ះពាល់ជិតស្និទ្ធ ដូចជាការប៉ះ ឬចាប់ដៃ ឱប ថើប ប៉ះវត្ថុ ឬផ្ទៃដែលមានមេរោគ បន្ទាប់មកប៉ះមាត់ ច្រមុះ ឬភ្នែក។
ដោយឡែករោគសញ្ញានៃជំងឺនេះ រួមមាន ៖ ក្អក គ្រុនក្តៅ តឹងច្រមុះ ហូរសំបោរ និងហត់ (ដង្ហើមខ្លី) អាចវិវត្តទៅជាជំងឺរលាកទងសួត ឬជំងឺរលាកសួត ហើយស្រដៀងគ្នាទៅនឹងរោគសញ្ញានៃជំងឺផ្លូវដង្ហើមដែលបណ្តាលមកពីមេរោគផ្សេងទៀត។ រយៈពេលពីការឆ្លងទៅដល់ចេញរោគសញ្ញា (រយៈពេលសំងំ) គឺពី ៣ ទៅ៦ថ្ងៃ។
យ៉ាងណាក៏ដោយ ក្រសួងសុខាភិបាលក៏បានបង្ហាញពីរបៀបបង្ការពីគ្រប់ប្រភេទវីរុស និងមេរោគបង្កជំងឺផ្លូវដង្ហើម ដោយត្រូវអនុវត្តដូចជា ៖ ត្រូវប្រកាន់អនាម័យ លាងសម្អាតដៃឱ្យបានញឹកញាប់ជាមួយសាប៊ូ ឬទឹកអាល់កុលលាងដៃ ហើយចៀសវាងយកដៃទៅប៉ះពាល់ភ្នែក ច្រមុះ និងមាត់ ប្រសិនបើមិនទាន់បានលាងសម្អាតទេនោះ, ពេលក្អក ឬកណ្តាស់ សូមខ្ទប់មាត់ជាមួយក្រដាស ក្រណាត់ ឬកន្សែងស្អាត ប្រើផ្នត់កែងដៃអាចខ្ទប់មាត់ និងពាក់ម៉ាស់ ដើម្បីបង្ការការចម្លងទៅអ្នកដទៃ, មិនត្រូវប្រើបាតដៃខ្ទប់មាត់ផ្ទាល់ទេ។
បើប្រាស្រ័យទាក់ទងជាមួយអ្នកឈឺ ត្រូវចេះការពារខ្លួនកុំឱ្យមានការចម្លងមេរោគ ដោយត្រូវពាក់ម៉ាស និងអនុវត្តវិធានការបង្ការការចម្លងដូចរៀបរាប់ខាងលើ, ចៀសវាងការចែករំលែកកែវទឹក និងបរិក្ខាបរិភោគជាមួយអ្នកដទៃ, នៅពេលអាកាសធាតុចុះត្រជាក់ សូមស្លៀកពាក់សម្លៀកបំពាក់ក្រាស់សមស្រប ដើម្បីបង្ការភាពត្រជាក់ ជាពិសេសទារក កុមារ និងមនុស្សវ័យចំណាស់ ដែលងាយនឹងឈឺដោយសារអាកាសធាតុត្រជាក់។
សូមស្វែងរកការពិគ្រោះជំងឺនៅមណ្ឌលសុខភាព ឬមន្ទីរពេទ្យ ប្រសិនបើមានរោគសញ្ញា ពិបាកដកដង្ហើម គ្រុនក្តៅ ក្អក ឈឺក និងឈឺសាច់ដុំ ឬមានបញ្ហាសុខភាពផ្សេងទៀត។ ក្នុងករណី ឃើញមានជំងឺផ្តាសាយកើតឡើងច្រើនក្នុងសហគមន៍ សូមរាយការណ៍ជាបន្ទាន់ទៅលេខ ១១៥៕
