ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ថែទាំសួនច្បារ ចម្អិនម្ហូបអាហារ និងលំហែកាយក្នុងបរិយាយកាសដែលមានធម្មជាតិនៅឱកាសចុងសប្តាហ៍ គឺជាសកម្មភាពជួយពង្រឹងស្មារតីឱ្យមានភាពនឹងនរ រួមទាំងជាវិធីរុករកសេចក្ដីសុខដោយភាពស្ងប់ស្ងាត់។ យោងតាមគេហទំព័រ India Times បានបង្ហាញសកម្មភាពប្រាំចំណុចសម្រាប់ធ្វើពេលទំនេរ ដើម្បីពង្រឹងស្មារតីឱ្យនឹងនរផង និងបង្កើនសុខុដុមរមនាក្នុងការរស់នៅប្រចាំថ្ងៃផង។
១. ប៉ាក់ឌិនម៉ូតទៅលើក្រណាត់ ៖ ការប្រើប្រាស់ពេលទំនេរដើម្បីយកទៅរចនាម៉ូតលើក្រណាត់ដោយការប៉ាក់ឌិនដូចជា រូបសត្វ ផ្កា ឬតាមបែបសិល្បៈនានាដែលខ្លួនចូលចិត្ត មិនត្រឹមតែផ្តល់នូវភាពរីករាយនិងបំពេញសេចក្ដីត្រូវការប៉ុណ្ណោះទេ ប៉ុន្តែតាមរយៈការចំណាយពេលទៅផ្ចិតផ្ចង់ធ្វើសកម្មភាពទាំងនោះវាបានបង្កើននូវភាពអត់ធ្មត់ រួមទាំងសមត្ថភាពនៃការផ្តោតចំពោះភារកិច្ចនីមួយៗ។ ដោយហេតុថា ការប៉ាក់ឌិន ឬរចនាម៉ូតអ្វីមួយទៅលើក្រណាត់ វាមានភាពជំពាក់ស្មុគស្មាញ ដែលតម្រូវឱ្យស្មារតីស្ថិតក្នុងបច្ចុប្បន្នភាពជានិច្ច ដែលចំណុចនេះក៏ប្រៀបបាននឹងការសមាធិយ៉ាងដូច្នោះដែរ។
២. សង្កេតអំពីដំណើរជីវិតរបស់សត្វបក្សី ៖ សង្កេតមើលរបៀបរស់នៅរបស់សត្វបក្សី មិនថាបក្សីនៅក្នុងសួនដែលត្រូវបានចិញ្ចឹម ឬសត្វនៅតាមទីព្រៃប្រឹក្សានោះទេ ហើយការទស្សនាទៀតសោធន៍ អាចមើលដោយភ្នែកផ្ទាល់ ឬក៏ប្រើកែវយឹតក៏បាន ព្រោះកាលដែលវិនិយោគពេល ទៅពិនិត្យអំពីដំណើរនៃការរស់នៅនិងអាកប្បកិរិយារបស់សត្វ សុទ្ធសឹងតែជាចំណែកជួយឱ្យមនុស្សបង្កើនការចងចាំ យល់អំពីគុណតម្លៃនៃធម្មជាតិ រួមទាំងជំរុញជំនាញស្រមើស្រមៃ។
៣. រក្សានិងថែទាំសួនច្បារ ៖ ទីតាំងបរិវេណតូចធំ មិនមែនជាចំណោទនៃបញ្ហាប៉ុន្មានទេ អត្ថប្រយោជន៍នៃការថែទាំសួនច្បារ គឺបានផ្សារភ្ជាប់ខ្លួនឯងជាមួយនឹងធម្មជាតិ បង្កើនភាពស្រស់ស្រាយតាមរយៈសមិទ្ធផលដែលទទួលបានពីការថែសួនពីថ្វីដៃដែលខ្លួនបានធ្វើកន្លងមក។ ចំពោះសកម្មភាពនៃការថែទាំ ទាំងនោះមានដូចជា រៀបចំថូ ជីកកកាយដី ដាក់ជី ដាំគ្រាប់ពូជ កាត់តម្រឹមផ្កា ឬស្រោចទឹកជាដើម ដែលសកម្មភាពសាមញ្ញៗទាំងនេះហើយ សុទ្ធសឹងជាការរួមចំណែកបង្កើននូវសុភមង្គលដោយភាពស្ងប់ស្ងាត់។
៤. អាន ៖ ក្នុងបរិបទបច្ចុប្បន្ន មនុស្សទទួលបានការរំខានជាច្រើនពីបណ្តាញសង្គមផង និងមជ្ឈដ្ឋាននានាផង ហើយការអានជាចំណែកកាត់បន្ថយការរំខានទាំងនោះប្រកបដោយប្រសិទ្ធភាព និងភាពវិជ្ជមាន។ ងប់ងល់ពេលវេលា ទៅក្នុងទំព័រសៀវភៅ ឬជំពូកអំណានណាមួយ តាមរយៈអត្ថបទនិពន្ធដ៏មានភាពប៉ិនប្រសប់ មិនថាសំណេរ ឬកំណាព្យនោះទេ គឺជាចំណែកនាំទៅពង្រឹងជំនាញគិតបែបច្នៃប្រតិដ្ឋ ជំនាញស្រមើស្រមៃ រួមទាំងទទួលបានការជំរុញចិត្ត ឬលើកទឹកពីឃ្លាល្បះណាមួយ ដើម្បីបំពេញន័យទៅក្នុងជីវិតរស់នៅ។
៥. ថតរូបនៅទីតាំងដែលមានធម្មជាតិ ៖ សាកល្បងប្រើប្រាស់កាមេរ៉ាដែលមាននៅក្នុងដៃ រួចចេញទៅក្រៅដើម្បីថតរូបប្លែកៗ ជាពិសេសនៅកន្លែងដែលមានបរិយាកាសធម្មជាតិ ឬមានសត្វព្រៃ រុក្ខជាតិ ផ្កា ពីព្រោះសកម្មភាពទាំងនេះជួយឱ្យលោកអ្នកមានឱកាសស្វែងយល់បន្ថែមអំពីភាពស្រស់ស្អាតរបស់ធម្មជាតិ ឬអ្វីៗដែលកើតមាននៅជុំវិញខ្លួន។ ទម្លាប់មួយនេះក៏បានបង្កើតនូវឱកាសផ្សារភ្ជាប់ទៅកាន់ពិភពខាងក្រៅ ចេះរីករាយជាមួយនឹងសកម្មភាពសាមញ្ញៗ រួមទាំងចេះពេញចិត្តនឹងដំណើរជីវិតដែលកំពុងមាននៅពេលបច្ចុប្បន្ន៕
