សុខភាពផ្លូវចិត្ត ពិតជាសំខាន់ មិន​ចាញ់សុខភាពផ្លូវកាយប៉ុន្មាននោះទេ។ នៅពេល​ដែល​យើង​មាន​សុខភាពផ្លូវចិត្តល្អ មានអារម្មណ៍រីករាយ នោះការបំពេញការងារ ឬក៏​ការរៀនសូត្រ គឺកាន់តែប្រសើរជាងមុន ។  គេហទំព័រ The Good Men Project បង្ហាញបច្ចេកទេសមួយចំណុចដែលជួយដល់សុខភាពផ្លូវចិត្ត ឬការជំរុញបាននូវផលិតភាពក្នុងរស់នៅប្រចាំថ្ងៃ ៖

១.ស្ដាប់តន្រ្តី ៖  ការស្រាវជ្រាវមួយបានបង្ហាញថា តន្រ្តីជួយជំរុញឱ្យមានអារម្មណ៍រីករាយ និងកម្ចាត់ចោលនូវអរម៉ូនស្ត្រេសមួយចំនួន។ ប្រសិនបើអ្នកមានអារម្មណ៍ថាមានការបារម្ភ ឬក៏រំភើបពេក ឬអាចនិយាយបានថា ពិបាកគ្រប់គ្រងបញ្ហា ដូច្នេះការប្រើប្រាស់តន្រ្តីដែលអ្នកចូលចិត្តអាចជួយដោះស្រាយ ឬជួយផ្លាស់ប្រែអារម្មណ៍ឱ្យល្អជាងមុន មួយវិញទៀតជំរុញឱ្យផ្លូវដង្ហើមមានដំណើរការល្អជាងមុខ ពង្រឹងការផ្តោតពេលគិតអ្វីមួយ ថែមទាំងអាចរុញច្រានអារម្មណ៍អវិជ្ជមានទុកនៅដោយឡែក។

២. ដកដង្ហើមវែងៗ ៖ ការដកដង្ហើមឱ្យវែងៗ យូរៗ ជួយឱ្យរាយកាយនិងអារម្មណ៍មានដំណើរការល្អ ដូច្នេះសកម្មភាពនេះជួយបង្អាក់ការឆ្លើយឆ្លង និងបង្កបាននូវភាពស្ងប់ស្ងាត់មួយរយៈ។ វិធីសាស្រ្តដែលងាយស្រួលធ្វើមួយទៀត គឺបិទភ្នែកហើយរាប់អង្កាំដែលនៅនឹងដៃ ឬរាប់ចំនួនលេខ ព្រោះកាលដែលធ្វើបែបនេះជារឿយៗ ផ្តល់ភាពងាយស្រួលហើយធ្វើឱ្យអារម្មណ៍មូល។

៣. យកដៃទាំងពីរដាក់នៅលើទ្រូងខ្លួនឯង (​ The Butterfly Hug) ៖ វីធីសាស្រ្តសម្រួលផ្លូវដង្ហើមតាមរយៈការយកដៃទាំងពីរផ្អោបនៅលើទ្រូង ឬនៅចន្លោះករ និងដកដង្ហើមមួយៗ ជួយ​ឱ្យអ្នកទទួលបាននូវអារម្មណ៍ធូរស្រាយ ហើយកាត់បន្ថយអារម្មណ៍អវិជ្ជមាន។

៤. ធ្វើសកម្មភាពដែលនាំឱ្យអារម្មណ៍រីករាយ ៖ មានសកម្មភាពជាច្រើនដែលនាំឱ្យអារម្មណ៍ល្អ និងរីករាយ មានដូចជា នៅជាមួយធម្មជាតិ អានសៀវភៅ ស្ដាប់ចម្រៀង មើលកុន នៅជាមួយមនុស្សជាទីស្រឡាញ់ ធ្វើអ្វីដែលនាំទៅរកភាពច្នៃប្រតិដ្ឋ ងូតទឹក សមាធិ ធ្វើយូហ្កា ឆ្លើយឆ្លងសារ ឬធ្វើការងារស្ម័គ្រចិត្តជាដើម។ ដូច្នេះត្រូវជ្រើសយកតែសកម្មភាពណាដែលអ្នកចូលចិត្តជាងគេតែប៉ុណ្ណោះ ទើបទទួលបាននូវប្រសិទ្ធភាព និងមានអារម្មណ៍ប្រសើរជាងមុន៕