ថ្លែងក្នុងពិព័រណ៍ជំនាញសិក្សា និងការងារ ឆ្នាំ២០២៥ កាលពីពេលថ្មីៗនេះ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានមានប្រសាសន៍ ដោយ​ធ្វើការ​អបអរសាទរដល់ប្អូនៗ ដែលទើបតែប្រឡងបញ្ចប់សញ្ញាបត្រមធ្យមសិក្សាទុតិយភូមិ (បាក់ឌុប) ក្នុងឆ្នាំនេះ ដោយ​ជូនពរឱ្យប្អូនៗទទួលបាននៅលទ្ធផលល្អគួរជាទីពេញចិត្តទាំងអស់គ្នា។ ជាមួយ​គ្នា​លោកជំទាវក៏​បាន​លើកទឹកចិត្តដល់សិស្សានុសិស្សកុំអស់សង្ឃឹមប្រសិនលទ្ធផលបាក់ឌុបមិនជាប់ ព្រោះនៅមានឱកាសសិក្សាជាច្រើនទៀត។

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មានប្រសាសន៍ថា ពេលនេះប្អូនៗកំពុងតែរង់ចាំលទ្ធផលដោយអន្ទះសារ ហើយមិនដឹងថាលទ្ធផលប្រឡងជាប់ ឬធ្លាក់​ ប៉ុន្តែប្អូនៗត្រូវចាំថា ទោះបីជាយើងជាប់ ឬមិនជាប់ក៏ដោយក៏យើងមានឱកាសច្រើន បើអ្នកជាប់អាចបន្តការសិក្សានៅមហាវិទ្យាល័យ ហើយ​សម្រាប់អ្នកមិនជាប់ គឺនៅ​មានឱកាសសិក្សាច្រើនណាស់ ដូចជាមានវគ្គសិក្សាខ្លីៗ ការសិក្សាជំនាញ ការសិក្សាថ្នាក់បរិញ្ញាបត្ររង ដូច្នេះប្អូនៗ ក្មួយកុំអស់សង្ឃឹម ខណៈរាជរដ្ឋាភិបាល ក៏​បានផ្ដល់ឱកាសដល់ក្មួយៗដែលមិនបានប្រឡងជាប់បាក់ឌុប ក៏អាចបន្តទៅរៀនជាជំនាញវិជ្ជាជីវៈផ្ទាល់ខ្លួនផងដែរ។

“ជូនពរប្អូនៗ ក្មួយប្រឡងជាប់ទាំងអស់គ្នា និងទទួលបាននូវភាពជោគជ័យថ្មីបន្ថែមទៀត សម្រាប់ជីវិតដ៏វែងឆ្ងាយរបស់ប្អូនៗ និងក្មួយៗ”

តាមការគ្រោងទុក ក្រសួងអប់រំ យុវជន និងកីឡា គ្រោង​នឹងប្រកាស​លទ្ធផល នៃការ​ប្រឡង​សញ្ញាបត្រ​មធ្យមសិក្សា​ទុតិយភូមិ ឬ បាក់ឌុប នៅ​ថ្ងៃទី២០ ខែកញ្ញា ឆ្នាំ២០២៥ ដោយ​ឆ្នាំនេះ​ការប្រកាស​លទ្ធផល​នឹង​ធ្វើ​ឡើង​ព្រមគ្នា​ទូទាំង​២៥រាជធានីខេត្ត។

ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ មានបេក្ខជនចុះឈ្មោះ ប្រឡងសរុប ១៤៦ ៧២០ នាក់ ស្រី ៨១ ៤៤២ នាក់ ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៤០ ៦៧៨ នាក់ ស្រី ២៤ ៥១៩ នាក់ បេក្ខជនថ្នាក់វិទ្យាសាស្ត្រសង្គម មានចំនួន ១០៦ ០៤២ នាក់ ស្រី ៥៦ ៩២៣ នាក់។ ឆ្នាំនេះ រដ្ឋមន្រ្តីក្រសួងអប់រំរំពឹងថា សិស្ស​ដែលទទួលបាន​និទ្ទេស A អាចនឹងមានច្រើនជាង ២ពាន់នាក់ ខណៈកាលពីឆ្នាំ២០២៤ ការប្រឡងបាក់ឌុប មានសិស្សដែលជាប់និទ្ទេស A ចំនួន ២,២២៥នាក់៕