ក្នុងជំនួបពិភាក្សាការងារជាមួយគណៈប្រតិភូកម្មវិធីស្បៀងអាហារពិភពលោក (WFP) ប្រចាំកម្ពុជា កាលពីពេលកន្លងទៅ ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា មានប្រសាសន៍ថា កម្មវិធីផ្តល់អាហារតាមសាលារៀន ចាប់ផ្តើមអនុវត្តដំបូង គឺមានតែ៥ខេត្ត ២០៥សាលា និងមានសិស្សទទួលបានផល​ចំនួន ៥២ ១០០នាក់ នៅឆ្នាំសិក្សា២០១៩-២០២០។ ប៉ុន្តែ​រហូត​មក​ដល់ឆ្នាំសិក្សា២០២៤-២០២៥នេះ កម្មវិធីផ្តល់អាហារតាមសាលារៀន​បានកើនដល់ចំនួន១០ខេត្ត ដែលស្មើ​នឹង​៥៥៣សាលា និងមានសិស្សជិត១៥ម៉ឺននាក់ទទួលបានផល​ពីគម្រោងនេះ។

បើតាម​រដ្ឋមន្រ្តីក្រសួងអប់រំ ចាប់ពីឆ្នាំ២០១៩ដល់ឆ្នាំ២០២៤ កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ បានប្រើប្រាស់ថវិកាជាតិតាមរយៈក្រសួងអប់រំ យុវជន និងកីឡា ស្របតាមយុទ្ធសាស្ត្រផ្ទេរទទួលជាបណ្តើរៗពីកម្មវិធីស្បៀងអាហារពិភពលោក។​

ក្នុងនោះ​ឯកឧត្តមរដ្ឋមន្រ្តី​ក៏​បានគូសបញ្ជាក់ពីសារៈសំខាន់នៃការផ្តល់ស្បៀងអាហារតាមសាលាសម្រាប់កុមារមកពីគ្រួសារខ្វះខាតពុំមានលទ្ធភាព ដើម្បីទទួលបានឱកាសលូតលាស់ពេញលេញ។ ឯកឧត្តមបណ្ឌិតសភាចារ្យ បន្តថា កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍ បានរួមចំណែកដ៏សំខាន់ ក្នុងការបង្កើនគុណភាពអប់រំ លើកកម្ពស់អាហារូបត្ថម្ភ​ និងសុខភាពអ្នកសិក្សា បង្កើតមុខរបរនិងបង្កើនប្រាក់ចំណូលដល់សហគមន៍គោលដៅ ធ្វើឱ្យមានពិពិធកម្មកសិកម្មទំនើបបែបមេត្រីភាព និងរួមចំណែកដល់ការអនុវត្តឱ្យកាន់តែស៊ីជម្រៅប្រព័ន្ធគាំពារសង្គមផ្នែកជំនួយសង្គមបានកាន់តែល្អប្រសើរ ។

រដ្ឋមន្រ្តីក្រសួងអប់រំមានប្រសាសន៍ថា ក្រសួងមានគោលដៅជំរុញកម្មវិធីនេះឱ្យមាននិរន្តរភាព ខណៈបន្តយកចិត្តទុកដាក់ពង្រឹងនិងពង្រីកវិសាលភាពនៃការអនុវត្តឱ្យកាន់តែទូលំទូលាយដល់តាមតំបន់ដែលមានតម្រូវការបំផុត។

សូមបញ្ជាក់ថា ការអនុវត្តកម្មវិធីផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍ កំពុង​អនុវត្ត​នៅ​តាម​សាលា​រៀន​គោលដៅ​​ចំនួន ៥៥៣សាលា នៅក្នុង​ខេត្ត​ចំនួន ១០។ ខេត្ត​ទាំង​១០នោះ​ រួមមាន​ ខេត្ត​សៀមរាប កំពង់ធំ ព្រះវិហារ បាត់ដំបង ស្ទឹងត្រែង បន្ទាយមានជ័យ កំពង់ចាម កំពង់ឆ្នាំង ពោធិ៍សាត់ និងឧត្តរមានជ័យ ដែល​មានសិស្សទទួលផលចំនួន ១៤៨ ៥៦៥នាក់៕