ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សម័យកាលបច្ចេកវិទ្យា និងការទទួលបានព័ត៌មានជាប្រចាំ មានភាពសំខាន់ក្នុងការរស់នៅ ជាពិសេសនៅក្នុងស្ថានភាពដែលពិភពលោកកំពុងចលាចល ឬសហគមន៍មានគ្រោះអាសន្ន។ ជាមួយគ្នានេះ មនុស្សមួយចំនួនក៏បានដឹងដែរថា ការប្រីបណ្តាញសង្គមជ្រុលបង្កឱ្យសុខភាពផ្លូវចិត្តធ្លាក់ចុះ! ដូច្នេះ តើធ្វើដូចម្តេចដើម្បីកុំឱ្យខ្លួនឯងបាត់បង់ស្មារតីទៅក្នុងការប្រីបណ្ដាញសង្គម? ឬ តើមានវិធីបែបណាខ្លះដែលអាចទទួលបានព័ត៌មានដើម្បីការពារខ្លួន ឬការសម្រេចចិត្តដ៏ត្រឹមត្រូវ ដោយមិនចាំបាច់អង្គុយអូសចុះ អូសឡើងក្នុងរយៈពេលយូរម៉ោង?
តាមរយៈគេហទំព័រ Fast Company បានប្រាប់គន្លឹះមួយចំនួន ក្នុងការតាមទាន់ស្ថានការណ៍ដោយជៀសពីការប្រើបណ្តាញសង្គមជ្រុលហួសហេតុ ៖
១. ការកំណត់រយៈពេលមុននឹងបើកកម្មវិធីមើល៍ព័ត៌មាន ៖ ២៤ម៉ោងមិនសល់ច្រើនទេ ប្រសិនបើមនុស្សម្នាក់ៗមិនបានកំណត់ ឬបែងចែកទៅក្នុងសកម្មភាពនីមួយៗប្រចាំថ្ងៃ។ បណ្តាញសង្គម ឬប្រព័ន្ធផ្សព្វផ្សាយ រួមទាំងបច្ចេកវិទ្យាថ្មី អាចជាអន្ទាក់ដ៏ទាក់ទាញ ក្នុងការលេបត្របាក់ពេលវេលាផ្ទាល់ខ្លួនរបស់បុគ្គលម្នាក់ៗ ហេតុនេះហើយបានជាការកំណត់ពេលឱ្យហើយមុននឹងបើកទូរទស្សន៍ ឬអានព័ត៌មានតាមទូរស័ព្ទ គឺជាចំណុចចម្បងដែលត្រូវអនុវត្តន៍ ដើម្បីកុំឱ្យលង់លក់នឹងការប្រើបណ្តាញសង្គមជ្រុល ឬបាត់បង់ខ្លួនឯងអំឡុងពេលតាមដាន។ ក្នុងមួយថ្ងៃៗ មានព្រឹត្តិការណ៍ចម្រុះបែបកើតមាន ប៉ុន្តែមិនមែនមានន័យថា យើងត្រូវតែដឹងគ្រប់រឿងនោះទេ ព្រោះហេតុការណ៍ខ្លះ មិនបានផ្តល់ជាប្រយោជន៍សម្រាប់ខ្លួនឯង ហើយបង្កើនបាននូវភាពតានតឹងបន្ថែមទៀត។
២. ការចងក្រងប្រភពព័ត៌មានដែលត្រូវតាមដាន ៖ បច្ចុប្បន្ននេះ មានបណ្តាញប្រព័ន្ធផ្សព្វផ្សាយជាច្រើន ចែករំលែកអំពីព្រឹត្តិការណ៍ជាតិ និងអន្តរជាតិ ហើយក្នុងនាមជាអ្នកសិក្សា អ្នកធ្វើការ ឬអ្នកមានតួនាទីដឹកនាំសំខាន់ៗត្រូវការតាមដានរាល់ថ្ងៃ ដើម្បីជាដើមទុនក្នុងការសម្រេចចិត្ត។ ស្ថិតក្នុងស្ថានភាពនេះ ដើម្បីបញ្ចៀសពីភាពលើសលប់នៃការតាមដាន គួរចងក្រងប្រភព ព័ត៌មាន ដែលត្រូវតាមដានទុកនៅទីតាំងណាមួយ ដែលផ្តល់ភាពងាយស្រួលក្នុងការបើកអាន ឬបើកមើល៍ដោយគ្មានការរំខានពីប្រភពខាងក្រៅ ឬការចាកចេញពីគេហទំព័រ ដែលពុំឆ្លើយតបនឹងតម្រូវការបច្ចុប្បន្ន។ ឧទាហរណ៍ អំឡុងពេលជំងឺរាតត្បាត ការតាមដានប្រភពព័ត៌មានពីក្រសួងសុខាភិបាលជាកិច្ច ដែលចាំបាច់ ជំនួសឱ្យការតាមដានបណ្តាញសង្គមចម្រុះដែលបង្កើតបាននូវ ប្រភពចចាមអារ៉ាម ដែលពុំអាចប្រើការបាន ហើយនាំឱ្យខាតពេលវេលាជាដើម។
៣. ការទាញខ្លួនឯងចេញពីកន្លែងផាសុកភាព ៖ កាលដែលស្ថិតនៅមួយកន្លែងដែលមានផាសុកភាពអំឡុងពេលដៃ និងខួរក្បាលកំពុងតាមព្រឹត្តិការណ៍ណាមួយ វាបានរុញច្រាញឱ្យកាន់តែជក់ចិត្តនឹងសកម្មភាពទាំងនោះទ្វេដង ហើយនៅពេលដែលប្រើប្រាស់លើសលប់ វានឹងបង្កើតទៅជាអាការតានតឹង ពិបាកក្នុងការចាប់យកជ្រុងដែលសំខាន់ៗ។ ដូច្នេះត្រូវឈានជើងដើរពីកន្លែងដែលអង្គុយអានព័ត៌មាន ឬពីកន្លែងដែលប្រើប្រាស់បណ្តាញសង្គម ហើយបន្លាប់ខ្លួនឯងដោយសកម្មផ្សេងៗដូចជា ពិសាទឹក ដើរចលនា ពត់ដៃជើង ការធ្វើលំហាត់ប្រាណទូទៅងាយៗ ដើម្បីជៀសពីការប្រើបណ្តាញសង្គមជ្រុល៕
