ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសិក្សារបស់ អង្គការសុខភាពពិភពលោក (WHO) បានរកឃើញថា ជិត ១ភាគ៣ នៃមនុស្សពេញវ័យទាំងអស់ មិនបានធ្វើសកម្មភាពរាងកាយគ្រប់គ្រាន់នោះទេ ដែលនេះជាការគម្រាមកំហែងដ៏ធំចំពោះសុខភាពប្រជាជនទូទាំងពិភពលោក។
ច្រើនជាង ៣១ភាគរយ នៃមនុស្សពេញវ័យ ដែលមានចំនួន ប្រមាណ ១,៨ ប៊ីលាននាក់ មិនបានធ្វើសកម្មភាពរាងកាយ តាមការណែនាំ របស់អង្គការសុខភាពពិភពលោក កាលពីឆ្នាំ២០២២ ដោយចំនួននេះ កើនឡើង ៥ភាគរយ បើធៀបនឹងឆ្នាំ២០១០, នេះបើយោងតាមការសិក្សារបស់អង្គការសុខភាពពិភពលោក និងក្រុមអ្នកស្រាវជ្រាវផ្សេងទៀត។
លោក Ruediger Krech ប្រធាននាយកដ្ឋានលើកកម្ពស់សុខភាពរបស់អង្គការសុខភាពពិភពលោកបាននិយាយថា «ភាពអសកម្មរាងកាយ គឺជាការគម្រាមកំហែង ដ៏ស្ងៀមស្ងាត់ចំពោះសុខភាពប្រជាជនពិភពលោក ដែលជាការរួមចំណែកមួយ ធ្វើឱ្យមនុស្សធ្លាក់ខ្លួនក្នុងជំងឺរ៉ាំរ៉ៃ។»
ដើម្បីមានសុខភាពល្អ WHO ណែនាំមនុស្សពេញវ័យទាំងអស់ ឱ្យចំណាយពេលយ៉ាងហោចណាស់ ១៥០នាទីជារៀងរាល់សប្ដាហ៍ ដើម្បីធ្វើសកម្មភាពរាងកាយកម្រិតមធ្យម ដែលសកម្មភាពទាំងនោះ អាចរាប់បញ្ចូលទាំងការដើរ ជិះកង់ ឬសូម្បីតែកិច្ចការផ្ទះ ឬយ៉ាងហោចណាស់ ៧៥នាទី នៃការធ្វើលំហាត់ប្រាណដែលប្រើកម្លាំងខ្លាំង ដូចជា ការរត់ ឬការប្រកួតកីឡាជាដើម។
លោក Krech បាននិយាយថា ការមិនធ្វើលំហាត់ប្រាណក្នុងកម្រិតសមស្រប អាចបង្កើនហានិភ័យ នៃការវិវត្តទៅជាជំងឺបេះដូង ជំងឺទឹកនោមផ្អែម មហារីកមួយចំនួន ព្រមទាំងបញ្ហាសុខភាពផ្លូវចិត្តផងដែរ។
ប្រសិនបើនិន្នាការបច្ចុប្បន្ននៅតែបន្ត កម្រិតអសកម្មរបស់មនុស្សពេញវ័យ ត្រូវបានគេព្យាករណ៍ថា នឹងកើនឡើងដល់ ៣៥ភាគរយនៅឆ្នាំ២០៣០, នេះបើយោងតាមការសិក្សានៅក្នុង The Lancet Global Health ។
អង្គការសុខភាពពិភពលោក បានសង្កត់ធ្ងន់ថា ការផ្លាស់ប្ដូរអាកប្បកិរិយាបុគ្គល គឺមិនគ្រប់គ្រាន់ទេ ដោយអំពាវនាវឱ្យប្រទេសនានា លើកកម្ពស់សកម្មភាពរាងកាយ ដោយជំរុញសកម្មភាពកីឡា ក្នុងសហគមន៍ ដូចជា ការដើរ ការជិះកង់ និងបង្កើនការប្រើប្រាស់សេវាសាធារណៈ។
សម្រាប់ការសិក្សានេះ ត្រូវបានគេចាត់ទុកថា មានភាពទូលំទូលាយបំផុត លើបញ្ហានេះ ក្រុមអ្នកស្រាវជ្រាវអន្តរជាតិបានបញ្ចូលគ្នានូវឯកសារជាង ៥០០ ដែលបានសិក្សាលើមនុស្សជាង ៥,៧លាននាក់ ក្នុងប្រទេសចំនួន ១៦៣៕
