មានការលើកទឹកចិត្តពីមជ្ឈដ្ឋានជាច្រើនឱ្យកាត់បន្ថយការប្រើប្រាស់ស្រ្កីននៅពេលយប់ មិនថា កុំព្យូទ័រ ទូរស័ព្ទដៃ ឬឧបករណ៍ទាំងឡាយណាដែលជះពន្លឺខ្លាំងនៅពេលយប់ជាច្រើនម៉ោងជាប់ៗគ្នា តែយ៉ាងណា ការប្រើប្រាស់ វាមិនមែនអាចជ្រើសរើសបានទេ ពេលខ្លះមនុស្សមានកាតព្វកិច្ចត្រូវប្រើនៅពេលយប់ ត្រូវធ្វើការ ឬត្រូវរៀនបន្ថែមនៅពេលយប់ ដូច្នេះការឈប់ប្រើប្រាស់ទាំងស្រុង វាមិនឆ្លើយតបទៅកាន់មនុស្សគ្រប់គ្នានោះឡើយ។

មនុស្សមួយចំនួនបានដឹងរួចមកហើយអំពីផលប៉ះពាល់នៅពេលប្រើឧបករណ៍អេឡិចត្រូនិចនៅពេលយប់ ហើយការកាត់ផ្តាច់ពីការប្រើប្រាស់ទាំងស្រុង ក៏មិនឆ្លើយតបនៅក្នុងបរិបទឌីជីថល និងកាវិវិត្ត ដ៏លឿនរហ័សនេះដែរ ប៉ុន្តែគេមានវីធីសាស្រ្ត និងការកាត់បន្ថយចំពោះចំណោទបញ្ហានេះបាន។

តាមរយៈគេហទំព័រ Sleep Foundation បានប្រាប់ពីគន្លឹះមួយចំនួនអំពីភាពឈ្លាសវៃនៃការប្រើឧបករណ៍អេឡិចត្រូនិចពេលយប់ ដូចជា ៖

កាត់បន្ថយ ៖ ការកាត់បន្ថយនៅត្រង់ចំណុចនេះ សំដៅទាំងការប្រើពេលថ្ងៃ និងពេលយប់ ព្រោះការប្រើច្រើនពេកនៅពេលថ្ងៃ ក៏ជាកត្តាដែលនាំឱ្យប៉ះពាល់គុណភាពដំណេកនៅពេលយប់បានដូចគ្នាដែរ! ហើយផលអវិជ្ជមានដល់ការគេង កើតឡើងជាពិសេសក្នុងចំណោមមនុស្សវ័យជំទង់ ដែលជាវ័យមួយកំពុងតែត្រូវការសមត្ថភាពផ្តោតទៅលើការសិក្សាជាអាទិភាព។ ប្រសិនបើលោកអ្នកមានតួនាទីជាអាណាព្យាបាល អ្វីដែលអាចធ្វើបាន គឺឧស្សាហ៍លើកអំពីប្រធានបទដែលនាំឱ្យប៉ះពាល់ដល់សុខភាព និងគុណភាពដំណេកពីការប្រើប្រាស់បច្ចេកវិទ្យាច្រើនម៉ោង។

បង្កើនបរិយាកាសដែលផ្តល់ភាពស្រស់ស្រាយមុនពេលគេង ៖ ភាពស្រស់ស្រាយជាក់លាក់ពុំមែនជាការប្រើប្រាស់ឧបករណ៍អេឡិចត្រូនិចនោះទេ ប៉ុន្តែជាការទទួលបានការសម្រាកតាមរយៈការបន្ធូរភាពតានតឹងដោយការសមាធិ ការស្តាប់ភ្លេងដែលនាំឱ្យចិត្តស្ងប់ អានសៀវភៅ ជារួមសកម្មភាពទាំងឡាយណាដែលអាចជៀសចាកពីការប្រើប្រាស់អេក្រង់ និងអាចរួមចំណែកក្នុងការពង្រឹងសុខភាពផ្លូវចិត្តផងដែរ។

គ្មានឧបករណ៍អេឡិចត្រូនិចក្នុងបន្ទប់គេង ៖ ប្រសិនបើពុំចាំបាច់កុំដាក់ទូរសទស្សន៍ដែលមានផ្ទាំងធំៗ និងផ្តល់ភាពងាយស្រួលក្នុងការបើកបិទ ព្រោះវាជាកត្តាដែលជំរុញឱ្យការប្រើប្រាស់ស្រ្គីនកាន់តែមានការកើនឡើង។

បន្ថយពន្លឺពីកម្មវិធី ៖ បន្ទាប់ពីអនុវត្តន៍រាល់វិធីសាស្រ្ត ដែលជួយគ្រប់គ្រងក្នុងការប្រើប្រាស់ ឬក៏ការកាត់បន្ថយរួចរាល់អស់ហើយ អ្វីដែលគួរបន្តអនុវត្តន៍នោះគឺ ការប្រើប្រាស់ការកំណត់ដែលមានស្រាប់នៅក្នុងកុំព្យូទ័រ ឬក៏ទូរស័ព្ធដៃ ដើម្បីកាត់បន្ថយពន្លឺ ការរំលឹកកុំឱ្យប្រើលើសកាលកំណត់ និងជ្រើសរើសស្រ្គីនដែលមានសមត្ថភាពក្នុងការការពារភ្នែក៕