ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ពោតគឺជាអាហារដែលយើងនិយមទទួលទានបំផុតនៅរដូវក្តៅ ប៉ុន្តែវាតែងតែត្រូវបានគេយល់ច្រឡំថា ជាអាហារ “មិនល្អ” ឬ “សម្បូរស្ករ” ដោយសារវាត្រូវបានគេយកទៅធ្វើជាគ្រឿងផ្សំក្នុងភេសជ្ជៈផ្អែមៗ និងអាហារកែច្នៃ។ ទោះជាយ៉ាងណាក៏ដោយ អ្នកជំនាញអាហារូបត្ថម្ភបានបញ្ជាក់ថា «ពោតស្រស់» គឺជាប្រភពនៃសារធាតុចិញ្ចឹមដ៏ល្អសម្រាប់រាងកាយ។
១. តម្លៃអាហារូបត្ថម្ភរបស់ពោត
អត្ថប្រយោជន៍របស់ពោតអាស្រ័យលើរបៀបដែលយើងចម្អិនវា។ ក្នុងនោះ ពោតផ្អែម (Sweet Corn) ត្រូវចាត់ទុកថា ជាបន្លែដែលមានជាតិម្សៅ (Starchy vegetable)។ ពោតក្រៀម/ពោតលីង (Popcorn) ចាត់ទុកថាជាគ្រាប់ធញ្ញជាតិពេញរូបរាង (Whole grain)។
ក្នុងពោតស្ងោរមួយផ្លែ (ទំហំមធ្យម) វានឹងផ្តល់នូវថាមពល ៩៩ កាឡូរី, កាបូអ៊ីដ្រាត ២១,៦ ក្រាម (ជាតិសរសៃ ២,៥ ក្រាម និងស្ករ ៤,៧ ក្រាម), ប្រូតេអ៊ីន ៣,៥ ក្រាម។ វាមិនមានកូឡេស្តេរ៉ុលទេ និងមានជាតិខ្លាញ់ទាបបំផុត។
២. អត្ថប្រយោជន៍សំខាន់ៗចំពោះសុខភាព
ពោតមានជាតិសរសៃ និងម្សៅធន់ (Resistant starch) ដែលជួយកាត់បន្ថយការរលាកក្នុងពោះវៀន និងជួយដល់ការលូតលាស់នៃបាក់តេរីល្អៗ។ វាក៏ជួយឱ្យរាងកាយស្រូបយកជាតិរ៉ែបានល្អ និងកាត់បន្ថយកូឡេស្តេរ៉ុលផងដែរ។
ការបរិភោគពោត ក៏ជួយដល់សុខភាពភ្នែក និងខួរក្បាល ដោយសារសារធាតុ Lutein និង Zeaxanthin ក្នុងពោតជួយការពារភ្នែកពីពន្លឺ និងជួយដល់ការវិវត្តនៃខួរក្បាល (ជាពិសេសកុមារក្រោមអាយុ ៥ ឆ្នាំ)។ ដោយឡែកពោតពណ៌ស្វាយ សម្បូរទៅដោយសារធាតុ Anthocyanins ដែលជួយដល់សុខភាពបេះដូង និងគ្រប់គ្រងជាតិស្ករក្នុងឈាម។
ដោយសារពោតមានជាតិសរសៃខ្ពស់ វាក៏ធ្វើឱ្យការរំលាយអាហារប្រព្រឹត្តទៅយឺតៗ ការពារកុំឱ្យជាតិស្ករក្នុងឈាមឡើងខ្ពស់ភ្លាមៗក្រោយពេលញ៉ាំ។ (ចំណាំ៖ គួរជៀសវាងទឹកស៊ីរ៉ូពោត ឬផលិតផលពោតកែច្នៃខ្លាំង)។
សរុបមកវិញ ពោត ជាអាហារដែលផ្តល់នូវវីតាមីន រ៉ែ និងជាតិសរសៃដែលរាងកាយត្រូវការ។ តែយ៉ាងណា សូមជ្រើសរើសញ៉ាំពោតស្រស់ កាត់បន្ថយការប្រើប៊ឺ/ខ្លាញ់ច្រើនពេក និងញ៉ាំក្នុងបរិមាណសមរម្យជាផ្នែកនៃរបបអាហារដែលមានតុល្យភាព៕
