ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
តើធ្វើយ៉ាងណាដើម្បីរក្សាការប្តេជ្ញាចិត្តធ្វើលំហាត់បានទៀងទាត់? ឆ្លើយតបទៅនឹងបញ្ហានេះ វាហាក់ដូចជាមិនខុសគ្នាទៅនឹងសកម្មភាព ឬក៏ការងារដទៃនោះទេ! ព្រោះការអនុវត្តបានជាប្រចាំទៅបាន ត្រូវការឱ្យមានកាលវិភាគ ជៀសវាងការរំពឹងលើអារម្មណ៍ចង់ធ្វើតែមួយមុខ ពោលគឺត្រូវបំបែកទម្លាប់ដែលលំបាកៗឱ្យទៅជាសកម្មភាពងាយៗ ឧទាហរណ៍ដូចជា បើថ្ងៃនេះពុំអាចទៅកន្លែងហាត់ប្រាណទេ គួរក្រឡេកមើលកន្លែងដែលនៅក្បែរៗខ្លួន ឬដើរតាមផ្លូវជុំវិញផ្ទះ និងប្រើប្រាស់បច្ចកវិទ្យាដើម្បីតាមដានការវិវត្ត។
តាមរយៈគេហទំព័រ Sychology Today បានបង្ហាញអំពីគន្លឹះប្រាំចំណុច ក្នុងការជំរុញឱ្យខ្លួនឯងប្រកាន់ភ្ជាប់នូវទម្លាប់ហាត់ប្រាណបានជាប្រចាំ ដោយមានរៀបរាប់ខាងក្រោម ៖
១. ធ្វើកាលវិភាគឱ្យដូចនឹងការប្រជុំការងារសំខាន់ៗ ៖ ប្រសិនបើមិនបានធ្វើកាលវិភាគ ដើម្បីជំរុញខ្លួនឯងឱ្យហាត់ប្រាណនោះទេ ការរំពឹងចង់បានភាពទៀងទាត់ប្រចាំថ្ងៃ ក៏មិនអាចកើតមានដែរ។ ផ្តល់តម្លៃលើការថែទាំសុខភាព ចាំបាច់ត្រូវផ្តល់អាទិភាពទៅលើពេលវេលា នៃការហាត់ប្រាណ។ ភាពជាប់លាប់មិនមែនសំដៅលើលទ្ធផលធំៗនោះទេ ប៉ុន្តែជាការសម្រេចចិត្តធ្វើឱ្យបាននូវលទ្ធផលជាប្រចាំ ទោះតិចក្ដី ឬច្រើនក្ដី។
២. កុំពឹងលើកម្លាំងចិត្តពីខាងក្រៅ ៖ ការរង់ចាំឱ្យមានទឹកចិត្ត ឬក៏កម្លាំងចិត្តពីខាងក្រៅ គឺពុំស្ថិតស្ថេរនោះទេ ហើយភាពជាប់លាប់ក៏មិនអាចកើតមានដែរ បើគ្មានវិន័យ ឬការប្តេជ្ញាចិត្ត។ ដូច្នេះជំនួសឱ្យរំពឹងលើចិត្តចង់ហាត់ប្រាណ គួរកែច្នៃឱ្យមានភាពងាយស្រួល ដូចជាការកំណត់គោលដៅក្នុងមួយខែៗថា តើត្រូវការហាត់ប៉ុន្មានគីឡូ ប៉ុន្មានជំហាន ឬប៉ុន្មានកាឡូរី? ទាំងនេះជាការពឹងពាក់លើការតាំងចិត្តជាក់ស្ដែង ដោយឡែកការពឹងពាក់លើអារម្មណ៍ គឺពុំឆ្លើយតបនឹងការកំណត់គោលដៅនោះទេ។
៣. ប្រើប្រាស់អតីតកាលវិភាគអនាគត ៖ គួររំលឹកផងដែរថា រៀងរាល់ពេលដែលលោកអ្នកខកខានក្នុងការធ្វើលំហាត់ប្រាណ គឺបានចងក្រងនៅក្នុងដំណើរប្រវត្តិរបស់ខ្លួនឯងជានិច្ច ហើយប្រវត្តិអតីតកាល គឺជាការចង្អុលបង្ហាញអំពីដំណើរនៃអនាគតបានមួយផ្នែកដែរ។ ការខកខាននៅថ្ងៃនេះ វាក៏នឹងជំរុញភាពខកខាននៅថ្ងៃស្អែកបានយ៉ាងងាយដូចគ្នា។ រៀងរាល់ពេលដែលប្តេជ្ញាចិត្តធ្វើលំហាត់ប្រាណ ទោះបីជាត្រឹមតែប្រាំនាទីក្តី វាក៏ជាសកម្មភាពមួយដែលជួយពង្រឹងទម្លាប់បានដែរ។
៤. ការចាប់ផ្តើមជាមួយអ្វីដែលមានស្រាប់ ៖ ការកំណត់គោលដៅធំៗ ឬការប្រើប្រាស់ឧបករណ៍ទំនើបៗ ឬទៅទីតាំងល្អៗ ប៉ុន្តែឆ្ងាយៗ វាពុំមែនជារឿងដែលអាក្រក់នោះទេ? ប៉ុន្តែតើភាពសម្បូរបែបទាំងនេះ បានផ្តល់ភាពងាយស្រួល និងរក្សាភាពជាប់លាប់ទៅកាន់ខ្លួនឯងកម្រិតណា? ការជ្រើសយកអ្វីដែលសាមញ្ញៗ ឬជ្រើសរើសអ្វីដែលមាននៅក្នុងដៃស្រាប់ ដូចជាហាត់ប្រាណក្បែរផ្ទះ ទិញឧបករណ៍ដាក់ក្នុងផ្ទះ និងដើរជុំវិញកន្លែងស្នាក់នៅ សុទ្ធសឹងតែជាសកម្មភាពបង្កើនភាពងាយស្រួលក្នុងការរក្សាទម្លាប់នៃការហាត់ប្រាណបានទៀងទាត់។
៥. ជៀសវាងសម្លៀកបំពាក់ធ្វើឱ្យកកិត ៖ មួយថ្ងៃៗមានសកម្មភាពច្រើនដែលយើងត្រូវទទួលខុសត្រូវ ដូច្នេះវាងាយស្រួលនឹងការភ្លេចសម្ភារកីឡា ឬក៏ពេលខ្លះមានសម្ភារជាច្រើនដែលត្រូវយកតាមជាប់ខ្លួនតម្រូវឱ្យពិបាកសម្រេចចិត្ត ថា តើយកមួយណា ទុកមួយណា? ឆ្លើយតបទៅនឹងចំណោទបញ្ហានេះ ការរៀបចំទុកជាមុន ឬការស្លៀកពាក់ដែលស្រួលៗ ក៏ជាដាក់កំហិតមិនឱ្យខ្លួនឯងបង្កើតលេសចាកចេញពីទម្លាប់ហាត់ប្រាណ៕
