ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
សិង្ហបុរីដែលជាប្រទេសមានសាកលវិទ្យាល័យស្វយ័តចំនួន ៦ ផ្ដល់មូលនិធិសាធារណៈ និងសាកលវិទ្យាល័យឯកជនល្បីៗមួយចំនួនធំ បានក្លាយជាគោលដៅដ៏ពេញនិយម សម្រាប់និស្សិតចិន ដែលចង់បន្តការសិក្សាក្រៅប្រទេស, នេះបើយោងតាមការចុះផ្សាយរបស់ The South China Morning Post ។
បើយោងតាមប្រព័ន្ធផ្សព្វផ្សាយក្នុងស្រុកចិន នៅក្នុងឆ្នាំ២០២៣ មាននិស្សិតអន្តរជាតិជាង ៧៣,០០០នាក់ ក្នុងប្រទេសសិង្ហបុរី ខណៈចំនួននិស្សិតចិន គឺច្រើនគួរឱ្យកត់សម្គាល់។
សហរដ្ឋអាមេរិក ដែលធ្លាប់តែជាប្រទេសទាក់ទាញនិស្សិតចិនច្រើនបំផុតក្នុងប្រវត្តិសាស្ត្រ ប៉ុន្តែបច្ចុប្បន្ន អ្នកជំនាញក្នុងវិស័យអប់រំចិនរកឃើញថា សិង្ហបុរីអាចនឹងមានកំណើនចំនួននិស្សិតចិនកាន់តែច្រើនក្នុងរយៈពេលដ៏ខ្លី ចំពេលមានការកើនឡើង នៃភាពមិនច្បាស់លាស់ និងអស្ថិរភាពនៃនិស្សិតចិនក្នុងសហរដ្ឋអាមេរិក។
សម្រាប់ជនជាតិចិន សិង្ហបុរីជាប់ចំណាត់ថ្នាក់ទី២ ក្នុងចំណោមគោលដៅសិក្សានៅបរទេសដ៏ពេញនិយមបំផុត នៃប្រទេសចំនួន២៨ ដែលពួកគេបានកំណត់, នេះបើយោងតាមរបាយការណ៍ ចងក្រងរួមគ្នា ដោយក្រសួងអប់រំចិន និងមជ្ឈមណ្ឌល Think Tank Center for China and Globalization (CCG) ដែលមានមូលដ្ឋាននៅទីក្រុងប៉េកាំង។
ក្នុងចំណោមប្រទេសទាំង ២៨នោះ ប្រទេសអង់គ្លេស ឈរនៅលំដាប់ថ្នាក់កំពូល ខណៈអាមេរិកជាប់ចំណាត់ថ្នាក់ទី៤ បន្ទាប់ពីកាណាដា ហើយមូលហេតុ នៃការធ្លាក់ចុះនេះ គឺបណ្ដាលមកពីអារម្មណ៍មិនសប្បាយចិត្តអំពីសុវត្ថិភាព។
លោក Zheng Jinlian អនុប្រធាន CCG បានលើកឡើងថា មូលហេតុដែលជំរុញឱ្យនិស្សិតចិន ពិចារណាទៅសិក្សានៅប្រទេសផ្សេង ក្រៅពីអាមេរិក គឺដោយសារកត្តាមួយចំនួនដូចជា ជម្លោះ បញ្ហាសណ្ដាប់ធ្នាប់សាធារណៈ និងគោលជំហរទូទៅរបស់សហរដ្ឋអាមេរិកចំពោះប្រទេសចិន។
បច្ចុប្បន្នចំនួននិស្សិតចិននៅអាមេរិកបានធ្លាក់ចុះរួចទៅហើយ ដោយចំនួននិស្សិតឥណ្ឌាបានវ៉ាដាច់ប្រទេសចិន និងស្ថិតនៅក្នុងនាមជានិស្សិតអន្តរជាតិ ដែលមានចំនួនច្រើនបំផុតនៅអាមេរិកកាលពីឆ្នាំមុន៕
