ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការសន្សំមានច្រើនទម្រង់ ប៉ុន្តែតើសន្សំបែបណាឱ្យកាន់តែមានភាពឈ្លាសវៃ? ការបំបែកវិធីសន្សំ ឬការបែងចែកជាកញ្ចប់តូចៗ (ឧទាហរណ៍ 50/30/20) វាអាចត្រូវដែរ តែពុំត្រូវជាមួយនឹងស្ថានភាពគ្រប់គ្នាឡើយ, ប៉ុន្តែការសន្សំនៅតែសំខាន់ ទោះក្នុងលក្ខខណ្ឌបែបណាក៏ដោយ។ តាមរយៈ គេហទំព័រ Saving Advice បានប្រាប់គន្លឹះសាមញ្ញៗ ដែលអាចជំរុញដល់ប្រសិទ្ធភាពនៃការសន្សំ ក៏ដូចជាការកាត់បន្ថយភាពតានតឹងជាមួយនឹងបញ្ហាហិរញ្ញវត្ថុផ្ទាល់ខ្លួន រួមទាំងជួយឱ្យការចំណាយជាមួយនឹងទំនុកចិត្តជំនួសឱ្យការចាយទាំងរអៀសចិត្ត។
១. បន្តសាកល្បងសំន្សំបែងចែកជាកញ្ចប់ៗ ៖ ការបែងចែកប្រាក់ចំណូល (ឧទាហរណ៍ 50/30/20) ត្បិតជាច្បាប់ទម្លាប់មួយដែលពុំអាចប្រើបានគ្រប់ពេល ឬគ្រប់មនុស្សក៏ពិតមែន! ប៉ុន្តែការបែងចែកបែបនេះប្រៀបដូចជាការបណ្តុះទម្លាប់ ក៏ដូចជាការចាប់ផ្តើមដាក់គោលដៅមួយដើម្បីតម្រង់ទិស និងសម្រួចខ្លួនឯង។
២. ផ្តល់អាទិភាពលើការសន្សំជាមុន ៖ ត្រង់ចំណុចនេះមើល៍ទៅជាទ្រឹស្ដីដែលពីរោះស្តាប់ តែពិបាកនឹងក្លាយជាការពិត! ជាពិសេសនៅពេលស្ថិតក្នុងស្ថានភាពដែលមានបំណុលច្រើន ហើយរបត់ជីវិតក៏ត្រូវការផ្លាស់ប្តូរ។ តែយ៉ាងណាក៏ដោយភាពឈ្លាសវៃនៃការសន្សំគឺផ្តោតលើការមានវិន័យខ្លួនឯងឱ្យក្លាយទៅជាទម្លាប់ និងជាការផ្តល់អាទិភាពនៃការសន្សំនៅពេលដែលប្រាក់ចំណូលចូល គឺជាការដាក់កំហិតចំពោះខ្លួនឯងឱ្យមានទម្លាប់ល្អ ទោះក្នុងទំហំទឹកប្រាក់ដែលដាក់សន្សំទាំងនោះតិចក្ដី ច្រើនក្ដី ការផ្តល់អាទិភាពលើការសន្សំត្រូវតែជាសកម្មភាពដែលត្រូវតែអនុវត្តន៍ឱ្យបានទៀងទាត់។
៣. ពិចារណារាល់កាក់សេនដែលចេញចូល ៖ ត្រង់ចំណុចនេះសំដៅលើការប្រើប្រាស់ថវិកាផ្ទាល់ខ្លួនដោយមានប្រសិទ្ធភាពក្នុងពេលបច្ចុប្បន្នភាព ឬអនាគត ជំនួសឱ្យការអង្គុយនឹកស្តាយរាល់ការចាយវាយដែលខុសឆ្គងពីមុនៗ ព្រោះការនឹកស្តាយអាចបណ្តាលឱ្យស្រេ្តស និងនាំឱ្យកើតមានអាការបាក់ទឹកចិត្តបន្ថែម។ ចាប់ផ្តើមពីចំណុចសូន្យឡើងវិញ ដោយពិចារណាអំពីភាពសំខាន់ៗមុននឹងចាយទៅលើអ្វីមួយ នៅពេលដែលបានគិតគូរមុននឹងចាយវាយបានល្អិតល្អន់ មិនត្រឹមតែទទួលបាននូវទម្លាប់ចាយវាយមានភាពត្រឹមត្រូវប៉ុណ្ណោះទេ ប៉ុន្តែគឺជាកត្តានាំឱ្យថាមពលផ្លូវចិត្តល្អប្រសើរតាមរយៈប្រសិទ្ធភាព នៃការសម្រេចចិត្តលើការប្រើប្រាស់កញ្ចប់ហិរញ្ញវត្ថុផ្ទាល់ខ្លួន៕
