ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
នៅក្នុងបរិបទនៃការសិក្សាដ៏ស្មុគស្មាញ និងតម្រូវការខ្ពស់នាពេលបច្ចុប្បន្ន ការទទួលបានការតម្រង់ទិសបន្ថែមពីខាងក្រៅសាលារៀន បានក្លាយជាកត្តាជំរុញដ៏សំខាន់មួយក្នុងការបង្កើនប្រសិទ្ធភាពសិក្សា និងការអភិវឌ្ឍខ្លួនរបស់សិស្ស។ អ្នកតម្រង់ទិសសិក្សា (Tutor) មិនត្រឹមតែបំពេញបន្ថែមចំណេះដឹងលើមុខវិជ្ជាប៉ុណ្ណោះទេ ប៉ុន្តែថែមទាំងដើរតួនាទីយ៉ាងសំខាន់ក្នុងការបណ្តុះនូវទម្លាប់ល្អៗ ដូចជាការគ្រប់គ្រងពេលវេលា ការរៀបអាទិភាព និងការពង្រឹងវិន័យផ្ទាល់ខ្លួន។
អាណាព្យាបាលជាច្រើនបានសម្រេចចិត្តជ្រើសរើសសេវាកម្មនេះ ដោយសារតែភាពមមាញឹកនៃជីវិតប្រចាំថ្ងៃ និងកង្វះជំនាញឯកទេសដើម្បីបង្ហាត់បង្ហាញកូនៗអំពីវិធីសាស្រ្តនៃការសិក្សាប្រកបដោយគុណភាព។
អត្ថបទនេះនឹងលម្អិតអំពីមូលហេតុដែលការតម្រង់ទិសបន្ថែម ផ្តល់នូវបទពិសោធន៍សិក្សាឯកជន និងប្រសិទ្ធភាព ព្រមទាំងជួយពង្រឹងទំនុកចិត្ត ភាពក្លាហាន និងឯករាជ្យភាពដល់យុវជន ត្រៀមខ្លួនសម្រាប់ដំណើរការសិក្សានាពេលអនាគត។
អត្ថប្រយោជន៍ជារួមចំពោះសិស្សដែលមានអ្នកតម្រង់ទិសនៃការសិក្សា ៖ សិស្សដែលទទួលបានការតម្រង់ទិស ជួយឱ្យពួកគេទទួលបាននូវអត្ថប្រយោជន៍មួយចំនួនដូចជា មានឯកជនភាព និងបទពិសោធន៍នៃការសិក្សាខុសប្លែកពីសិស្សផ្សេង ប៉ុន្តែស្របតាមសក្តានុពលខ្លួនឯង។ មានការបង្ហាញមួយទល់មួយ ដែលវិធីនេះជួយឱ្យមានការផ្តោតលើការសិក្សាបានល្អ។ បន្ថែមពីនេះ ជួយសិស្សក្នុងការអនុវត្តទម្លាប់នៃការសិក្សាមានគុណភាព, មានឥរិយាបថវិជ្ជមានកំឡុងពេលរៀនសូត្រ និងការប្រាស្រ័យទាក់ទងនៅសាលារៀន, ពង្រឹងខ្លួនឱ្យស្គាល់គុណតម្លៃនៃការគោរពខ្លួនឯងផង និងពង្រឹងទំនុកចិត្តផង! សិស្សមានទម្លាប់រៀន និងធ្វើការដោយទំនួលខុសត្រូវ, ហ៊ានប្រឈមនឹងឧបសគ្គដែលកើតមាន, លើកទឹកចិត្តឱ្យមានឯករាជ្យភាពក្នុងការស្វ័យសិក្សា និងសួរសំណួរនៅសាលា, មានឥរិយាបថដែលអាចសម្របខ្លួននឹងសង្គមមនុស្សដែលមកពីប្រភពចម្រុះគ្នា និងជាការត្រៀមខ្លួនឱ្យយុវជនមានភាពម្ចាស់ការ ទៅកាន់ដំណើរនៃការសិក្សាខាងមុខទោះក្នុងកម្រិតណាក៏ដោយ។
បទពិសោធន៍ និងឯកជនភាព ៖ មិនថាសាលារដ្ឋ ឬក៏សាលាឯកជននោះទេ កម្មវិធីរបស់សាលានីមួយៗបង្កើតឡើងដើម្បីសិស្ស ដែលមកពីប្រភពខុសគ្នាៗ ហើយលទ្ធភាពនៃការទទួលបានចំណេះជំនាញមិនដូចគ្នាទេ ព្រោះវិធីនៃការរៀនរបស់កម្មវិធីសិក្សានីមួយៗ ក៏មានភាពខុសគ្នាដែរ ដូច្នេះកាលដែលសិស្សមានឱកាសក្នុងការទទួលបានអ្នកតម្រង់ទិសបន្ថែមក្នុងការសិក្សាដែលមានផាសុកភាព និងឯកជនភាព ជួយឱ្យពួកគេមានភាពក្លាហាន ក្នុងការសួរ និងជាបទពិសោធបន្ថែមក្នុងការសម្រួចគោលដៅនៃការសិក្សា ព្រោះអ្នកតម្រង់ទិសក្នុងការរៀនសូត្រ មានតួនាទីក្នុងការស្វែងរកចំណុចខ្លាំងសិស្ស និងការជ្រើសរើសសកម្មភាពដែលស្របនឹងពេលវេលាដែលរៀនទៅមានប្រសិទ្ធភាព។
ទំនុកចិត្ត និងភាពក្លាហាន ៖ កាលដែលទទួលបានការតម្រង់ទិសបន្ថែម បន្ទាប់ពីចប់ការសិក្សានៅក្នុងថ្នាក់រៀន ជួយឱ្យសិស្សដែលមិនសូវចាប់បានមេរៀនដូចសិស្សដទៃៗ ឬសិស្សដែលមិនសូវមានភាពក្លាហានប្រឈមមុខនឹងមនុស្សម្នាជាច្រើន ចាប់ផ្តើមរៀបចំខ្លួនក្នុងការបង្កើនទំនុកចិត្តចំពោះខ្លួនឯងឡើងវិញ។ ព្រោះក្រៅពីការជួយបង្ហាញផ្លូវ ក្នុងការជ្រើសរើសរបៀបនៃការសិក្សាដែលត្រឹមត្រូវ អ្នកតម្រង់ទិសមានតួនាទីជួយបំផុសសំណួរ ជួយរំឭកអំពីភាពខ្លាំង ការសរសើរលើកទឹកចិត្ត ការថែរក្សាខ្លួនទាំងសុខភាពផ្លូវកាយនិងសុខភាពផ្លូវចិត្ត! ការបណ្តុះផ្នត់គំនិតវិជ្ជមាន ទម្លាប់ឱ្យនិយាយ ទម្លាប់បង្ហាញចេញនូវអ្វីដែលខ្លួនមិនទាន់យល់ ឬមិនពេញចិត្ត។ ទាំងអស់នេះហើយ សុទ្ធសឹងតែជាអ្វីដែលសិស្សត្រូវការបន្ថែមក្រៅពីការសិក្សានៅសាលា ប្រសិនបើអាណាព្យាបាលមិនមានពេល ឬមិនអាចជួយបង្រៀនបន្ថែមទៅកាន់កូនៗនោះទេ គួរពិចារណាជ្រើសរើសអ្នកតម្រង់ទិស ឬអ្នកប្រឹក្សាដើម្បីបង្កើនគុណភាពនៃការសិក្សារបស់កូនៗ និងដើម្បីសម្រួចទម្លាប់នៃការសិក្សាឱ្យចំគោលដៅ៕
