អារម្មណ៍សោកសៅថ្ងៃចន្ទ (Monday blue) សំដៅ​លើអារម្មណ៍​អវិជ្ជមាន ដែលមនុស្ស​មួយចំនួន​មាននៅ​ដើម ឬចុង​សប្ដាហ៍។ ការ​ត្រលប់​ទៅបំពេញ​ការងារ ឬការ​សិក្សា ជួនកាល​អាចធ្វើឱ្យ​មនុស្ស​មានអារម្មណ៍​មិន​សប្បាយចិត្ត។ បុគ្គល​ម្នាក់ៗ​អាចមាន​អារម្មណ៍​ថា មាន​ការពេញ​ចិត្តនឹង​ការងារ​ទាប និងភាព​តានតឹង​ដោយ​សារ​ការងារ​កាន់តែ​ច្រើន នៅ​ដើម​សប្ដាហ៍។

ទោះជា​យ៉ាងណា​ក៏ដោយ អារម្មណ៍​សោកសៅ​ថ្ងៃចន្ទ (Monday blue) នេះ មិនមែន​ជាជំងឺដែល​ទាមទារ​ការព្យាបាល​នោះទេ។ ពាក្យ​នេះ គ្មាន​និយមន័យ​ក្នុង​សៀវភៅ​ណែនាំ​រោគ​វិនិច្ឆ័យ និង​ស្ថិតិ​ជំងឺផ្លូវចិត្ត បោះពុម្ព​លើកទី ៥ទេ (the Diagnostic and Statistical Manual of Mental Disorders, 5th edition)។ ខណៈសៀវភៅ​នេះ ជាសៀវភៅ​ណែនាំ កំណត់ពី​ជំងឺផ្លូវចិត្ត និង​រាយបញ្ជី​រោគសញ្ញា​ជំងឺ​ទាំងនោះ។

ត្បិតថា អារម្មណ៍​នេះ មិនមែន​ជាជំងឺ ដែល​ទាមទារ​ការព្យាបាល ប៉ុន្តែ​បញ្ហា​នេះ ធ្វើឱ្យ​មនុស្សមាន​អារម្មណ៍​ភ័យខ្លាច និង​រស់នៅក្នុង​ភាពមិន​សប្បាយ​រីករាយ។

អារម្មណ៍ Monday blue ខុសពី​ជំងឺបាក់​ទឹកចិត្ត ព្រោះវា​មាន​ពេលវេលា​ជាក់លាក់​មួយ នៅពេល​ដែល​មនុស្ស​មាន​អារម្មណ៍​ថា ថ្ងៃចន្ទ​ជិត​មក​ដល់។ ផ្ទុយ​ទៅវិញ ជំងឺធ្លាក់​ទឹកចិត្ត សំដៅ​លើ​អារម្មណ៍ ដែល​ធ្លាក់ចុះ​ជាប្រចាំ ហើយ​បាត់បង់​ការ​ចាប់​អារម្មណ៍​លើ​សកម្មភាព ដែលគេ​ធ្លាប់រីករាយ​នឹងធ្វើ។

អារម្មណ៍​ភ័យខ្លាច​ថ្ងៃចន្ទនេះ​នឹង​ថយចុះ នៅពេល​ដែល​ការងារ​ចេះតែ​បន្តទៅ​មុខ ហើយ​អារម្មណ៍​របស់​មនុស្ស​ម្នាក់ៗ​នឹង​មានភាព​ប្រសើរ​ឡើង​នៅ​ចុង​សប្ដាហ៍។ អារម្មណ៍​នេះ​ជាធម្មតា កើតឡើង​លើបុគ្គល ដែល​ធ្វើការ​មាន​ថ្ងៃ​សម្រាក​ជាក់លាក់​នៅ​ចុង​សប្ដាហ៍។

ហេតុអ្វី មនុស្ស​ជួបប្រទះ​នឹង​អារម្មណ៍​នេះ?

មនុស្សអាច​នឹងជួបប្រទះ​អារម្មណ៍​ភ័យខ្លាច​ថ្ងៃចន្ទ ដោយ​សារតែពួកគេ​មិនពេញ​ចិត្ត​នឹងការងារ​ខ្លួន​ឯង។ ភាពតានតឹង​ដោយសារ​ការងារ និង​បទពិសោធន៍​ការងារ​មិនល្អ អាច​ប៉ះពាល់​ដល់អារម្មណ៍​របស់​មនុស្ស​នៅថ្ងៃចន្ទ។

អ្នកជំនាញ​ណែនាំ​ថា ភាពតានតឹង​ក្នុង​ការងារ ប្រហែល​ជាមិន​បណ្ដាល​ឱ្យមាន​អារម្មណ៍ភ័យខ្លាច​ថ្ងៃចន្ទនោះ​ទេ ប៉ុន្តែ​អារម្មណ៍​នេះ កើតឡើង ដោយ​សារ​របៀប ដែល​មនុស្សម្នាក់​ឆ្លើយតប​នឹងភាពតាន​តឹងច្រើន​ជាង។

អារម្មណ៍​ភ័យខ្លាច​ថ្ងៃចន្ទ កើតឡើង​នៅពេលមនុស្ស​ម្នាក់មាន​ទម្លាប់​ប្រតិកម្ម​អវិជ្ជមាន​ទៅនឹង​ថ្ងៃចន្ទ ដែល​ជាថ្ងៃដើម​សប្ដាហ៍ ហើយ​មាន​អារម្មណ៍​រីករាយ​នៅចុង​សប្ដាហ៍ ព្រោះ​ពួកគេ មាន​សេរីភាព​ក្នុង​ការជ្រើសរើស​សកម្មភាព ដែលពួក​គេចង់ធ្វើ។ ការគ្រប់គ្រង​កាលវិភាគ​មិន​បាន​ល្អ ក៏ជា​ចំណែក​មួយ ដែល​ធ្វើឱ្យ​ពួកគេ មាន​អារម្មណ៍​មិនល្អ នៅដើម​សប្ដាហ៍​ដែរ។

សញ្ញា​នៃបញ្ហា​អារម្មណ៍​សោកសៅ​ថ្ងៃចន្ទ (Monday blue)

មាន​សញ្ញាមួយ​ចំនួន ដែល​បង្ហាញ​ថា អ្នកកំពុង​មាន​បញ្ហា​អារម្មណ៍​សោកសៅ មុន​ថ្ងៃចន្ទ​មក​ដល់ ដែល​អារម្មណ៍​ទាំងនោះ មាន​ដូច​ជា អារម្មណ៍​នឿយហត់​ខុសធម្មតា ឬគ្មាន​ថាមពល​ក្នុងខ្លួន, ទទួល​បទពិសោធន៍​ថប់បារម្ភ ឬ​ក៏បារម្ភ​អំពីការងារ ដែល​នឹងមក​ដល់​នៅ​សប្ដាហ៍​បន្ទាប់, ពិបាក​គេងនៅ​យប់​ថ្ងៃអាទិត្យ, គ្មាន​កម្លាំង​ជំរុញ​ទឹកចិត្ត​ពីខាងក្នុង, មានអារម្មណ៍​ឆាប់ខឹង និង​មាន​អារម្មណ៍​មិនល្អនៅ​ថ្ងៃចន្ទ និង​មាន​អារម្មណ៍​ថា ការងារ​ច្រើន​លើសលប់​ពិបាក​គ្រប់គ្រង។

វិធីសាស្ត្រ​បំបាត់​អារម្មណ៍​សោកសៅ ពេល​ថ្ងៃចន្ទ​មកដល់

ការយក​ឈ្នះ​អារម្មណ៍​សោកសៅ ពេល​ថ្ងៃចន្ទមក​ដល់​នេះ គឺទាមទារ​នូវ​យុទ្ធសាស្ត្រ​សម្រប​ខ្លួន ដែល​ផ្លាស់ប្ដូរ​ទស្សនៈ និង​វិធី​គិត​របស់អ្នក អំពីការ​ចាប់ផ្ដើម​ការងារ​នៅ​សប្ដាហ៍​បន្ទាប់។ តាម​រយៈ​ការរកឃើញ​យុទ្ធសាស្ត្រ ដែល​ត្រឹមត្រូវ អ្នកអាច​ប្រើបទពិសោធន៍​ថ្ងៃចន្ទ​របស់​អ្នក ដើម្បី​បង្កើន​អារម្មណ៍​វិជ្ជមាន និង​ផលិតភាព​ការងារ​បន្ថែម​ទៀត ដែល​ធ្វើឱ្យ​ថ្ងៃចន្ទ ក្លាយ​ជាឱកាស​សម្រាប់​ការ​អភិវឌ្ឍខ្លួន និង​ភាព​វិជ្ជមាន។

បច្ចេកទេស​ទាំងរួម​មាន​ដូចជា ការរៀបចំ​ផែនការ​ការងារ​សម្រាប់​សប្ដាហ៍ថ្មី​ជាប្រចាំ, រៀបចំ​កាលវិភាគ​ការងារ​សម្រាប់​ថ្ងៃចន្ទ កុំឱ្យមាន​ភាពតាន​តឹង​ពេក, កំណត់​ការងារ​អាទិភាព​ប្រចាំ​សប្ដាហ៍, រក​មូលហេតុ​ដែលនាំឱ្យ​អ្នកមាន​អារម្មណ៍​ថប់បារម្ភ​ឱ្យបាន​ច្បាស់ ដើម្បីលុប​បំបាត់​ឬសគល់​នៃភាព​តានតឹង និង​ក្ដីបារម្ភ​ទាំងឡាយ, បង្កើត​ផ្នត់គំនិត​ ដែល​យល់​ថា ការងារ​លំបាក​គឺជាឱកាស​អភិវឌ្ឍ​សមត្ថភាព, មាន​ទម្លាប់ធ្វើ​ចម្រើនសតិ (Mindfulness) និង​សម្មាធិ (Meditation) និង​កសាង​ទំនាក់ទំនង​ល្អជាមួយ​ក្រុមការងារ៕