ដើម្បីធ្វើឱ្យថ្ងៃស្អែក កាន់តែមានភាពល្អប្រសើរ អ្វីដែលយុវជនត្រូវធ្វើបន្ត គឺការអភិវឌ្ឍខ្លួនដោយការសិក្សារៀនសូត្រជាប្រចាំដើម្បីកែលម្អ អត្ដចរិត តួនាទី សមត្ថភាព និងកិត្តិយសកេរ្តិ៍ឈ្មោះ។ នេះជាការលើកឡើងរបស់ លោកបណ្ឌិត ហោ ប៊ុនឡេង សាស្រ្តាចារ្យ នៃសាកលវិទ្យាល័យ​កម្ពុជា។

យ៉ាងណាក៏ដោយ មុននឹងឈានទៅរកចំណុចសំខាន់ទាំងបួនដែលលោកបណ្ឌិតលើកឡើងខាងលើ ជាជំហានដំបូង យុវជន​ត្រូវអភិវឌ្ឍសុខភាពផ្លូវកាយ និងសុខភាពផ្លូវចិត្ត ហើយនឹងសុខុមាលភាពសង្គម។ លោកថា គ្មាននរណាម្នាក់ មិនត្រូវការសុខភាពនោះទេ ហើយសុខភាពទៀតសោធគឺមានតម្លៃណាស់ ព្រោះមានមនុស្ស ជាច្រើនបានបាត់បង់ជីវិត ដោយសារតែអត់មានលទ្ធភាពថែទាំសុខភាព។

ទន្ទឹមគ្នានោះ លោកបណ្ឌិត​ក៏​បានបញ្ជាក់លម្អិតបន្ថែម រាល់ចំណុចដែលត្រូវអភិវឌ្ឍន៍​ទាំង៤ចំណុច ដូចខាងក្រោមនេះ ៖

១ អត្ថចរិត ៖ នៅពេលដែលយុវជនចាប់ផ្តើមប្រឡូកនឹងការងារ គេយកមនុស្សដែលមានសមត្ថភាពទៅធ្វើការ  ប៉ុន្តែនៅពេលគេត្រូវជម្រុះបុគ្គលិកចេញវិញ មិនមែនជម្រុះដោយសារពួកគេអាក់សមត្ថភាពទេ គឺជម្រុះដោយសារចរិតមិនល្អ។ ចរិតមួយដែលល្អ គឺមានសុជីវធម៌ មានសីលធម៌ និងមានគុណធម៌ ដែលចំណុចទាំងនេះជាវិថីនាំខ្លួនឯងឱ្យមានភាពថ្លៃថ្នូរ។ ​បើមានចរិតល្អ នឹងទទួលបានការរាប់អាន និងការវិនិយោគពីអ្នកដទៃ។

២. សមត្ថភាព ៖ សមត្ថភាពត្រូវតែអភិវឌ្ឍន៍ ឱ្យក្លាយជាមនុស្សដែលគេត្រូវការ និងជាមនុស្សដែលគេចង់បាន ឬជាមនុស្សដែលគេខ្វះយើងមិនបាន។ បន្ទាប់មកអភិវឌ្ឍន៍ទេព​កោសល្យ​ ដែលមានពីធម្មជាតិ ប៉ុន្តែបើមិនអភិវឌ្ឍ គឺនៅតែជាធម្មជាតិអ៊ីចឹង។ ការអភិវឌ្ឍ ពីធម្មជាតិ ឱ្យទៅជាការអនុវត្ត ជាក់ស្តែង ឱ្យមានជំនាញ ដើម្បីឆ្ពោះទៅរកបទពិសោធបន្ថែម។

៣ តួនាទី ៖ អភិវឌ្ឍន៍នូវតួនាទី ឱ្យក្លាយទៅជាភាពល្អប្រសើរ ពង្រឹងជំនាញជាអ្នកគ្រប់គ្រង ឱ្យក្លាយទៅជាអ្នកដឹកនាំ ដើម្បីបង្កើនអំណាច ប៉ុន្តែមិនមែនអំណាចដើម្បីបំពានអ្នកដទៃនោះទេ អំណាចត្រង់នេះមានន័យថា គឺមានអំណាច និងសមត្ថភាពដើម្បីជួយគេ ។

៤ កិត្តិយស ៖ កិត្តិយស មានន័យថា អ្វីដែលយើងកំពុងតែធ្វើ យើងត្រូវច្នៃវាឱ្យល្អជាងមុន ឬក៏យើងបង្កើតថ្មីដើម្បីឱ្យគេទទួលស្គាល់ ឱ្យក្លាយទៅជាស្នាដៃមួយជំរុញជីវិតទៅរកភាពអស្ចារ្យ ។

លោក ហោ ប៊ុនឡេង បានបញ្ជាក់ថា កត្តាដែលយើងត្រូវអភិវឌ្ឍន៍ចំណុចទាំងនេះឡើង ព្រោះសុខភាព ជាមូលដ្ឋានគ្រឹះនៃជីវិតរបស់យើង ចំណេះដឹងជាទ្រព្យសម្បត្តិដែលចាយមិនចេះអស់ ចរិតជារស់ជាតិនៃជីវិត ដោយឡែកសមត្ថភាពជាខ្លឹមនៃជីវិត ហើយចំពោះទេពកោសល្យជាសក្តានុពលនៃជីវិត។

លោកបណ្ឌិតបន្ថែមថា ជាមនុស្សកើតមកត្រូវតែចេះមានការផ្លាស់ប្តូរ ចែករំលែក និងបន្សល់អ្វីមួយទុកមុនពេលលាចាគលោក ។ ហើយបើបងប្អូនចង់ក្លាយខ្លួនទៅជាបុគ្គលប្រសើរនៅក្នុងថ្ងៃអនាគត ត្រូវស្គាល់ទេពកោសល្យធម្មជាតិរបស់ខ្លួន ហើយបម្លែងទេពកោសល្យធម្មជាតិរបស់ខ្លួនឱ្យទៅជាការពិត ដើម្បីចាប់ផ្តើមពីភាពត្រឹមត្រូវ ទៅរកភាពល្អប្រសើរ ៕