ព្រឹត្តិការណ៍ព័ត៌មាន
ចំណេះជីវិត
ជំនាញ
យុវជនឆ្នើម
អប់រំកុមារតូច
ព័ត៌មានអាហារូបករណ៍
មាតិកាឌីជីថល
អនាគត
ពន្លកបៃតង
កម្ពុជា 360°
ការចេះរៀបចំខ្លួនឱ្យល្អ កាយវិការសមរម្យ ចង់ឱ្យអ្នកដទៃបានសុខ ក៏ជាបុណ្យមួយដែរ ហើយអ្នកមានបុណ្យមិនសូវពិបាកចិត្តនោះទេ ព្រោះសប្បាយចិត្តពីខាងក្នុង។ នេះជាសង្ឃដីការបស់ព្រះតេជគុណ គូ សុភាព នៅក្នុងកម្មវិធី TEDx Phnom Penh កាលពីពេលសប្ដាហ៍កន្លងទៅ។
ព្រះតេជគុណមានសង្ឃដីកាថា សកម្មភាព ដែលយើងធ្វើល្អ ត្រូវបានគេស្គាល់ថា ជាមេត្តាកាយកម្ម មានន័យថា កាយវិការប្រកបដោយសេចក្ដីមេត្តា ដែលផ្ដល់ស្នាមញញឹម និងសេចក្តីគោរព ដល់អ្នកដទៃ ដោយសន្តានចិត្ត ចង់ឱ្យគេបានសុខ។ ចំណែក យើងជាអ្នកប្រព្រឹត្តិអំពើនឹងក្លាយជាមនុស្សមានបុណ្យ ចិត្តត្រជាក់ សប្បាយ និងគ្មានទុក្ខ។
អ្នកមានបុណ្យ គឺគ្មានទុក្ខនោះទេ រីឯអ្នកដែលដើរខឹងគេ គឺអ្នកអោបទុក្ខ។
សង្ឃដីកា ព្រះតេជគុណ គូ សុភាព
ព្រះអង្គមានសង្ឃដីកាបន្ថែមទៀតថា ក្រៅពីការធ្វើទង្វើល្អ ការនិយាយប្រកបដោយមេត្តា គឺរឹតតែសំខាន់ ព្រោះសកម្មភាពនេះ ជួយឱ្យយើងអាចបង្កើតទំនាក់ទំនងជាមួយអ្នកដទៃ ដោយភាពចុះសម្រុង។ ម្យ៉ាងទៀត ក្នុងនាមជាមនុស្ស ត្រូវរៀនបើកចិត្តឱ្យទូលាយ ទើបអាចរស់នៅក្នុងសេចក្ដីស្ងប់សុខ និងមានសុភមង្គល។
ព្រះតេជគុណ គូ សុភាព មានសង្ឃដីកា ដោយលើកជាឧទាហរណ៍ថា ដើមឈើ ប្រសិនបើនៅក្រោមដំបូល គឺមិនអាចលូតបានខ្ពស់នោះទេ ទាល់តែបានជួបប្រឈមឧបសគ្គ ត្រូវខ្យល់ ត្រូវភ្លៀង ទើបអាចលូតបានខ្ពស់។ ដូច្នេះ ជាមនុស្ស ទាល់តែយើងរៀនបើកចិត្តឱ្យទូលាយ ទើបអាចមើលឃើញថា អ្នកដទៃមានសេចក្ដីល្អ មានគុណធម៌ និងមានសក្តានុពលរីកចម្រើន។
ទន្ទឹមនឹងនេះ ព្រះអង្គក៏ចង់ឃើញ ពុទ្ធសាសនិកគ្រប់រូប ចេះបើកចិត្តចូលរួមផ្ដល់ដំណោះស្រាយ ជាជាងគ្រាន់តែលើកបញ្ហាមកឱ្យគេឃើញ ឬបង្កើតបញ្ហាបន្ថែមសម្រាប់សង្គម។ ការបើកចិត្តនេះ នឹងនាំឱ្យសង្គមរបស់យើងអាចអភិវឌ្ឍបានដោយភាពវិជ្ជមាន ជាមួយនឹងប្រជាជន ដែលផ្លូវចិត្តរឹងមាំ និងមានសេចក្ដីសុខ៕
